அமெரிக்க மாணவர்களை இழிவுபடுத்திய நெட்டன்யாஹுவின் உரையை காங்கிரஸ் உறுப்பினர்கள் கரகோஷம் செய்து வரவேற்பு

Bibi's lies and delusions

A look at Netanyahu's controversial address to U.S. Congress amid the Gaza war

By Mona Hojat Ansari

நெதன்யாகுவின் சர்ச்சைக்குரிய அமெரிக்க காங்கிரஸில் உரையின் ஒரு பார்வை

Pix: Al-Jazeera

கடந்த பத்து மாதங்களில் 40,000க்கும் மேற்பட்ட பாலஸ்தீனியர்களின் மரணத்திற்கு காரணமான இஸ்ரேலிய பிரதம மந்திரி பெஞ்சமின் நெதன்யாகுவுக்கு வியாழன் 25/07/2024 அன்று, அமெரிக்க காங்கிரஸ் உறுப்பினர்கள் பலமுறை எழுந்து நின்று கரகோஷம் செய்ததை உலகம் அதிர்ச்சியுடன் நோக்கியது.

காங்கிரஸ் சபாநாயகர் மைக் ஜான்சன் "அவரது மாண்புமிகு பெஞ்சமின் நெதன்யாகுவை" சட்டசபையில் உரையாற்ற அழைத்தபோது, ​​ஆயிரக்கணக்கான எதிர்ப்பாளர்கள் காங்கிரஸ் கட்டிடத்திற்கு வெளியே கூடி, இரத்தக் கறை படிந்த நெதன்யாகுவின் உருவங்களைக் காட்டியும், பாலஸ்தீனியக் கொடிகளை அசைத்தும், "பாலஸ்தீனத்தை விடுவி" என்று கோஷமிட்டனர்.

காங்கிரஸிற்குள், வெளிநாட்டில் இருந்து வந்திருக்கும் தலைவரை அவமதிக்க யாரும் துணியவில்லை. ஒருவேளை சபாநாயகர் ஜான்சன் செனட்டர்கள், பிரதிநிதிகள் மற்றும் விருந்தினர்களை (எதிர்த்து எதுவும் செய்ய வேண்டாம் என்று) கருத்து வேறுபாட்டின் வெளிப்பாடுகள் கைதில் முடியலாம் என்று முன்கூட்டியே எச்சரித்தீர்க்கலாம்,

ரஃபாவில் பொதுமக்களின் உயிரிழப்புகள் என்றும் "நடைமுறையில் கிடையாது",  என்றும் - காஸாவில் பெண்கள் மற்றும் குழந்தைகளை கொல்லும் - இஸ்ரேலிய வீரர்கள் எவ்வளவு "வீரம்" பொருந்தியவர்கள் என்றும் மற்றும் மனிதகுலத்திற்கு எதிரான குற்றங்களுக்காக ஆட்சியையும் அதன் அதிகாரிகளையும் தண்டிக்க சர்வதேச குற்றவியல் நீதிமன்றத்திற்கு எந்த உரிமையும் கிடையாது என்றும் காங்கிரஸில் ஒரு மணிநேரம் பேசுவதற்கு பிரதமரை அனுமதித்தது.

Pix: Reuters

காஸா போரைக் கண்டித்தும், இஸ்ரேல் அங்கிருந்து வெளியேறக் கோரியும் அமெரிக்க பல்கலைக்கழக மாணவர் போராட்டக்காரர்களை நெதன்யாகு கடுமையாகச் சாடினார். மாணவர்கள் ஈரானுக்கு "பயனுள்ள முட்டாள்கள்" என்று குற்றம் சாட்டிய அவர், போராட்டங்களை நடத்துவதற்கு ஈரானிய அரசாங்கத்தால் பணம் வழங்கப்படுகிறது என்றும் கூறினார்.

இஸ்ரேலிய தலைவரின் குற்றச்சாட்டு அமெரிக்க மாணவர்கள் மற்றும் பேராசிரியர்கள் மத்தியில் கடும் சீற்றத்தைத் ஏற்படுத்தியுள்ளது. நெத்தன்யாகுவின் கருத்துக்கள் சுதந்திரம், பேச்சுரிமை மற்றும் எதிர்ப்பு உரிமை ஆகியவற்றையும் தாக்கி அமெரிக்கர்களின் புத்தியை இழிவுபடுத்தும் ஒரு மோசமான செயலாகக் கருதப்பட்டது.

“இஸ்ரேல் போர்க்குற்றங்களைச் செய்கிறது என்பதை உலகறியும், அது "இரு நாடுகள்" என்ற தீர்வைத் தடுக்கிறது, அமைதியைத் தடுக்கிறது என்று அமெரிக்க மக்களுக்கு வெளிநாட்டு அரசாங்கம் ஒன்று சொல்லித்தான் புரிய வேண்டும் என்ற தேவையில்லை. சர்வதேச சட்டத்தின் இந்த அப்பட்டமான மற்றும் மிருகத்தனமான மீறல்களில் அமெரிக்க அரசாங்கம் இஸ்ரேலுடன் உடந்தையாக உள்ளது என்று அவர்களுக்கு வெளிநாட்டு அரசாங்கங்கள் சொல்ல தேவையில்லை,” என்று கொலம்பியா பல்கலைக்கழகத்தின் பேராசிரியரான ஜெஃப்ரி சாக்ஸ் தெஹ்ரான் டைம்ஸிடம் கூறினார்.

"அமெரிக்கர்களின் எதிர்ப்புகளுக்குப் பின்னால் ஈரான் இருக்கிறது” என்று நெதன்யாகு ஓர் அப்பட்டமான பொய்யையும் அவதூறையும் செய்துள்ளார். இனப்படுகொலைக்கு எதிரான நெறிமுறை மதிப்புகளைக் கொண்ட கண்ணியமான அமெரிக்கர்களே உண்மையான எதிர்ப்பாளர்கள். அவர்களில் யூதர்கள், கிறிஸ்தவர்கள், முஸ்லிம்கள் மற்றும் பலர் அடங்குவர்” என்று அவர் மேலும் கூறினார்.

ஈரான், காஸா மற்றும் நெதன்யாகுவின் அபார கற்பனை

நெத்தன்யாகுவின் உரையில் அப்பட்டமான பொய்கள் மற்றும் இஸ்ரேலை பாதிக்கப்பட்ட நாடாக சித்தரிக்கும் முயற்சிகளில் இருந்து வேறுபடுத்திக் காட்டும் அம்சங்கள், போருக்குப் பிந்தைய காஸாவிற்கான அவரது திட்டங்கள் மற்றும் "பரந்த மத்திய கிழக்கு" பற்றிய அவரது பார்வை பற்றிய அவரது அறிவிப்புகள் மட்டுமே ஆகும்.

