இஸ்லாமிய ஒற்றுமையால் மட்டுமே முஸ்லிம்களின் கண்ணியத்தை மீட்டெடுக்க முடியும் - ஹஜ்ஜின் செய்தி

Islamic unity alone can restore the dignity of Muslims - the message of Hajj

எந்தவொரு சமூகத்தினதும் வெற்றி அதன் உறுப்பினர்களிடையே உள்ள பரஸ்பர ஒத்துழைப்பு, ஒற்றுமை மற்றும் நல்லிணக்கத்திலேயே பொதிந்துள்ளது. ஒரு வலுவான ஐக்கிய சமுதாயம், வெல்ல முடியாத சக்தியாக மாறி, அவர்களின் வழியில் வரும் எந்த இடையூறுகளையும் சமாளிக்கக் கூடிய வல்லமையைத் பெறுகிறது. அத்தகைய ஒன்றுபட்ட சமுதாயத்தை எதிர்ப்பதற்கு யாரும் துணிவதில்லை.

இஸ்லாத்தின் எதிரிகள் முஸ்லிம் உம்மாவை பிரித்து அவர்கள் ஒருவருக்கொருவர் மோத வைப்பதில் கண்ணும் கருத்துமாக உள்ளனர். அவர்களது இயல்பே அதுதான்.

இந்த சதித்திட்டத்தை முஸ்லிம் உலகு படிப்படியாக புரிந்துகொண்டு வருகிறது என்பது மகிழ்ச்சிக்குரிய விடயமாகும். பாரசீக வளைகுடாவை எப்போதும் கொந்தளிப்பு நிலையிலேயே வைத்திருக்க வேண்டும் என்ற மேற்குலகின் திட்டம் இப்போது தவிடுபொடியாகி வருவதை நாம் அண்மைக்காலமாக அவதானித்து வருகிறோம். உலகளவிலும் வரவேற்கத்தக்க பல மாற்றங்கள் ஏற்பட்டு வருவதையும் நாம் காண்கிறோம். இதுவரைகாலமும் சமாதானத் தூதுவர்களாக நடித்து வந்தோரின் முகத்திரை இப்போது கிழிக்கப்பட்டுள்ளது. உலகம் இப்போது வேறு திசையை நோக்கி பயணிக்க ஆரம்பித்துள்ளது.

சீனாவின் மத்தியஸ்தத்தில் வரலாற்றுரீதியாக பிரிந்திருந்த சவூதி அரேபியாவும் ஈரான் இஸ்லாமிய குடியரசும் மீண்டும் சுமுக உறவை ஏற்படுத்திக்கொண்டிருப்பதானது பிரித்தாளும் கொள்கையில் ஊறி திளைத்திருந்த மேற்குலகில் ஓர் அதிர்வலையை ஏற்படுத்தியுள்ளது. அமெரிக்காவும் இஸ்ரேலும் செய்வதறியாது திகைத்து நிற்கின்றன. ஈரானை காட்டிக்காட்டியே ஆயுதங்களை விற்று வந்த ஆயுத தயாரிப்பாளர்கள், திடீரென ஏற்பட்ட மாற்றத்தினால் திருதிருவென்று முழிக்கின்றன. அதுமட்டுமல்லாமல் அமெரிக்க ஆதிக்க கூடாரத்துள் இருந்த நாடுகள் இப்போது சீனா மற்றும் ரஷ்யா பக்கம் சாய்ந்து வருவதானது மேற்குலகு போட்டிருந்த திட்டத்தை சிதைத்துள்ளது.

பாலஸ்தீன், ஆப்கானிஸ்தான், ஈராக், லிபியா, எகிப்து, சிரியா, லெபனான், யெமன், பஹ்ரைன், மத்திய ஆபிரிக்கா, பாகிஸ்தான், இந்தியா, காஷ்மீர், மியன்மார் மற்றும் இதுபோன்ற எத்தனையோ இடங்களில் முஸ்லிம்களுக்கு எதிராக இடம்பெற்றுவரும் அநியாயங்கள் இனி ஓரளவு குறையும் என்று எதிர்பார்க்கலாம்.

எம்மிடையில் ஒற்றுமை இன்மையே பிரச்சினைகளின் மூல காரணங்களில் பிரதானமானது என்பதை எம்மில் பலர் அறிவோம். எமக்குள் இருக்கும் சிறிய வேற்றுமைகளை வளர்ப்பதில் இஸ்லாத்தின் எதிரிகள் கண்ணும் கருத்துமாய் உள்ளனர் என்பதை ஏனோ நாம் உணரத் தவறிவிடுகிறோம்.

