'ஒற்றுமை வாரம்': இஸ்லாமிய ஒற்றுமை, ஏகாதிபத்திய எதிர்ப்பின் கொடியை ஏந்திய ஈரான்

'Solidarity Week': Iran holds flag of Islamic unity, anti-imperialism

 

 

"எங்கே ஒற்றுமை இருக்கிறதோ, அங்கே வெற்றி இருக்கிறது."

 

இஸ்லாமிய ஒற்றுமை வாரம் என்பது முஸ்லிம்களால் ஆண்டுதோறும் சுன்னிகள் இறை தூதர் நபி பெருமானார் முஹம்மத் (ஸல்) அலைஹி வஸல்லம் அவர்களின் பிறந்த நாளாகக் கருதும் திகதிக்கும் ஷியா முஸ்லிம்கள் கருதும் திகதிக்கும் இடையில் நடத்தப்படுகிறது. இந்த இரண்டு திகதிகளும் சுன்னிகளின் கூற்றுப்படி, இஸ்லாமிய நாட்காட்டியின் மூன்றாவது சந்திர மாதத்தின் முதல் வாரமான ரபி-அல்-அவ்வலின் பன்னிரண்டாம் திகதி மற்றும் ஷியா பிரிவினரின் கூற்றுப்படி ரபி அல் அவ்வல் பதினேழாம் திகதி ஆகும்.

 

இஸ்லாமிய ஒற்றுமை வாரத்தின் முதல் பதிவு இஸ்லாமிய ஈரானின் உச்ச தலைவர் ஆயத்துல்லாஹ் சையித் அலீ கமனேயி அவர்களின் காலத்திற்கும் முந்தையது. புனித குர்ஆனின் படி ஒற்றுமையின் அடிப்படை அழைப்பை முஸ்லிம்கள் சிந்திக்கும் இந்த காலகட்டம், 1979 இல் ஈரான் இஸ்லாமிய குடியரசு நிறுவப்பட்டதைத் தொடர்ந்து, ஷியா அறிஞரான இஸ்லாமிய புரட்சியின் தலைவர் ஆயத்துல்லாஹ் இமாம் கொமெய்னி அவர்களால் சில சுன்னி அறிஞர்களின் ஒத்துழைப்புடன் ஷியா மற்றும் சுன்னி மக்களுக்கு இடையிலான ஒற்றுமையை பலப்படுத்த மற்றும் அதனை வரவேற்க ஒரு வாரத்தை ஏற்பாடு செய்து நிறுவப்பட்டது.

 

இஸ்லாமிய ஒற்றுமை வாரம் பிரகடனப்படுத்தப்பட்டதிலிருந்து, ஈரானில் மட்டுமன்றி, உலகம் முழுவதும் ஆண்டுதோறும் அனுசரிக்கப்படுகிறது, மேலும் பல்வேறு இஸ்லாமிய சிந்தனைப் பள்ளிகளை ஒரே தளத்தில் கொண்டு வருவதில் முக்கிய பங்கு வகித்துள்ளது, ஏனெனில் அல்லாஹ் ஒருவனே, முஸ்லிம்கள் ஒரே குர்ஆனை நம்புகிறார்கள் மற்றும் தினசரி ஐ வேளை தொழுகையின் போது ஒரே மையப்புள்ளியை, கிப்லாவை, நோக்கி தலைவணங்குகிறார்கள், அதுவே புனித கஃபா ஆகும். ரமலான் மாதத்தில் நோன்பு நோற்பது, துல்-ஹிஜ்ஜா மாதத்தில் வருடாந்திர ஹஜ் யாத்திரையை மேற்கொள்வது உள்ளிட்ட பிற பொதுத்தன்மைகளும் முஸ்லிம்களிடையே உள்ளன. இவை, மற்றும் ஒற்றுமையின் பிற குறிப்பிடத்தக்க காரணிகளைக் கருத்தில் கொண்டு, பல்வேறு சட்டவியல் பள்ளிகளைப் பின்பற்றும் முஸ்லிம்கள் ஒற்றுமையில் நெருக்கமாக அணிவகுத்து நிற்பது இயற்கையானது, குறிப்பாக புனித குர்ஆனில் உள்ள இறை கட்டளையின் படி, "இன்னும், நீங்கள் எல்லோரும் அல்லாஹ்வின் கயிற்றை வலுவாக பற்றிப் பிடித்துக் கொள்ளுங்கள்; நீங்கள் பிரிந்தும் விடாதீர்கள்; அல்லாஹ் உங்களுக்குக் கொடுத்த நிஃமத்களை (அருள் கொடைகளை) நினைத்துப் பாருங்கள்; நீங்கள் பகைவர்களாய் இருந்தீர்கள் - உங்கள் இதயங்களை அன்பினால் பிணைத்து; அவனது அருளால் நீங்கள் சகோதரர்களாய் ஆகிவிட்டீர்கள்;…" (அல்குர்ஆன் 3:103)

 

இஸ்லாத்தின் அறிஞர்களின் கூற்றுப்படி, இஸ்லாத்தில் ஒற்றுமை என்பது அனைத்து முஸ்லிம்களுக்கும் ஒரு கடமையாகும். ஒரு புனித நூலை பின்பற்றி ஓர் இறைவனை வணங்கும் நாம் அனைவரும் ஒரு உடலின் அங்கங்கள் போல் இருப்பது எமது சன்மார்க்கத்தில் உள்ளதாகும். மேலும் ஒற்றுமை என்பது அல்லாஹ்வின் புனித வேதத்திலும் இறை தூதரின் போதனைகளிலும் வலியுறுத்தப்பட்டுள்ளது.