காஸாவில் "முழு வெற்றி" என்று சபதம் செய்த பிறகு, நெதன்யாகு இஸ்ரேல் ஹமாஸை தோற்கடித்தவுடன், "பயங்கரவாதத்தின் மீள் எழுச்சியைத் தடுக்க" மற்றும் "காஸா மீண்டும் இஸ்ரேலுக்கு அச்சுறுத்தலை ஏற்படுத்தாது" என்பதை உறுதிப்படுத்துவதற்காக, காஸா மீது முழு கட்டுப்பாட்டையும் கைப்பற்றும் என்று கூறினார்.

Pix: Ynetnews

ஆய்வாளர்கள் மற்றும் கருத்துடன் கவனிப்போர் ஏற்கனவே நெத்தன்யாகுவின் திட்டங்களின் சாத்தியக்கூறுகளை கேள்விக்குள்ளாக்கி உள்ளனர். இஸ்ரேல் காஸாவில் ஒரு பெரிய இராணுவ பிரசன்னத்தை பராமதிப்பதன் நடைமுறைச் சாத்தியமற்ற தன்மையை அவர்கள் சுட்டிக்காட்டுகின்றனர்.

“இது ஒரு புதிய திட்டம் அல்ல. இஸ்ரேல் இதற்கு முன்பும் காஸாவில் இராணுவப் பிரசன்னத்தைத் தக்கவைக்க முயன்றது, ஆனால் இறுதியில் 2005 இல் படைகளைத் திரும்பப் பெற நேர்ந்தது, ஏனெனில் அவர்களின் நோக்கத்தை அடைய முடியாது என்று புரிந்து கொண்டதால், ”என்று மேற்கு ஆசிய விவகாரங்களில் பணிபுரியும் நிபுணரும் ஆய்வாளருமான அலி சமட்சாதே விளக்கினார். "எதிர்ப்புப் அணியினரின் திறன்களில் ஏற்பட்டுள்ள குறிப்பிடத்தக்க முன்னேற்றங்கள், காஸாவில் நடைபெற்று வரும் போரில் 10 மாதங்கள் கழிந்த நிலையில் இஸ்ரேலிய இராணுவம் தீவிர சோர்வுடன் உள்ளது, இது வெற்றிகரமான இராணுவ மறுஆக்கிரமிப்பு நிகழ்தகவை வெகுவாகக் குறைக்கிறது."

\காஸா மீதான எந்தவொரு மறு ஆக்கிரமிப்பும் விடுதலைப் பிரிவுகளை பலவீனப்படுத்துவதற்குப் பதிலாக இஸ்ரேலிய இராணுவம் மற்றும் சமூகத்திற்குள் தான் நெருக்கடிகளை ஆழமாக்கும் என்று சமட்சாதே மேலும் கூறினார். “காஸாவில் 15,000 இஸ்ரேலிய வீரர்கள் காயமடைந்துள்ளதாக பல்வேறு அறிக்கைகள் காட்டுகின்றன. ஆட்சியின் இராணுவம் மிகவும் குறுகிய சேவகர் எண்ணிக்கையைக் கொண்டு இருப்பதால், அதை சரிசெய்ய பல நடவடிக்கைகளை எடுக்க வேண்டி உள்ளது. இஸ்ரேலின் இப்போதைய பொருளாதார மற்றும் சமூக அவலங்கள் மத்தியில் அந்த பகுதியில் இராணுவ இருப்பை மீண்டும் நிலைநிறுத்துமாயின் அவலங்கள் மேலும் தீவிரமடையும்”.

நெதன்யாகு தனது அரசாங்கத்தை பராமரிக்க நம்பியிருக்கும் ஆர்த்தடாக்ஸ் ஹரேடி யூதர்கள் பாரம்பரியமாக இராணுவ சேவையில் இருந்து விலக்கு பெற்றுள்ளனர். ஆளும் கூட்டணியின் கடும் எதிர்ப்பையும் மீறி, இஸ்ரேலின் உச்ச நீதிமன்றம் ஜூன் மாதம் ஹரேடிஸை இராணுவ சேவையில் சேர்க்க உத்தரவிட்டது. கணிசமான எண்ணிக்கையிலான இஸ்ரேலிய ரிசர்வ் படையினர் கடந்த மாதங்களில் பலமுறை ராணுவத்திற்கு அழைக்கப்பட்டதை அடுத்து இந்த முடிவு வெளிவந்தது. பழமைவாத யூதர்கள் இஸ்ரேலிய இராணுவத்தில் பணியாற்றுவதில் இருந்து விலக்கு அளிக்கப்பட்டதற்கு அவர்கள் எதிர்ப்புத் தெரிவித்தனர்.

நெதன்யாகு காசாவின் மறு-ஆக்கிரமிப்பைப் பின்பற்றும் இரண்டாவது திட்டத்துடன் "வளர்ந்து வரும் ஈரானிய அச்சுறுத்தலை" சமாளிக்க ஒரு பிராந்திய கூட்டணியை உருவாக்குவது.பற்றிய திட்டத்தையும் தனதுரையில் கோடிட்டுக் காட்டினார்,

“இஸ்ரேலுடன் சமாதானமாக இருக்கும் அனைத்து நாடுகளும் மற்றும்  இஸ்ரேலுடன் சமாதானம் செய்து கொள்ளும் அனைத்து நாடுகளும் இந்தக் கூட்டணியில் சேர அழைக்கப்பட வேண்டும். அந்த சாத்தியமான கூட்டணியின் முக்கியத்துவத்தை ஏப்ரல் 14 அன்று கண்டோம். அமெரிக்காவின் தலைமையில், ஈரானினால் எம்மீது ஏவப்பட்ட நூற்றுக்கணக்கான ஏவுகணைகள் மற்றும் ட்ரோன்களை தடுக்க இஸ்ரேலுடன் சில அண்டை (அரபு) நாடுகள் இணைந்து செயல்பட்டன,” என்றார்.

நெதன்யாகு ஏற்கனவே பிராந்திய சக்திகளால் விவாதிக்கப்பட்ட ஒரு திட்டத்தைப் பற்றி இங்கு பேசுவது போல் தெரிகிறது. அறிக்கைகளின்படி, இஸ்ரேலிய இராணுவத்தின் தலைமைத் தளபதி ஹெர்சி ஹலேவி பஹ்ரைன் தலைநகர் மனாமாவில் பல அரபு நாடுகளைச் சேர்ந்த மூத்த ஜெனரல்களை அமெரிக்க சென்ட்காமின் அனுசரணையில் ஜூன் மாதம் சந்தித்தார். பஹ்ரைன், ஐக்கிய அரபு எமிரேட்ஸ், சவுதி அரேபியா, ஜோர்டான் மற்றும் எகிப்து ஆகிய நாடுகளின் ராணுவ அதிகாரிகள் குறிப்பிட்ட கூட்டத்தில் பங்கேற்றதாக கூறப்படுகிறது.