"அமெரிக்க மற்றும் சியோனிச பிசாசுகளை துரத்தியடிக்கூடியது இஸ்லாமிய ஒற்றுமை மட்டுமே. முஸ்லிம்கள் மத்தியில் பிரச்சனைகளை உருவாக்க அமேரிக்கா சுன்னிகளைத் தூண்டுகிறது, பிரித்தானியா ஷியாக்களைத் தூண்டுகிறது. இரண்டுமே ஒரு கத்தரிக்கோலில் உள்ள இரண்டு கத்திகளை போன்றது." - ஆயத்துல்லாஹ் காமேனி

இந்த சதித் திட்டத்தை முறியடிப்பதற்கு இப்போதுள்ள ஒரே வழி, அனைத்து இஸ்லாமிய நாடுகளும் தம்மிடையே உள்ள பிணக்குகளை தாமே பேசி தீர்த்துக் கொள்ள வேண்டும். அவற்றுக்கிடையில் புரிந்துணர்வு ஏற்பட வேண்டும்.

முஸ்லிம் நாடுகள் மத்தியில் இவ்வாறான ஒரு சுமுக நிலை தொடருமாயின், இஸ்லாமிய உலகு முகம் கொடுத்துள்ள ஏராளமான சவால்களை சுலபமாக வெற்றி கொள்ள முடியும். முஸ்லிம்கள் இழந்துள்ள செல்வாக்கையும் கண்ணியத்தையும், மிகக் குறுகிய காலத்துள் மீளப்பெறவும் முடியும்.

இந்த இஸ்லாமிய வழிமுறையை விட்டுவிட்டு இஸ்லாத்தின் எதிரிகளிடம் மண்டியிடுவதால் பிரச்சினை பூதாகார உருவெடுக்குமே அல்லாமல், தீரப்போவதில்லை என்பதை உலக நிகழ்வுகள் துல்லியமாக காட்டிக்கொண்டு இருக்கின்றன.

இங்கே "ஒற்றுமை" என்பதன் மூலம் முஸ்லிம்கள் அனைவரும் அவர்கள் சரியென்று ஏற்றுக்கொண்டுள்ள ஹனபி, ஷாபி, ஹம்பலி, மாலிகி, ஜாபரி, ஸைதி போன்ற அனைத்து சிந்தனை பள்ளிகளையும் கைவிட்டு ஒரே கொள்கையை ஏற்றுக்கொள்ள வேண்டும் என்று அர்த்தமல்ல. இவை அனைத்திற்கும் அடிப்படையாக இருப்பது புனித குர்ஆனும் ஹதீஸுமாகும். கண்ணியத்துக்குரிய ஸஹாபாக்கள், இமாம்கள் மத்தியிலும் கருத்து முரண்பாடுகள் இருந்துள்ளன. இஸ்லாத்தில் கருத்துமுரண்பாடுகள் வரவேற்கத்தக்க விடயமாகும். ஒற்றுமை என்பதன் மூலம் இங்கு நாம் எதிர்பார்ப்பது மற்றவர்களின் கருத்துக்களுக்கு மரியாதை கொடுக்கும் பரந்த மனப்பான்மை இருக்க வேண்டும் என்பதாகும்.

இந்த அடிப்படையில் முஸ்லிம்கள் மத்தியில் ஒற்றுமையை வலியுறுத்தவேண்டியது, அதற்காக ஹஜ் கடமையை பயன்படுத்த வேண்டியது  உலமாக்களினதும் முஸ்லிம் அறிவுஜீவிகளினதும் கடமையாகும்.

The Hajj Pilgrimage from Imam Khomeini's Point of View

இமாம் கொமெய்னி (ரஹ்) அவர்களின் பார்வையில் ஹஜ் யாத்திரை

தனது அறிவுசார், சமூக மற்றும் அரசியல் வாழ்க்கையின் தொடக்கத்திலிருந்தே, உண்மையான இஸ்லாத்தை விளக்கி, அறியாமை மற்றும் மூடநம்பிக்கை ஆகியவற்றின் பொறிகளிலிருந்து விடுபடுவதற்கான அவசியத்தை மர்ஹூம் இமாம் கொமெய்னி (ரஹ்) அவர்கள் தனது முதன்மை நோக்கமாகக் கருதியிருந்தார்கள்.

