மனித உரிமைகள் என்ற உன்னதமான கருத்தைப் பாதுகாப்பதில் அமெரிக்கா இரட்டை நிலைப்பாட்டைக் கடைப்பிடிக்கிறது

Brothers in crime

இஸ்ரேலின் அதிவலது பிரதமருடன் நீண்டகாலமாக கருத்து வேறுபாடுகள் இருந்தபோதிலும், அமெரிக்க ஜனாதிபதி ஜோ பைடன் பெஞ்சமின் நெதன்யாகு நிர்வாகத்தின் போர்க்குற்றங்களுக்குப் பின்னால் அமெரிக்காவின் முழு உறுதியாக நின்றிருந்தார்.

காஸா நெருக்கடியை வெளிப்படுத்துவதற்கு முன்பு, நெதன்யாகு வாஷிங்டனுக்குச் சென்று ஜனாதிபதி பைடனை சந்தித்து கைகுலுக்க கனவு கண்டார், அவரும் இஸ்ரேலிய பிரதமருக்கு தனது வெறுப்பைக் காட்ட ஆர்வமாக இருந்தார்.

மிகவும் தீவிரவாத இஸ்ரேலிய அரசியல்வாதிகளான இடாமர் பென்-க்விர் மற்றும் பெசலேல் ஸ்மோட்ரிச் ஆகியோருடன் இணைந்து செயல்படுவதில் தீவிரமாக இருந்த நெதன்யாகுவின் சுயநல நடவடிக்கைக்காக அவரை ஒதுக்கி வைப்பதில் பைடன் நிர்வாகத்தில் உள்ள பல அதிகாரிகள் திருப்தி அடைந்தனர்.

பென்-க்விர் தேசிய பாதுகாப்பு அமைச்சராகவும், ஸ்மோட்ரிச் நெதன்யாகுவின் தலைமையின் கீழ் அமைக்கப்பட்ட இஸ்ரேலின் வரலாற்றில் மிகவும் தீவிர வலதுசாரி அரசாங்கத்தில் நிதியமைச்சராகவும் உள்ளனர். இரண்டு தீவிரவாத அரசியல்வாதிகளும் அல்-குத்ஸில் (ஜெருசலேம்) முஸ்லிம் புனிதங்களை இழிவுபடுத்துவதில் அல்லது மேற்குக் கரையில் உள்ள பாலஸ்தீன கிராமங்களை இனரீதியாக சுத்தப்படுத்த முயற்சிப்பதில் தங்கள் ஆத்திரமூட்டும் நகர்வுகளுக்கு பெயர் பெற்றவர்கள்.  பாலஸ்தீன எதிர்ப்புக் குழுக்கள் அக்டோபர் 7 தாக்குதல்களைத் தொடங்குவதற்கு முன்பு இந்த நகர்வுகள் மேற்கொள்ளப்பட்டன.

எவ்வாறெனினும், பைடன் நிர்வாகம் அக்டோபர் 7 அன்று இதையெல்லாம் மறந்து, முற்றுகையிடப்பட்ட காஸா முனைக்கு எதிரான இஸ்ரேலிய இனப்படுகொலை பிரச்சாரத்தை கண்மூடித்தனமாக ஆதரித்தது, இது இஸ்ரேலின் போர்க்குற்றங்களுக்கு திடுக்கிடும் ஆதரவை வழங்கியது என்று அம்னெஸ்டி இன்டர்நேஷனலின் சமீபத்திய அறிக்கை தெரிவிக்கிறது.

"எங்கள் ஆய்வுகள் இஸ்ரேலின் குண்டுவீச்சு பிரச்சாரத்தில் போர்க்குற்றங்கள் பற்றிய திடுக்கிடும் ஆதாரங்களை சுட்டிக்காட்டுகிறது, அவை அவசரமாக விசாரிக்கப்பட வேண்டும். பல தசாப்தங்களாக தண்டனையில் இருந்து தப்பி மற்றும் அநீதி தற்போதைய தாக்குதலின் முன்னெப்போதும் இல்லாத அளவு இறப்பு மற்றும் அழிவு ஆகியவை இஸ்ரேல் மற்றும் ஆக்கிரமிக்கப்பட்ட பாலஸ்தீன பிரதேசங்களில் மேலும் வன்முறை மற்றும் ஸ்திரமின்மைக்கு மட்டுமே வழிவகுக்கும்" என்று மனித உரிமைகள் குழுவின் பொதுச் செயலாளர் அக்னேஸ் காலமார்ட் கூறினார்.