மனாமா அமர்வின் நிகழ்ச்சி நிரல் குறித்து உத்தியோகபூர்வ அறிக்கைகள் அல்லது அறிவிப்புகள் எதுவும் வெளியிடப்படவில்லை, ஆயினும் ஆய்வாளர்கள் இஸ்ரேல் மற்றும் அமெரிக்காவால் விவாதிக்கப்பட்ட  தலைப்புகளில் ஈரானும் ஒன்று என்று நம்புகின்றனர்.

"ஈரானுக்கு எதிரான பிராந்திய கூட்டணியின் யோசனையும் புதிய விடயம் ஒன்றல்ல. இஸ்ரேலிய பங்கேற்புடன் 'அரபு நேட்டோ' ஒன்றை அமைப்பதை வாஷிங்டன் சில காலமாக பரிசீலித்து வருகிறது. எவ்வாறாயினும், இஸ்ரேல் மற்றும் அமெரிக்கா ஆகிய இரண்டினதும் இந்த உடன்படிக்கையை அரபு நாடுகள் ஆரம்பத்தில் ஆதரித்தன என்பதை நினைவில் கொள்ள வேண்டும், ஏனெனில் அவர்கள் இஸ்ரேலை பிராந்தியத்தின் இராணுவ சக்தியாக அப்போது கருத்தியிருந்தார்கள். அக்டோபர் 7 சம்பவம் மற்றும் ஈரானின் பத்தில்தாக்குதல் நிகழ்வுகளைத் தொடர்ந்து நிலைமை மாறியுள்ளது. முன்பிருந்த நிலை மீதான அவர்களின் நம்பிக்கை சந்தேகத்திற்கு இடமின்றி குறைந்துவிட்டது,” என்று சமட்சாதே குறிப்பிட்டார்.

ஈரானுக்கு எதிராக ஒரு பிராந்திய கூட்டணி உருவானாலும் கூட, அரபு நாடுகள் அக்கூட்டணியிடம் அதிக சலுகைகளை கோரும் மற்றும் அதில் அவர்களின் ஈடுபாட்டை குறைக்கும் "(அமையக்கூடிய) அத்தகைய கூட்டணி நீண்ட காலத்திற்கு நிலைக்க முடியாததாக இருக்கும்," என்பதுவே நிபுணரின் கணிப்பு.

https://www.tehrantimes.com/news/501610/Bibi-s-lies-and-delusions

இஸ்லாமிய உலகின் தலையாய பிரச்சினை காஸா: இமாம் காமனேயி

Gaza still Islamic world’s number one issue: Leader

பன்னிரண்டாவது ஈரானிய பாராளுமன்றத்தின் சபாநாயகர் மற்றும் உறுப்பினர்களுடனான ஞாயிற்றுக்கிழமை இடம்பெற்ற சந்திப்பில், இஸ்லாமிய புரட்சியின் தலைவர் காஸா பிரச்சனையை இஸ்லாமிய உலகின் தலையாய பிரச்சினையாக வலியுறுத்தினார்.

ஜூலை 21, 2024 அன்று இமாம் கொமெய்னி ஹுசைனியாவில் நடைபெற்ற சந்திப்பின் போது, ​​சட்டமியற்றலில் பாராளுமன்றத்தின் கடமைகள் மற்றும் அதன் செயற்பாட்டில் செய்ய வேண்டியவை மற்றும் செய்யக்கூடாதவை தொடர்பான முக்கிய விஷயங்களை தலைவர் தெளிவுபடுத்தினார், அதே நேரத்தில் அரசாங்க கிளைகளுக்கிடையேயான ஆக்கபூர்வமான  தொடர்பாடலின் முக்கியத்துவத்தையும் வலியுறுத்தினார். நாட்டின் தூண்ககளாக இருக்கும் இவற்றின் ஒன்றுபட்ட குரலின் அவசியத்தையும் அவர் எடுத்துரைத்தார் மற்றும் ஈரானின் வெளியுறவு மற்றும் வெளியுறவுக் கொள்கையில் பாராளுமன்றத்தின் தற்போதைய நிலை மற்றும் அதன் குறிப்பிடத்தக்க பங்கை அடிக்கோடிட்டுக் காட்டினார்.

சர்வதேச விவகாரத் துறையில் பாராளுமன்றத்தின் குறிப்பிடத்தக்க திறன்களை சுட்டிக்காட்டி, இமாம் காமனேயி , "பாராளுமன்றம் என்பது உலக அரசாங்கங்கள் தங்கள் தொடர்புகளில் பயன்படுத்தும் ஒரு சக்திவாய்ந்த நெம்புகோலாகும்" என்று கூறினார். வெளியுறவுத் துறையில் பாராளுமன்றத்தின் செயல்பாடுகளுக்கு உதாரணமாக காஸா பிரச்சினையை அவர் கருதினார் மற்றும் இதற்காக பணியாற்றுவதன் முக்கியத்துவத்தை வலியுறுத்தினார். “இஸ்லாமிய உலகின் முதல் பிரச்சினையாக காஸா உள்ளது. [2023 காஸா போருக்குப் பிறகு] மாதங்கள் பல கடந்துவிட்டதால், ஆரம்ப உற்சாகம் பலரிடம் குறைந்துவிட்டது என்பது உண்மைதான், எனினும், யதார்த்தம் என்னவென்றால், அது தொடக்கத்தில் இருந்ததைப் போலவே இன்றும் முக்கியமானது,” என்று அவர் வலியுறுத்தினார்.

உலகெங்கிலும் உள்ள அரசாங்கங்கள் பாராளுமன்ற ஆதரவைப் பயன்படுத்துவதை ஒரு பொதுவான நடைமுறையாக இஸ்லாமியப் புரட்சியின் தலைவர் விவரித்தார்: "ஓர் உதாரணம் விரிவான ஈரான் தடைகள், பொறுப்புக்கூறல் மற்றும் விலக்கு சட்டம் (CISADA), இது அமெரிக்க காங்கிரஸால் நிறைவேற்றப்பட்டது மற்றும் ஒரு நயவஞ்சகமான அப்போதைய ஜனநாயக ஜனாதிபதியால் கையெழுத்திடப்பட்டது."