இஸ்லாமிய புரட்சி ஏற்படுவதற்கு பல ஆண்டுகளுக்கு முன்பு இருந்தது போலவே இஸ்லாமிய புரட்சி வெற்றிபெற்று இஸ்லாமிய குடியரசு முறையையும் ஸ்தாபித்த பின்னரும், உலக அளவில் இஸ்லாமிய சிந்தனையை புத்துயிர்ப்பிப்பது ஒரு முஸ்லிமின் புனிதமான நோக்கமாக கருதி இமாம் கொமெய்னி (ரஹ்) செயற்படுத்தி வந்தார்கள். அவர் தனது வாழ்க்கையின் கடைசி நாட்கள் வரை அதைப் பின்பற்றுவதில் கொஞ்சம்கூட சளைக்கவில்லை.

சர்வாதிகார ஆட்சியின் கட்டமைப்பை மாற்றுவதற்கும் இஸ்லாமிய ஆட்சியின் அஸ்திவாரங்களை உறுதியாக அமைப்பதற்கும் சமூக மற்றும் அரசியல் நடவடிக்கைகளின் முக்கிய காரணியாக மக்கள் நம்பிக்கைகள் மற்றும் எண்ணங்களில் மாற்றம் ஏற்படுத்தி அசல் இஸ்லாமிய தன்மைக்கு அவர்களை மீளவைக்கும் வழிமுறை பற்றியும் இமாமவர்கள் திட்டமிட்டார்கள்.

மத சிந்தனையின் மறுமலர்ச்சியை காணும் வழியில் இமாம் கொமெய்னி அவர்கள் புனித போராட்டத்தின் பரிமாணங்கள் மற்றும் வெளிப்பாடுகளில் ஒன்றாக 'ஹஜ் யாத்திரை'யை அதன் அடிப்படை தத்துவங்கள், பாடங்கள், அது வழங்கும் செய்திகள் மற்றும் சமூக மற்றும் அரசியல் பரிமாணங்களை விளக்கி விவரிப்பதன் மூலம் புதுப்பிக்க வேண்டும் என்று அயராத முயற்சி செய்தார்கள்.

ஹஜ் சம்பந்தமான இமாமின் செய்திகள் மற்றும் அறிக்கைகளில் குறிப்பிடத்தக்க பகுதி இப்ராஹீம் (அலை) அவர்கள் கால மற்றும் முஹம்மத் (ஸல்) அவர்கள் கால ஹஜ் யாத்திரையை புத்துயிர் பெறச் செய்ய வேண்டிய அவசியம் பற்றியதாகவே அமைந்திருந்தன.

இந்த மாபெரும் மார்க்க கடமையில் இருந்து மூடநம்பிக்கைகளை  அகற்றி, ஹஜ் யாத்திரையின் தத்துவத்தையும் அதன் விளைவுகளையும் விளக்குவதன் மூலம் முஸ்லிம் சமூகம் எதிர்நோக்கும் முக்கிய பிரச்சினைகளான இஸ்லாமிய நாடுகளில் காலனித்துவ சக்திகள் மற்றும் அவர்களால் தேர்ந்தெடுக்கப்பட்ட கைக்கூலிகள் ஆகியோரை  அடையாளம் காட்டி, ஹஜ்ஜின் உண்மையான தாத்பரியத்தை உணர்த்த முடியும் என்று இமாமவர்கள் நம்பினார்கள்.

இந்த சந்தர்ப்பத்தில் ஹஜ் தொடர்பாக இமாம் கொமெய்னி விடுத்த அறிக்கைகளில் ஒரு பகுதியை ஆராய்ந்ததில், அது மூன்று முக்கிய தலைப்புகளைக் கொண்டுள்ளது என்பதை கண்டறிய முடிகிறது: அது ஒவ்வொன்றையும் தத்தனியாக ஆராய்வோம்.

1.    ஹஜ்ஜின் தத்துவம் தொடர்பான குழப்பமான விளக்கங்கள்

முஸ்லிம்களின் முக்கிய கடமைகளில் ஒன்று ஹஜ் ஆகும். இந்த புனித யாத்திரையின் உண்மை நோக்கம் என்ன என்பதையும் ஹஜ்ஜை நிலைநிறுத்த தங்கள் பொருள் மற்றும் வாழ்வின் ஒரு பகுதியை ஏன் செலவிட வேண்டும் என்பதையும் கண்டறிவதாகும்.