அக்டோபர் 7 தாக்குதலுக்குப் பின்னர் உடனடியாக இஸ்ரேலுக்கான அமெரிக்க ஆதரவு வெளிப்பாடுகள் குவியத் தொடங்கின. வெறும் வெளிப்பாடுகள் மட்டுமல்ல, குண்டுகள், ஏவுகணைகள், உளவுத்துறை உதவிகள் மற்றும் அனைத்தும் இஸ்ரேல் அதன் இனப்படுகொலை பிரச்சாரத்தை முன்னெடுத்துச் செல்ல உதவியது. 1948, 1967 அல்லது பாலஸ்தீனத்தின் பாதுகாப்பற்ற மக்களுக்கு எதிரான முடிவில்லாத இஸ்ரேலின் ஒடுக்குமுறையின் பிற நிலையங்களில் அல்ல, அக்டோபர் 7 அன்று வரலாறு தொடங்கியது போல இருந்தது.

இஸ்ரேலுக்கான அமெரிக்காவின் ஆதரவு மிகவும் குருட்டுத்தனமாகவும் கொடூரமாகவும் இருந்தது, இது பைடன் நிர்வாகம் உட்பட உலகெங்கிலும் உள்ள பலரை அதிர்ச்சிக்குள்ளாக்கியது; இஸ்ரேலில் தீவிர வலதுசாரி அரசியல்வாதிகளால் மனித உரிமைகளின் சுய பிரகடனப் போராளி எவ்வாறு சமநிலையிலிருந்து தூக்கி எறியப்படுகிறார்; காஸா முனையின் இனச்சுத்திகரிப்பை ஏற்றுக் கொள்ளுமாறு மேற்கு ஆசிய பிராந்தியத்தின் உயர்மட்ட அமெரிக்க இராஜதந்திரி தனது தலைவர்களை எப்படி மிரட்டுகிறார், இது மிகவும் தீவிர வலதுசாரி இஸ்ரேலிய அரசியல்வாதிகளின் நீண்டகால விருப்பமாகும்; மருத்துவமனைகள், தேவாலயங்கள், மசூதிகள் மற்றும் ஐ.நா நடத்தும் பள்ளிகளை எல்லாம் இஸ்ரேல் ஒரு பொருட்டாகவே கருதவில்லை.

மனித உரிமைகள் என்ற உன்னதமான கருத்தைப் பாதுகாப்பதில் அமெரிக்கா இரட்டை நிலைப்பாட்டைக் கடைப்பிடிக்கிறது என்பதை மிகத் தெளிவாக உணர்த்தியுள்ளது. தமது நயவஞ்சக போக்கை மேற்கு ஆசிய பிராந்தியத்தில் உள்ள தலைவர்கள் உட்பட மில்லியன் கணக்கான மக்களை நம்ப வைப்பதிலேயே இப்போது வெற்றி பெற்றுள்ள பைடன் நிர்வாகத்தின் கண்காணிப்பின் கீழ் இவை அனைத்தும் நடந்தேறின. அப்பிராந்தியத்தில் உள்ள பல அமெரிக்க நட்பு நாடுகள் விமர்சகர்களிடம் 'நாங்கள் அப்படிச் சொன்னோம்' என்று புகழ்ந்து பேசுவதும், அமெரிக்கா தனது அரபு நட்பு நாடுகள் வெவ்வேறு கொள்கைகளைப் பின்பற்றும்போது தனது சொந்த நலன்களை முன்னெடுப்பதற்கான ஒரு அரசியல் கருவியாக மனித உரிமைகளைப் பயன்படுத்துகிறது என்பதும் தற்செயலானது அல்ல.

பிராந்தியத்தில் உள்ள பலருக்கு, இஸ்ரேல் அமெரிக்காவின் உண்மையான சொரூபத்தை, அதன் இயல்பைக் காட்டியுள்ளது, இது நன்மையை விட தீமைக்கான ஒரு சக்தியாகும்.  காலம் செல்லச் செல்ல இது தெளிவாகிறது, காஸா மீது இஸ்ரேலின் பாரிய குண்டுவீச்சின் கீழ் காஸா குழந்தைகள் தொடர்ந்து இறக்கின்றனர். காஸா பாதிக்கப்பட்டுள்ள நிலையில், அமெரிக்காவால் ஒருபோதும் தார்மீக உயரத்தை தொட முடியாது.