பொருளாதாரத் தடைகள் மற்றும் அவற்றை நடுநிலையாக்குவதில் பாராளுமன்றத்தின் பங்கு குறித்து இமாம் காமனேயி எடுத்துரைத்தார். "கௌரவமான வழிமுறைகள் மூலம் பொருளாதாரத் தடைகளை நீக்குவதற்கும், அவற்றை சமநிலைப்படுத்துவதன் மூலம் அதை மிஞ்சும் திறன் எங்களிடம் உள்ளது. இந்த தடைகளை சமநிலைப்படுத்துவது நம் கைகளில் உள்ளது மற்றும் இதைச் செய்வதற்கான சரியான வழிகள் உள்ளன. இந்த விஷயத்தில் பாராளுமன்றமும் ஒரு முக்கிய பங்கை வகிக்க முடியும்.

அரசாங்கத்தின் கிளைகளுக்கிடையேயான ஒத்துழைப்பு மற்றும் ஆக்கபூர்வமான தொடர்பு என்பது இஸ்லாமியப் புரட்சித் தலைவர் தனது உரையில் சுட்டிக்காட்டிய மற்றொரு முக்கிய அம்சமாகும். "அமைப்பின் வெவ்வேறு தூண்கள் ஓர் ஒத்திசைவான அலகை உருவாக்க வேண்டும், இந்த இலக்கை அடைவதற்கு தொடர்பாடல், ஒத்துழைப்பு மற்றும் சில நேரங்களில் நெகிழ்வுத்தன்மை மற்றும் [சிறிய முரண்பாடுகளை] பெரிதுபடுத்தாமல் இருப்பது கூட தேவைப்படுகிறது," என்று அவர் கூறினார்.

இஸ்லாமியப் புரட்சித் தலைவர், நாட்டின் அதிகாரிகள் மற்றும் அரசியல்வாதிகளின் விழிப்புணர்வைப் பற்றிய ஒரு முக்கியமான விஷயத்தை இதன்போது வலியுறுத்தினார். "அனைத்து ஈரானியர்களின் பொது எதிரியின் சைபர் இராணுவம் நாட்டில் போட்டியாளர்களாகவும் அரசியல் பிரிவுகளாகவும் மாறுவேடமிட்டு, ஈரானியர்களின் நம்பிக்கைக்குரிய மத மற்றும் அரசியல் பிரமுகர்களை அவமதித்து கோபமூட்டி மற்றும் எதிர் தரப்பை பதிலளிக்க தூண்டும் விதமாக செயல்படுகிறது என்பதை நாங்கள் அறிவோம். எனினும், சைபர்ஸ்பேஸில் நீங்கள் பார்க்கும் அனைத்தும் உங்கள் அரசியல் போட்டியாளர்களின் வேலை என்று நீங்கள் கருதக்கூடாது.”

திரு. பெசெஷ்கியானினால் முன்மொழியப்படும் அமைச்சரவை தொடர்பான அவசர 'நம்பிக்கை வாக்கெடுப்பை' முன்னிலைப்படுத்தி தலைவர், சட்டமியற்றுபவர்கள் மற்றும் தேர்ந்தெடுக்கப்பட்ட ஜனாதிபதி ஆகிய இரு தரப்பினருக்குமே இந்த விவகாரத்தில் குறிப்பிடத்தக்க பொறுப்புகள் இருப்பதாகச் சுட்டிக்காட்டிய அவர், தேவையான நடைமுறைகளை நிறைவுசெய்த பின்னர் உடனடியாக அமைச்சரவையை நியமிப்பது பயனுள்ளது மற்றும் அத்தியாவசியமானது என்று அவர் கருதினார்.

14வது நிர்வாகத்தின் அமைச்சர்களுக்கு தேவையான குணங்கள் மற்றும் தகுதிகளை இமாம் காமனேயி விவரித்தார். "நம்பகமான, நேர்மையான, மதம் மற்றும் இஸ்லாமிய குடியரசில் ஆழ்ந்த ஈடுபாடு கொண்ட நபர்களை நாம் தேர்ந்தெடுக்க வேண்டும்," என்றார்.

அவர் மேலும் கூறுகையில், “நம்பிக்கை (ஈமான்) ஒரு முக்கியமான குறிகாட்டியாகும். எதிர்காலத்தைப் பற்றி நம்பிக்கையுடன் இருப்பது மற்றும் நேர்மறையான பார்வை மற்றும் கண்ணோட்டம் ஆகியவை மற்ற முக்கியமான குறிகாட்டிகளாகும். இருண்ட வாய்ப்புகள் மற்றும் எதுவும் செய்ய முடியாது என்று நம்புபவர்களுக்கு முக்கியமான மற்றும் முக்கிய பொறுப்புகளை ஒப்படைக்க முடியாது.

இஸ்லாமியச் சட்டங்களைப் பின்பற்றுதல், நேர்மை மற்றும் ஒருமைப்பாடு, பெரும் குற்றச்சாட்டுக்கள் இல்லாமை, தேசியப் பார்வையைக் கொண்டிருத்தல், அரசியல் மற்றும் கோஷ்டிப் பிரச்சினைகளில் மூழ்குவதைத் தவிர்த்தல் மற்றும் 14வது அமைச்சரவையின் உறுப்பினர்களுக்கான கூடுதல் முக்கியத் தேவைகளாகத் திறமை ஆகியவற்றை அவர் பட்டியலிட்டார். தேர்ந்தெடுக்கப்பட்ட ஜனாதிபதியும் பாராளுமன்றமும் நாட்டின் அதிகாரிகளைத் தேர்ந்தெடுப்பதில் கூட்டுப் பொறுப்பைப் பகிர்ந்துகொள்வதால், இந்த அளவுகோல்களைக் கடைப்பிடிக்க வேண்டும் என்று இமாம் காமனேயி மேலும் கூறினார்.

இந்த அளவுகோல்களைப் பின்பற்றுவதன் மூலமும், ஜனாதிபதி மற்றும் பாராளுமன்றம் பகிர்ந்து கொள்ளும் கடமைகளை நிறைவேற்றுவதன் மூலமும், நாட்டின் பிரச்சினைகளை திறம்பட தீர்க்க ஒரு நல்ல, திறமையான, சன்மார்க்க மற்றும் புரட்சிகர அமைச்சரவை நியமிக்கப்படும் என்று அவர் நம்பிக்கை தெரிவித்தார்.

https://www.tehrantimes.com/news/501392/Gaza-still-Islamic-world-s-number-one-issue-Leader

"நல்லெண்ணத்தை நல்லெண்ணத்துடன் பிரதிபலிப்போம்" - ஈரானிய ஜனாதிபதியின் வெளியுறவு கொள்கை விளக்கம்

Iranian President's Foreign Policy Statement to the World

 By President-elect Masoud Pezeshkian

மே 19, 2024 அன்று, ஒரு சோகமான ஹெலிகாப்டர் விபத்தில் ஜனாதிபதி இப்ராஹிம் ரைசி - ஆழ்ந்த மரியாதைக்குரிய மற்றும் அர்ப்பணிப்புள்ள பொது சேவகரின் அகால மரணம் ஈரானில் முன்கூட்டியே தேர்தல்களை துரிதப்படுத்தியது, இது நமது நாட்டின் வரலாற்றில் ஒரு முக்கிய தருணத்தைக் குறிக்கிறது.