இவற்றை ஆய்ந்தறியாத நபர்களால் அல்லது பக்கச்சார்பான ஆய்வாளர்களால் மற்றும் ஹஜ் முகவர்களால் இதுவரை ஹஜ் யாத்திரையின் தத்துவமாக வரையப்பட்டிருப்பது என்னவென்றால், இது ஒரு கூட்டு வழிபாடு மற்றும் ஒரு யாத்திரையுடனான ஒரு சுற்றுலா பயணம்.

ஒருவர் எவ்வாறு வாழ வேண்டும், எவ்வாறு புனித போராட்டத்தில் ஈடுபட வேண்டும், முதலாளித்துவம் மற்றும் கம்யூனிசம் ஆகியவற்றுக்கும் ஹஜ் யாத்திரைக்கும் என்ன தொடர்பு இருக்கிறது…? முஸ்லிம்களின் உரிமைகளையும், அடக்கி ஆள்பவரிடமிருந்து நலிந்தவர்களையும் பாதுகாப்பதில் ஹஜ் யாத்திரைக்கு என்ன தொடர்பு இருக்கிறது…? முஸ்லிம்கள் மீது செலுத்தப்படும் உளரீதியான மற்றும் உடல்ரீதியான  அழுத்தங்களுக்கு தீர்வு காண்பதில் ஹஜ் யாத்திரைக்கு என்ன தொடர்பு இருக்கிறது...? முஸ்லிம்கள் தங்களை ஒரு பெரிய சக்தியாகவும், மூன்றாவது உலகளாவிய சக்தியாகவும் நிலைநிறுத்திக் கொள்வதற்கு ஹஜ் யாத்திரைக்கு ஏதாவது தொடர்பு உள்ளதா...? மாறாக, ஹஜ் யாத்திரை என்பது 'கஃபா' மற்றும் மதீனா நகரத்தைப் பார்வையிடும் ஒரு பயணமாக மட்டுமே இருக்க வேண்டுமா...? போன்ற கேள்விகள் எம்முள் எழ வேண்டும்.

வரலாறு முழுவதும் இஸ்லாமிய சமூகங்களின் உணர்வுகளை மழுங்கடித்து, அவர்களை கட்டிப்போட்டுள்ள ஆபத்துகளில் ஒன்று ஹஜ் யாத்திரையின் யதார்த்தத்துடன் ஒத்துப்போகாத உணர்வுகள் மற்றும் விளக்கங்கள் கொடுத்து மக்கள் மத்தியில் அந்த உபரிகளையே ஊக்குவித்தல் மற்றும் பரப்புதல் ஆகும்.

இவர்களால் கொடுக்கப்படும் இந்த தவறான விளக்கங்கள் இந்த வழிபாட்டுச் செயலின் யதார்த்தங்கள், போதனைகள் மற்றும் ஞான அறிவு ஆகியவற்றை அறியாமையுடன் கலக்கச் செய்து, முஸ்லிம்களில் மந்தநிலை, மூடநம்பிக்கை போன்றவற்றை ஏற்படுத்தி அவர்களில் உள்ள மாற்றத்தை உருவாக்கும் திறனை பயன்படுத்த விடாது, பின்தங்கியிருக்க காரணமாக அமைந்து விடுகின்றன. ஹஜ் எனும் இந்த முக்கியமான இஸ்லாமிய கடமையின் போது  அனைத்து முஸ்லிம்களையும் ஒரே இடத்தில் ஒன்றுதிரட்டி, ஒரு பாரிய இஸ்லாமிய மாநாட்டு வடிவத்தில், சமூக மற்றும் அரசியல் விளைவுகளை உணரச் செய்ய பயன்படுத்துவதற்கு பதிலாக ஒரு சுற்றுலா பயணம் போல் கருதச் செய்துள்ளனர்.

முஸ்லிம்களை மகிழ்விக்கவும், களிப்புறச் செய்யவும், அங்குள்ள  கட்டிடங்கள் மற்றும் மக்களைப் பார்த்துவிட்டு, விரும்பிய பொருட்களை வாங்கிக்கொண்டு தத்தமது நாடுகளுக்குத் திரும்பவும் ஒவ்வொரு ஆண்டும் ஏராளமான மக்கள் ஹஜ் யாத்திரை செய்ய வேண்டும் என்றா இஸ்லாம் கோருகிறது...? என்பதை நாம் அனைவரும் சிந்திக்க கடமைப்பட்டுள்ளோம்.