பைடன் நிர்வாகம் இஸ்ரேலுக்கு அளித்து வரும் ஆதரவு ஏற்கனவே அமெரிக்காவை பாதிக்கத் தொடங்கியுள்ளது. எதிர்ப்பு முன்னணியுடன் இணைந்த ஒரு சைபர் குழு, தேசிய பாதுகாப்பு பணியகத்தின் தளபதி ஜெனரல் டேனியல் ஆர். ஹோகன்சனுக்கும் இந்த அமைப்பின் மூத்த தளபதிகளில் ஒருவருக்கும் இடையில் இடம்பெற்ற மிக முக்கியமான மற்றும் தீர்க்கமான கடிதத்தொடர்பைப் பெற முடிந்தது, இது அமெரிக்க இராணுவ அமைப்புகளுக்குள் இருந்து ஒரு முக்கியமான உண்மையை வெளிப்படுத்துகிறது என்று தஸ்னிம் செய்தி நிறுவனம் தெரிவித்துள்ளது.

தஸ்னிம் செய்தி நிறுவனத்தின் கூற்றுப்படி, இஸ்ரேலியர்களுக்கு எதிரான ஹமாஸின் நடவடிக்கையான அல்- அக்ஸா புயலுக்குப் பிறகு, அமெரிக்க பாதுகாப்பு செயலாளர் லாயிட் ஆஸ்டின் உட்பட பல அமெரிக்க அதிகாரிகள் இஸ்ரேலிய இராணுவத்தை முழுமையாக ஆதரிப்பதாக அறிவித்தனர்.

இந்த அறிவிப்பைத் தொடர்ந்து, ஜெனரல் டேனியல் ஹோகன்சன் அக்டோபர் 9 அன்று ஹமாஸைக் கண்டித்ததோடு, அமெரிக்க தேசிய காவல்படை இஸ்ரேலியர்களுடன் நிற்கிறது மற்றும் இந்த கடினமான சூழ்நிலையில் அவர்களுக்கு ஆதரவளிக்கிறது என்று கூறினார்.

அமெரிக்க தேசிய காவல்படை பெரும்பாலும் உள்நாட்டு பணிகளில் ஈடுபட்டாலும், சியோனிச ஆட்சிக்கு கள ஆதரவை வழங்க தயாராக இருப்பதாக பணியகம் அறிவித்தது.

ஆனால் எதிர்ப்பு முன்னணியுடன் இணைந்த ஒரு சைபர் குழு ஹோகன்சனுக்கும் இந்த அமைப்பின் மூத்த தளபதிகளில் ஒருவருக்கும் இடையே இடம்பெற்ற மிக முக்கியமான ஒரு கடிதத்தொடர்பைப் பெற்றுள்ளது, இது அமெரிக்க இராணுவ அமைப்புகளுக்குள் இருந்து ஒரு முக்கியமான உண்மையை வெளிப்படுத்துகிறது. அமெரிக்க தேசிய பாதுகாப்புப் படையின் உள் செய்தி அமைப்புகளில் ஒன்றிலிருந்து இந்த கடிதப் போக்குவரத்து பெறப்பட்டது.

அக்டோபர் 13 அன்று அமெரிக்க தேசிய பாதுகாப்புப் படையின் தளபதிக்கும் பணியகத்தின் மூத்த தளபதிகளில் ஒருவருக்கும் இடையிலான ஒரு நிர்வாக கடிதத்தில், ஹோகன்சன் இவ்வாறு எழுதினார், "இஸ்ரேல் எமக்கு எதிரானவர்கள் என்றும் அவர்களுக்காக (இஸ்ரேலியர்களுக்காக) தங்கள் உயிரைக் கொடுக்க நாம் தயாராக இல்லை என்றும் வெளிப்படையாகக் கூறும் (அமெரிக்க) துருப்புக்களிடையே யூத-விரோதம் அதிகரித்து வருகிறது".

(தமிழில்: தாஹா முஸம்மில்)

https://www.tehrantimes.com/news/490437/Brothers-in-Crimes