எங்கள் பிராந்தியத்தில் தற்போது நிலவும் போர் மற்றும் கொந்தளிப்புக்கு மத்தியில், ஈரானின் அரசியல் அமைப்பு, அமைதியான மற்றும் ஒழுங்கான முறையில் தேர்தல்களை நடத்தி குறிப்பிடத்தக்க ஸ்திரத்தன்மையை வெளிப்படுத்தியது. இந்த ஸ்திரத்தன்மையும், தேர்தல்கள் நடத்தப்பட்ட முறையும், நமது தலைவரான ஆயதுல்லா கமேனியின் சிறந்த வழிகாட்டலையும், நெருக்கடிகளை எதிர்கொண்டாலும் ஜனநாயக ரீதியில் அதிகாரத்தை மாற்றுவதற்கான நமது மக்களின் அர்ப்பணிப்பையும் அடிக்கோடிட்டுக் காட்டுகிறது.

சீர்திருத்தம், தேசிய ஒற்றுமையை வளர்த்தல், உலகத்துடன் ஆக்கப்பூர்வமான ஈடுபாடு என்ற மேடையில் நான் பதவிக்குப் போட்டியிட்டேன். இறுதியில் வாக்குப் பெட்டியில் எனது சக தேசபக்தர்களின் நம்பிக்கையைப் பெற்றேன். ஒட்டுமொத்த விவகாரங்களில் ஆதங்கம் அடைந்த இளம் பெண்களும் ஆண்களும் இதில் அடங்குவர். அவர்களின் நம்பிக்கையை நான் ஆழமாக மதிக்கிறேன், எனது பிரச்சாரத்தின் போது நான் அளித்த வாக்குறுதிகளை நிலைநிறுத்த உள்நாட்டிலும் சர்வதேச அளவிலும் ஒருமித்த கருத்தை வளர்ப்பதில் முழுமையான அர்ப்பணிப்புடன் இருக்கிறேன்.

அனைத்து சூழ்நிலைகளிலும் ஈரானின் தேசிய கௌரவம் மற்றும் சர்வதேச அந்தஸ்தைப் பாதுகாப்பதற்கான உறுதிப்பாட்டால் எனது நிர்வாகம் வழிநடத்தப்படும் என்பதை நான் வலியுறுத்த விரும்புகிறேன்.

ஈரானின் வெளியுறவுக் கொள்கை "கண்ணியம், ஞானம் மற்றும் விவேகம்" என்ற கொள்கைகளின் அடிப்படையில் நிறுவப்பட்டுள்ளது, இந்த அரசுக் கொள்கையை உருவாக்குவதும் செயல்படுத்துவதும் ஜனாதிபதி மற்றும் அரசாங்கத்தின் பொறுப்பாகும். இந்த முக்கிய நோக்கத்தை முன்னெடுப்பதற்கு எனது அலுவலகத்திற்கு வழங்கப்பட்ட அனைத்து அதிகாரங்களையும் பயன்படுத்த நான் உத்தேசித்துள்ளேன்.

இதைக் கருத்தில் கொண்டு, எனது நிர்வாகம் அனைத்து நாடுகளுடனும் உறவுகளில் சமநிலையை உருவாக்குவதன் மூலம், எங்கள் தேசிய நலன்கள், பொருளாதார வளர்ச்சி மற்றும் பிராந்திய மற்றும் உலகளாவிய அமைதி மற்றும் பாதுகாப்பின் தேவைகளுடன் ஒத்துப்போகும் வகையில் ஒரு வாய்ப்பு-உந்துதல் கொள்கையைப் பின்பற்றும். அதன்படி, பதட்டங்களைத் தணிப்பதற்கான நேர்மையான முயற்சிகளை நாங்கள் வரவேற்போம், நல்லெண்ணத்தை நல்லெண்ணத்துடன் பிரதிபலிப்போம்.

எனது நிர்வாகத்தின் கீழ், எங்கள் அண்டை நாடுகளுடனான உறவுகளை வலுப்படுத்துவதற்கு முன்னுரிமை அளிப்போம். ஒரு நாடு மற்ற நாடுகள் மீது மேலாதிக்கம் மற்றும் ஆதிக்கம் செலுத்துவதை விட ஒரு "வலுவான பிராந்தியத்தை" நிறுவுவதை நாங்கள் ஆதரிப்போம். அண்டை மற்றும் சகோதர நாடுகள் தங்கள் மதிப்புமிக்க வளங்களை கவரும் போட்டிகள், ஆயுதப் போட்டிகள் அல்லது ஒருவருக்கொருவர் தேவையற்ற முறையில் கட்டுப்படுத்துவதில் வீணாக்கக்கூடாது என்று நான் உறுதியாக நம்புகிறேன். அதற்கு பதிலாக, அனைவரின் நலனுக்காக பிராந்தியத்தின் முன்னேற்றம் மற்றும் மேம்பாட்டிற்காக எங்கள் வளங்களை அர்ப்பணிக்கக்கூடிய சூழலை உருவாக்குவதை நாங்கள் நோக்கமாகக் கொண்டுள்ளோம்.

துருக்கி, சவுதி அரேபியா, ஓமான், ஈராக், பஹ்ரைன், கத்தார், குவைத், ஐக்கிய அரபு எமிரேட்ஸ் மற்றும் பிராந்திய அமைப்புகளுடன் நமது பொருளாதார உறவுகளை ஆழப்படுத்தவும், வர்த்தக உறவுகளை வலுப்படுத்தவும், கூட்டு முதலீட்டை ஊக்குவிக்கவும், பொதுவான சவால்களை சமாளிக்கவும், பேச்சுவார்த்தை, நம்பிக்கையை உருவாக்குதல் மற்றும் வளர்ச்சிக்கான பிராந்திய கட்டமைப்பை உருவாக்குவதை நோக்கி நகர்த்தவும் நாங்கள் எதிர்பாக்கின்றோம். எமது பிராந்தியம் நீண்ட காலமாக போர், குறுங்குழுவாத மோதல்கள், பயங்கரவாதம் மற்றும் தீவிரவாதம், போதைப்பொருள் கடத்தல், தண்ணீர் பற்றாக்குறை, அகதிகள் நெருக்கடி, சுற்றுச்சூழல் சீரழிவு மற்றும் வெளிநாட்டு தலையீடு ஆகியவற்றால் பாதிக்கப்பட்டுள்ளது. எதிர்கால சந்ததியினரின் நலனுக்காக இந்த பொதுவான சவால்களை சமாளிக்க வேண்டிய நேரம் இது. பிராந்திய வளர்ச்சி மற்றும் சுபீட்சத்திற்கான ஒத்துழைப்பு எமது வெளிநாட்டுக் கொள்கையின் வழிகாட்டும் கொள்கையாக இருக்கும்.