இமாம் கொமெய்னி அவர்களின் பார்வையில், ஹஜ் தொடர்பான இந்த தவறான விளக்கங்கள் இரண்டு குழுக்களால் தொடர்ந்து முன்வைக்கப்பட்டு வருகின்றன.

முதல் குழு, அறியாமையில் உள்ளவர்கள்: இஸ்லாமிய சமூகங்களின் உண்மையான தேவை தொடர்பான புரிதலும் அறிவும் இல்லாத காரணத்தால், ஹஜ் யாத்திரையை சில இடங்களை தரிசிப்பதற்காகவும் மற்றும் அதன் முக்கியத்துவத்தை சில சடங்குகளுக்குள் சுருக்கி, வரையறுத்து கட்டுப்படுத்துவோராகும். இவர்களது இந்த அறியாமை, புனித ஹஜ் யாத்திரையின் தத்துவத்தையும் அதனால் ஏற்படுத்தக்கூடிய சமூக மற்றும் அரசியல் தாக்கத்தையும் அதன் கருத்தியல் மற்றும் ஆன்மீக நோக்கங்களுடன் புரிந்து கொள்வதிலிருந்து தடுக்கிறது.

இரண்டாவது குழு ஹஜ் யாத்திரையை தமது பொருளாதார மற்றும் அரசியல் நலன் காரணங்களுக்காக பயன்படுத்த முயற்சிக்கும் பக்கச்சார்பான ஆய்வாளர்கள் ஆகும். இந்த குழு யாத்ரீகர்கள்  ஹஜ்ஜின் உண்மையான நலன்களையும் அபிலாஷைகளையும் அடையவிடாது, அல்லது விரும்பிய மற்றும் வளமான முறையில் அதன் தாத்பரியத்தை  உணரவிடாது இந்த மாபெரும் இறை வழிபாட்டை அவர்கள் தங்கள் மார்க்கப் பிரிவினரின் விருப்பங்களுக்கும், கற்பனைகளுக்கும் ஏற்ப விளக்குகிறார்கள். இந்த ஆய்வாளர்கள், இன்றும்கூட, மதத்தின் பெயரில் இஸ்லாமிய போர்வை போர்த்திக்கொண்டு, பொதுமக்களின் கருத்தை குழப்ப முயற்சிக்கின்றனர். இஸ்லாமிய புரட்சியின் வெற்றியின் பின்னர் ஹஜ் யாத்திரையின் சமூக மற்றும் அரசியல் விளைவுகளை எதிர்க்கும் நோக்கத்துடன் நடவடிக்கைகளில் ஈடுபட்டவர்கள் அதே நபர்களும் இவர்கள் தான். இன்றும், அவர்கள் காலத்தின் கட்டாயமான முஸ்லிம் ஒற்றுமையை எதிர்ப்பவர்களாகவும் இஸ்லாமிய பிரிவுகளின் அடிப்படை நெருக்கத்தை மறைப்பவர்களாகவும் இருக்கின்றனர். இவர்கள் தான் புனித ஹஜ்ஜை சடங்குகளுக்குள் முடக்கி சில இடங்களை தரிசிக்கும் பொழுதுபோக்கு பயணம் போல் நம்பச் செய்துள்ளார்கள்.

இந்த இரு குழுக்களும் நம்பமுடியாத அனுமானங்களையும் விளக்கங்களையும் வழங்குவதன் மூலம், ஹஜ் யாத்திரைக்கும் சமூக மற்றும் அரசியல் விவகாரங்களில் ஈடுபடுவதற்கும் இடையே எந்த தொடர்பும் இல்லை என்ற கூற்றை நிரூபிப்பதை நோக்கமாகக் கொண்டு செயல்படுகின்றன. இவர்களுக்கு முஸ்லிம்கள் உலகளாவிய அதிகாரத்தை அடைவதோ, திமிர்பிடித்த உலக சக்திகளுக்கு எதிரான புனித போராட்டத்தில் ஈடுபடுவதோ அல்லது தாழ்த்தப்பட்டோரின் உரிமைகளை மீட்டெடுப்பதோ அவசியமானதல்ல. அவர்களின் பார்வையில், இஸ்லாமிய நாடுகளில் காலனித்துவத்தின் தேர்ந்தெடுக்கப்பட்ட கைக்கூலிகளுக்கு எதிராக போராடுவது ஒரு தவறான செயலாகும்.