அமைதியான இஸ்லாமிய போதனைகளில் வேரூன்றிய ஏராளமான வளங்கள் மற்றும் பகிரப்பட்ட மரபுகளைக் கொண்ட நாடுகளாக, நாம் ஒன்றுபட்டு அதிகாரத்தின் தர்க்கத்தை விட தர்க்கத்தின் சக்தியை நம்ப வேண்டும். நமது நெறிமுறை செல்வாக்கை மேம்படுத்துவதன் மூலம், அமைதியை ஊக்குவிப்பதன் மூலமும், நிலையான வளர்ச்சிக்கு உகந்த அமைதியான சூழலை உருவாக்குவதன் மூலமும், உரையாடலை வளர்ப்பதன் மூலமும், இஸ்லாமோஃபோபியாவை அகற்றுவதன் மூலமும் உருவாகி வரும் பிந்தைய துருவ உலக ஒழுங்கில் நாம் முக்கிய பங்கு வகிக்க முடியும். இந்த விஷயத்தில் நியாயமான பங்களிப்பை வழங்க ஈரான் தயாராக உள்ளது.

1979ம் ஆண்டு புரட்சியை தொடர்ந்து, புதிதாக நிறுவப்பட்ட ஈரான் இஸ்லாமிய குடியரசு, சர்வதேச சட்டம் மற்றும் அடிப்படை மனித உரிமைகளை மதிப்பதால் உந்தப்பட்டு, ஆரம்பத்திலேயே இஸ்ரேல் மற்றும் தென்னாபிரிக்கா என்ற இரண்டு நிறவெறி ஆட்சிகளுடனான உறவுகளை முறித்துக் கொண்டது. இஸ்ரேல் இன்றுவரை ஒரு நிறவெறி ஆட்சியாக உள்ளது, ஆக்கிரமிப்பு, போர்க்குற்றங்கள், இன சுத்திகரிப்பு, சட்டவிரோத குடியேற்றங்களைக் கட்டியெழுப்புதல், அணு ஆயுதங்கள் வைத்திருத்தல், சட்டவிரோத நில இணைப்பு மற்றும் அதன் அண்டை நாடுகளுக்கு எதிரான ஆக்கிரமிப்பு ஆகியவற்றால் ஏற்கனவே பாதிக்கப்பட்ட ஒரு ‘சாதனை’யுடன் இப்போது "இனப்படுகொலையை" சேர்த்துள்ளது.

முதல் நடவடிக்கையாக, எனது நிர்வாகம் நமது அண்டை அரபு நாடுகளை ஒத்துழைக்கவும், அனைத்து அரசியல் மற்றும் இராஜதந்திர நெம்புகோல்களையும் பயன்படுத்தி படுகொலையை நிறுத்தவும், மோதல் விரிவடைவதைத் தடுக்கவும் காஸாவில் ஒரு நிரந்தர போர்நிறுத்தத்தை அடைவதற்கு முன்னுரிமை அளிக்குமாறு வலியுறுத்தும்.

நான்கு தலைமுறை பாலஸ்தீனியர்களின் வாழ்க்கையை சீரழித்துள்ள நீண்டகால ஆக்கிரமிப்பை முடிவுக்குக் கொண்டுவர நாம் விடாமுயற்சியுடன் பணியாற்ற வேண்டும். இந்தப் பின்னணியில், 1948 இனப்படுகொலை உடன்படிக்கையின் கீழ் இனப்படுகொலையைத் தடுப்பதற்கான நடவடிக்கைகளை எடுக்க அனைத்து நாடுகளுக்கும் ஒரு பிணைப்பு கடமை உள்ளது என்பதை நான் வலியுறுத்த விரும்புகிறேன்; குற்றவாளிகளுடனான உறவுகளை இயல்பாக்குவதன் மூலம் அதற்கு வெகுமதி அளிக்க முடியாது.

இன்று, மேற்கத்திய நாடுகளில் உள்ள பல இளைஞர்கள் இஸ்ரேலிய ஆட்சி குறித்த எங்கள் பல தசாப்த கால நிலைப்பாட்டின் செல்லுபடியை அங்கீகரித்துள்ளனர் என்று தெரிகிறது. பாலஸ்தீனிய பிரச்சினையில் ஈரானின் கொள்கை ரீதியான நிலைப்பாட்டிற்காக அதற்கு எதிரான யூத எதிர்ப்பு குற்றச்சாட்டுக்களை நாம் அப்பட்டமான பொய் என்று மட்டுமல்ல, நமது கலாச்சாரம், நம்பிக்கைகள் மற்றும் அடிப்படை மதிப்புகளை அவமதிப்பதாகவும் நாங்கள் கருதுகிறோம் என்பதை இந்த துணிச்சலான தலைமுறைக்கு சொல்ல இந்த வாய்ப்பைப் பயன்படுத்த விரும்புகிறேன். பாலஸ்தீனியர்களின் வாழ்வுரிமையைப் பாதுகாப்பதற்காக பல்கலைக்கழக வளாகங்களில் நீங்கள் ஆர்ப்பாட்டம் செய்கையில் உங்கள் மீது செலுத்தப்பட்ட யூத எதிர்ப்புவாதம் என்ற நியாயமற்ற கூற்றுக்களைப் போலவே இந்த குற்றச்சாட்டுகளும் அபத்தமானவை என்பதில் உறுதியாக இருங்கள் என்று கேட்டுக்கொள்கிறேன்.

சவாலான காலங்களில் சீனாவும் ரஷ்யாவும் தொடர்ந்து எங்களுக்கு ஆதரவாக நிற்கின்றன. இந்த நட்பை நாங்கள் மிகவும் மதிக்கிறோம். சீனாவுடனான எங்களது 25 ஆண்டுகால சாலை வரைபடம், பரஸ்பர நன்மை பயக்கும் "விரிவான மூலோபாய கூட்டாண்மையை" ஸ்தாபிப்பதை நோக்கிய ஒரு குறிப்பிடத்தக்க மைல்கல்லைப் பிரதிநிதித்துவம் செய்கிறது, மேலும் ஒரு புதிய உலகளாவிய ஒழுங்கை நோக்கி நாம் முன்னேறுகையில் பெய்ஜிங்குடன் இன்னும் விரிவாக ஒத்துழைக்க நாங்கள் எதிர்நோக்குகிறோம். 2023 ஆம் ஆண்டில், சவூதி அரேபியாவுடனான எங்கள் உறவுகளை இயல்பாக்குவதை எளிதாக்குவதில் சீனா முக்கிய பங்கு வகித்தது, சர்வதேச விவகாரங்களில் அதன் ஆக்கபூர்வமான பார்வை மற்றும் முன்னோக்கு சிந்தனை அணுகுமுறையை இது காட்டுகிறது.

ரஷ்யா ஒரு மதிப்புமிக்க மூலோபாய நட்பு நாடு, ஈரானின் அண்டை நாடு, என் நிர்வாகம் அதனுடன் நம் ஒத்துழைப்பை மென்மேலும் விரிவுபடுத்தவும் உறுதிபூண்டுள்ளது. ரஷ்யா மற்றும் உக்ரைன் மக்களின் அமைதிக்காக நாங்கள் பாடுபடுகிறோம், இந்த நோக்கத்தை அடைவதை நோக்கமாகக் கொண்ட முயற்சிகளுக்கு தீவிரமாக ஆதரவளிக்க எனது அரசாங்கம் தயாராக இருக்கும். ரஷ்யாவுடனான இருதரப்பு மற்றும் பலதரப்பு ஒத்துழைப்புக்கு நான் தொடர்ந்து முன்னுரிமை அளிப்பேன், குறிப்பாக பிரிக்ஸ், ஷாங்காய் ஒத்துழைப்பு அமைப்பு மற்றும் யூரேசியா பொருளாதார ஒன்றியம் போன்ற கட்டமைப்புகளுக்கு உட்பட்டு.

உலகளாவிய நிலப்பரப்பு பாரம்பரிய இயக்கவியலுக்கு அப்பால் உருவாகியுள்ளது என்பதை அங்கீகரித்து, உலகளாவிய தெற்கில் வளர்ந்து வரும் சர்வதேச நிறுவனங்களுடன், குறிப்பாக ஆப்பிரிக்க நாடுகளுடன் பரஸ்பர நன்மை பயக்கும் உறவுகளை வளர்ப்பதில் எனது நிர்வாகம் உறுதிபூண்டுள்ளது. சம்பந்தப்பட்ட அனைவரின் பரஸ்பர நலனுக்காக நமது கூட்டு முயற்சிகளை மேம்படுத்தவும், நமது கூட்டாண்மையை வலுப்படுத்தவும் நாங்கள் பாடுபடுவோம்.

லத்தீன் அமெரிக்காவுடனான ஈரானின் உறவுகள் நன்கு நிறுவப்பட்டுள்ளன, மேலும் அனைத்து துறைகளிலும் வளர்ச்சி, பேச்சுவார்த்தை மற்றும் ஒத்துழைப்பை வளர்ப்பதற்காக நெருக்கமான உறவுகள் பராமரிக்கப்பட்டு ஆழப்படுத்தப்படும். ஈரானுக்கும் லத்தீன் அமெரிக்க நாடுகளுக்கும் இடையே தற்போது உணரப்படுவதை விட கணிசமான அளவு ஒத்துழைப்புக்கான சாத்தியக்கூறுகள் உள்ளன, மேலும் எங்கள் உறவுகளை மேலும் வலுப்படுத்த நாங்கள் எதிர்பார்க்கிறோம்.

ஐரோப்பாவுடனான ஈரானின் உறவுகள் அதன் ஏற்ற தாழ்வுகளை அறிந்திருக்கின்றன. மே 2018 இல் ஜே.சி.பி.ஓ.ஏ (கூட்டு விரிவான செயல் திட்டம்) இல் இருந்து அமெரிக்கா விலகிய பின்னர், ஐரோப்பிய நாடுகள் ஒப்பந்தத்தை காப்பாற்றவும், நமது பொருளாதாரத்தில் அமெரிக்காவின் சட்டவிரோத மற்றும் ஒருதலைப்பட்ச பொருளாதாரத் தடைகளின் தாக்கத்தைத் தணிக்கவும் ஈரானுக்கு பதினொரு உறுதிமொழிகளை அளித்தன. இந்த உறுதிப்பாடுகளில் பயனுள்ள வங்கி பரிவர்த்தனைகளை உறுதி செய்தல், அமெரிக்க பொருளாதாரத் தடைகளிலிருந்து நிறுவனங்களை திறம்பட பாதுகாத்தல் மற்றும் ஈரானில் முதலீடுகளை ஊக்குவித்தல் ஆகியவை அடங்கும். ஐரோப்பிய நாடுகள் இந்த உறுதிப்பாடுகள் அனைத்தையும் கைவிட்டுள்ளன, இந்நிலையில் ஈரான் ஒருதலைப்பட்சமாக JCPOA இன் கீழ் அதன் அனைத்து கடமைப்பாடுகளையும் நிறைவேற்றும் என்று நியாயமற்ற முறையில் எதிர்பார்க்கின்றன.

அவற்றில் இந்த தவறான நடவடிக்கைகள் இருந்தபோதிலும், பரஸ்பர மரியாதை மற்றும் சம அந்தஸ்து என்ற கொள்கைகளின் அடிப்படையில் நமது உறவுகளை சரியான பாதையில் கொண்டு செல்வதற்காக ஐரோப்பிய நாடுகளுடன் ஆக்கபூர்வமான உரையாடலில் ஈடுபட நான் எதிர்பார்க்கிறேன். ஈரானியர்கள் பெருமைமிக்க மக்கள், அவர்களின் உரிமைகளையும் கண்ணியத்தையும் இனியும் புறக்கணிக்க முடியாது என்பதை ஐரோப்பிய நாடுகள் உணர வேண்டும். ஐரோப்பிய சக்திகள் இந்த யதார்த்தத்துடன் உடன்பட்டு, இவ்வளவு காலமாக நமது உறவுகளை பீடித்துள்ள உற்பத்தி செய்யப்பட்ட நெருக்கடிகளுடன் இணைந்த சுய-ஆணவமான தார்மீக மேலாதிக்கத்தை ஒதுக்கி வைத்தவுடன், ஈரானும் ஐரோப்பாவும் ஆராயக்கூடிய ஒத்துழைப்புக்கான பல பகுதிகள் உள்ளன. பொருளாதார மற்றும் தொழில்நுட்ப ஒத்துழைப்பு, எரிசக்தி பாதுகாப்பு, போக்குவரத்து பாதைகள், சுற்றுச்சூழல், அத்துடன் பயங்கரவாதம் மற்றும் போதைப்பொருள் கடத்தல், அகதிகள் நெருக்கடி மற்றும் பிற துறைகளை எதிர்த்துப் போராடுவது ஆகியவை ஒத்துழைப்புக்கான வாய்ப்புகளில் அடங்கும், இவை அனைத்தும் நமது நாடுகளின் நலனுக்காக தொடரப்படலாம்.