2.    உண்மையான ஹஜ் யாத்திரையில் மறைந்திருக்கும் உண்மைகள்

ஹஜ் யாத்திரைக்கு கொடுக்கப்பட்டு வரும் மேற்கூறப்பட்ட  தவறான விளக்கங்களின் ஆபத்துகள் குறித்து எச்சரித்த இமாம் கொமெய்னி இந்த மாபெரும் வழிபாட்டின் மகத்துவம் பற்றி குறிப்பிடுகிறார்:

"... ஹஜ் யாத்திரை என்பது மனிதர்கள் நெருங்கி வந்து கஃபா எனும் புனித இல்லத்தின் உரிமையாளனுடன் இணைவதுதான் ... மேலும் ஹஜ் யாத்திரை என்பது வெறுமனே கிரியைகள், சம்பிரதாயங்கள் மற்றும் ஜெப சொற்களின் தொடர் அல்ல. ஒரு நபர் சொற்கள், சொற்றொடர்கள் மற்றும் இறுகிய இயக்கம் போன்றவற்றின் ஊடாக இறைவனை அடைவதில்லை. இறை போதனைகளின் மையத்தில் ஹஜ் யாத்திரை உள்ளது. அதில் இருந்து இஸ்லாத்தின் கொள்கையின் உள்ளடக்கத்தை வாழ்வின் அனைத்து அம்சங்களிலும் நாம் தேட வேண்டும். ஹஜ் யாத்திரை என்பது பொருள் மற்றும் எண்ணங்களின் தீமைகளிலிருந்து பாதுகாப்பளிக்கும் ஒரு முக்கிய கேடயமாக; மேலும் அது ஒரு நபரில் மற்றும் உலகில் அன்பை உருவாக்கும் ஒரு முழுமையான சமூக வாழ்க்கையின் அனைத்து காட்சிகளின் வெளிப்பாடும் ஆகும்.

இன்னும் ஹஜ் யாத்திரையில் உள்ளவை உண்மை வாழ்க்கையுடன் தொடர்புபட்ட  சடங்குகளாகும்... மேலும் நபிகள் நாயகம் (ஸல்) அவர்களின் "உம்மா" எனும் உலகளாவிய சமூக சபையுடன் இணைவதற்கு, எந்தவொரு இனத்திலிருந்தும் தேசத்திலிருந்தும் வந்தபோதும், இப்ராஹிம் (அலை) அவர்களின் “கவ்ம்” எனும் வட்டத்துக்குள் வந்துவிட வேண்டும் என்பதைக் கருத்தில் கொள்ளுங்கள். ஆகவே, "உம்மா" என்ற ஒன்றுபட்ட சக்தியாக மாறி, இந்த ஏகத்துவ வாழ்க்கையின் பயனை அடைவதற்கு ஹஜ் யாத்திரை எம்மை தயார் படுத்துகிறது, அதற்கான பயிற்சியை வழங்குகிறது. அதற்கான ஒத்திகையே இந்த புனித கடமையாகும்.

3. ஹஜ் யாத்திரை என்பது குர்ஆன் போதனைகளின் சாராம்சம் ஆகும்.

ஹஜ் யாத்திரை என்பது முஸ்லிம்களின் பொருள் மற்றும் ஆன்மீக ஆற்றல்கள் மற்றும் திறன்களை பிரதிபலிக்கும் அற்புத காட்சி; மேலும் அது அனைவரும் பயனடையக்கூடிய ஆசீர்வதிக்கப்பட்ட குர்ஆன் போதனைகளின் சாராம்சமும் ஆகும்.

சன்மார்க்க சிந்தனையாளர்கள் மற்றும் அறிஞர்கள் மற்றும் உலகளாவிய இஸ்லாமிய "உம்மா" வின் நிலையினை நன்கு அறிந்தவர்கள் ஹஜ்ஜின் கடமையில் புதைந்து கிடைக்கும் அரும்பெரும் பொக்கிஷங்களை அடைந்துகொள்வதற்கு, ஞானக் கடலில் மூழ்கவேண்டும், சுழியோட வேண்டும். அவ்வாறன்றி அவற்றை பெற்றுக்கொள்வது சாத்தியமில்லை.