அமெரிக்காவும் யதார்த்தத்தை உணர்ந்து, ஈரான் இப்போதும் சரி - எப்போதும் சரி - ஒருபோதும் அழுத்தத்திற்கு அடிபணியாது என்பதை புரிந்து கொள்ள வேண்டும். நாங்கள் 2015 இல் ஜேசிபிஓஎ இல் நல்லெண்ணத்துடன் நுழைந்தோம், எங்கள் கடமைப்பாடுகளை முழுமையாக நிறைவேற்றினோம். ஆனால் அமெரிக்கா முற்றிலும் உள்நாட்டு குழப்பங்கள் மற்றும் பழிவாங்கல் ஆகியவற்றால் உந்தப்பட்டு அந்த ஒப்பந்தத்திலிருந்து சட்டவிரோதமாக விலகியது, அது நமது பொருளாதாரத்திற்கு நூற்றுக்கணக்கான பில்லியன் டாலர்கள் சேதத்தை ஏற்படுத்தியது, மேலும் ஈரானிய மக்கள் மீது சொல்லொணா துன்பங்கள், இறப்புகள் மற்றும் அழிவை ஏற்படுத்தியது —குறிப்பாக கோவிட் தொற்றுநோயின் போது — பிராந்தியத்திற்கு அப்பாற்பட்ட ஒருதலைப்பட்ச பொருளாதாரத் தடைகளை விதித்ததன் மூலம். ஈரானுக்கு எதிராக பொருளாதாரப் போரை நடத்துவது மட்டுமல்லாமல், ஐ.எஸ்.ஐ.எஸ் மற்றும் பிற கொடூரமான பயங்கரவாத குழுக்களின் நடவடிக்கைகளில் இருந்து எங்கள் பிராந்திய மக்களைக் காப்பாற்றுவதில் வெற்றி பெற்றதற்காக உலகளவில் அறியப்பட்ட உலகளாவிய பயங்கரவாத எதிர்ப்பு ஹீரோவான ஜெனரல் காசிம் சுலைமானியைப் படுகொலை செய்வதன் மூலம் அமெரிக்கா வேண்டுமென்றே விரோதத்தை அதிகரிக்கும் பாதையை தேர்ந்தெடுத்தது. அந்தத் தெரிவின் தீய விளைவுகளை இன்று உலகம் கண்கூடாகக் காண்கிறது.

இதனால் அமெரிக்காவும் அதன் மேற்கத்திய நட்பு நாடுகளும் பிராந்தியத்திலும் உலகிலும் பதட்டங்களைக் குறைப்பதற்கும் நிர்வகிப்பதற்கும் ஒரு வரலாற்று வாய்ப்பை இழந்தது மட்டுமல்லாமல், அணு ஆயுதப் பரவல் தடை கொள்கைகளைக் கடைப்பிடிப்பதற்கான செலவுகள் அது வழங்கக்கூடிய நன்மைகளை விட அதிகமாக இருக்கும் என்பதைக் காட்டுவதன் மூலம் அணு ஆயுதப் பரவல் தடை ஒப்பந்தத்தை (NPT) தீவிரமாக குறைமதிப்பிற்கு உட்படுத்தின. உண்மையில், அமெரிக்காவும் அதன் மேற்கத்திய நட்பு நாடுகளும் ஈரானின் அமைதியான அணுசக்தி திட்டம் தொடர்பாக ஒரு நெருக்கடியை இட்டுக்கட்டுவதற்கு அணு ஆயுதப் பரவல் தடுப்பு ஆட்சியை துஷ்பிரயோகம் செய்துள்ளன - இது வெளிப்படையாக அவர்களின் சொந்த உளவுத்துறை மதிப்பீட்டிற்கே முரண்படுகிறது - மேலும் எங்கள் மக்கள் மீது நீடித்த அழுத்தத்தை தொடர்ந்தும் பராமரிக்க அதைப் பயன்படுத்துகின்றன, அதே நேரத்தில் அவர்கள் ஒரு நிறவெறி ஆக்கிரமிப்பு ஆட்சியான மற்றும் சட்டவிரோத அணு ஆயுதங்களைக் கொண்டுள்ள, அணு ஆயுத பரவல் தடை ஒப்பந்தத்தில் கையெழுத்திட தொடர்ந்து மறுத்துவரும் இஸ்ரேலின் அணு ஆயுதங்களுக்கு தீவிரமாக பங்களித்துள்ளனர் மற்றும் தொடர்ந்து ஆதரித்தும் வருகின்றனர்.

ஈரானின் பாதுகாப்புக் கோட்பாட்டில் அணு ஆயுதங்கள் இல்லை என்பதை நான் வலியுறுத்த விரும்புகிறேன், மேலும் கடந்த கால தவறான கணிப்புகளிலிருந்து கற்றுக்கொண்டு அதற்கேற்ப அதன் கொள்கையை சரிசெய்ய அமெரிக்காவை வலியுறுத்துகிறேன். பிராந்திய நாடுகளை ஒருவருக்கொருவர் எதிராக மோதவிடும் கொள்கை வெற்றி பெறவில்லை மற்றும் எதிர்காலத்திலும் அது வெற்றி பெறாது என்பதை வாஷிங்டனில் முடிவெடுப்பவர்கள் உணர வேண்டும். அவர்கள் இந்த யதார்த்தத்தை ஏற்றுக்கொள்ள வேண்டும் மற்றும் தற்போதைய பதட்டங்களை அதிகரிப்பதைத் தவிர்க்க வேண்டும்.

நமது உரிமைகள், நமது கண்ணியம் மற்றும் பிராந்தியத்திலும் உலகிலும் நமது தகுதியான பங்கை வலியுறுத்தும் அதே வேளையில், சர்வதேச அரங்கில் ஆக்கபூர்வமான ஈடுபாட்டை தீவிரமாக முன்னெடுப்பதற்கான வலுவான ஆணையை ஈரானிய மக்கள் என்னிடம் ஒப்படைத்துள்ளனர். இந்த வரலாற்று சிறப்புமிக்க முயற்சியில் எங்களுடன் இணைய விரும்புவோருக்கு நான் பகிரங்க அழைப்பு விடுக்கிறேன்.

https://en.mehrnews.com/news/217731/My-message-to-the-new-world