ஹஜ் யாத்திரையின் தத்துவம் மற்றும் விளைவுகள் பற்றி  இந்த விளக்கங்களில், இமாம் கொமெய்னி (ரஹ்) விவரிக்கையில், இந்த பெரிய இறை வழிபாட்டுச் செயலையும் அதன் விளைவுகள் மற்றும் அறுவடைகளின் மகத்துவத்தையும் இலகுவான, புரியும் மொழியில் விளக்கிய பின்னர், இமாம் கொமெய்னி (ரஹ்) மகத்தான சமூக மற்றும் அரசியல் விளைவுகளைக் கொண்ட இந்த மாபெரும் வழிபாட்டுச் செயல் எவ்வாறு அதன் இயல்பு தன்மையில் இருந்து தூரப்படுத்தப்பட்டுள்ளது, வெறும் சரித்திர கதையாக்கப்பட்டுள்ளது என்பதையிட்டு தனது அதிருப்தியை வெளிப்படுத்துகின்றார்.

புனித குர்ஆனில் பொதிந்துள்ள ஆழமான அர்த்தங்களை நாம் புரியாதுள்ளது போன்றே ஹஜ்ஜின் தாத்பரியங்களையும்  அறியாதிருக்கிறோம் என்பது கவலைக்குரிய விடயமாகும். உயிர்த்துடிப்புள்ள குர்’ஆன் வசனங்களின் அர்த்தத்தை எந்தளவு மறைத்துள்ளார்களோ அதே அளவிற்கு ஹஜ்ஜின் மகத்துவமும் வக்கிர சிந்தனையின் மண்ணின் கீழ் புதைக்கப்பட்டு மறைக்கப்பட்டுள்ளது ...

புனித குர்ஆனின் வழிகாட்டுதல், வாழ்வொழுங்கு மற்றும் வாழ்க்கையை உருவாக்கும் தத்துவத்தின் மொழி எவ்வாறு திகில், மரணம் மற்றும் கல்லறை ஆகியவற்றின் மொழியாக தரம் குறைக்கப்பட்டுள்ளதோ, ஹஜ் யாத்திரையும் அதே கதியை அனுபவிக்கும் வகையில் செய்யப்பட்டுள்ளது.

ஒவ்வொரு ஆண்டும் மில்லியன் கணக்கான முஸ்லிம்கள் மக்காவுக்குச் சென்று, இஸ்லாத்தின் புனித ரஸூலுல்லாஹி (ஸல்) அவர்கள், நபி இப்ராஹீம் (அலை) அவர்கள், நபி இஸ்மாயில் (அலை) அவர்கள் மற்றும் அன்னை ஹாஜரா (அலை) போன்ற புனிதர்களின் கால்தடங்களில் கால் பதிக்கின்றனர். இருப்பினும், இப்ராஹிம் (அலை) யார்? முகமது (ஸல்) யார்? அவர்கள் என்ன செய்தார்கள்? அவர்களின் நோக்கம் மற்றும் குறிக்கோள் என்ன? அவர்கள் எங்களிடமிருந்து என்ன எதிர்பார்க்கிறார்கள்? என்று நாம் ஒருபோதும் கேள்வியெழுப்புவதும் இல்லை, சிந்திப்பதும் இல்லை.

நிச்சயமாக, ஒர் உயிர் துடிப்பற்ற ஹஜ், இயக்கம் அற்ற ஹஜ், ஒற்றுமையை வெளிப்படுத்தாத ஹஜ் மற்றும் இஸ்லாத்தின் எதிரிகளது சூழ்ச்சிகளை அழிக்க அழைப்பு விடுக்காத ஹஜ் உண்மையான ஹஜ் யாத்திரை அல்ல.

சுருக்கமாக கூறின், அனைத்து முஸ்லிம்களும் ஹஜ்ஜின் உண்மையான தாத்பரியங்களின்பால் கவனம் செலுத்த வேண்டும், குர்ஆன் போதனைகளை வாழ்க்கை முறையாக ஆக்கிக்கொள்ள முயற்சிக்க வேண்டும், மேலும் இவை இரண்டும் உயிரோட்டம் பெற வேண்டும்.

- தாஹா முஸம்மில்