 

இவ்வொற்றுமையை வலியுறுத்தவே, நபிகள் நாயகம் (ஸல்) அவர்களின் பிறந்த நாள் என்று நம்பப்படும் இரண்டு தேதிகளுக்கு இடையில் ஐந்து நாட்கள் இடைவெளியைக் குறைக்க மறைந்த இமாம் ஆயத்துல்லாஹ் கொமெய்னி அவர்களின் தொலைநோக்குப் பார்வை உதவியது. சுன்னி இஸ்லாமிய விளக்கங்களின்படி, ரபி அல்-அவ்வல் 12 ஆம் திகதி நபிகள் நாயகம் (ஸல்) அவர்களின் பிறந்த தேதியாக அங்கீகரிக்கப்பட்டுள்ளது. மறுபுறம், ஷியா முஸ்லிம்களால் நம்பப்பட்ட இஸ்லாமிய ஆதாரங்கள் மற்றும் அஹ்லுல் பைத்களின் (நபியின் தூய சந்ததி) விளக்கங்களை அடிப்படையில் நபி (ஸல்) அவர்களின் புனித பிறந்த நாள் ரபீ-அல்-அவ்வல் 17 ஆம் திகதி.

 

இந்த வேறுபாட்டைக் குறைப்பதற்காகவும், முஸ்லிம்களின் அணிகளை ஒன்றிணைப்பதற்கான வாய்ப்பாக இதைப் பயன்படுத்துவதற்காகவும், ஈரானின் இஸ்லாமிய புரட்சியின் நிறுவனர் ஆயத்துல்லாஹ் இமாம் கொமெய்னி அவர்கள் ரபி அல்-அவ்வல் 12 முதல் 17 வரை மிலாத்-உன்-நபி கொண்டாட்டங்களின் காலத்தை இஸ்லாமிய ஒற்றுமை வாரமாக நியமித்தார். இந்த ஆற்றல்மிக்க கருத்து அனைத்து முஸ்லிம் சிந்தனைப் பள்ளிகளையும் இஸ்லாமிய ஒற்றுமை என்ற பொது தளத்தில் கொண்டு வருவதை நோக்கமாகக் கொண்டுள்ளது.

 

ஒற்றுமை என்பது இயற்கையின் ஒரு பகுதியாகும், ஏனெனில் அது இருப்புக்கான அழைப்பாகும். நாம் அனைவரும் ஒரே இலக்கை நோக்கி செயல்படும் ஒற்றை சமுதாயம், ஒரு முழு சமூகமும் ஒருவருக்கொருவர் உதவி செய்து ஒருவருக்கொருவர் இறுதி இலக்கை அடைய உதவினால், நாம் அனைவரும் வெற்றி பெறுவது நிச்சயம்.

 

வேறுபாடுகள் இருப்பது இயல்பானது, இது உலகளாவிய இயற்கை நியதிகளில் ஒன்றாகும், வேறுபாடுகள் ஒரு விடயம் தொடர்பாக பலதரப்பட்ட கருத்துக்களைக் கொண்டுவருகின்றன, மேலும் அவை இஸ்லாமிய உம்மாவிற்கு நன்மை பயக்கும் விடயமும் ஆகும். அழகான தீனைப் பற்றி பல்வேறு விஷயங்களை வளர்க்கவும் கற்றுக்கொள்ளவும் இவ் வேறுபாடுகள் நமக்கு வாய்ப்புக்களை வழங்குகின்றன.

 

உண்மையில் வேற்றுமையில் ஒற்றுமை மற்றும் இஸ்லாமிய ஒற்றுமை வாரம் என்ற யோசனை பல நூற்றாண்டுகளாக உறக்கத்திலிருந்து முஸ்லிம்களை விழித்தெழச் செய்துள்ளது, இதற்கு இஸ்லாத்தின் எதிரிகள், குறிப்பாக மேற்கத்திய காலனித்துவவாதிகளின் முரண்பாடுகளை விதைக்கும் கொள்கைகள் முக்கிய காரணமாகும்.

 

இஸ்லாமிய உலகம் நீண்ட காலமாக காலனித்துவவாதிகளின் ஆதிக்கம் மற்றும் அமெரிக்கா மற்றும் பிற மேற்கத்திய ஆட்சிகளின் கோரப்பிடியில் சிக்கியுள்ளது. இந்த சக்திகள் முஸ்லிம்கள் ஒன்றுபட்டுவிடக்கூடாது என்பதில் கண்ணும் கருத்துமாய் உள்ளன. எம்மத்தியில் மோதல்களை உருவாக்கி, எம்மை பிரித்துவைத்து பிரித்தாளும் கொள்கையை கச்சிதமாக செய்துவருகின்றனர். பல முஸ்லிம் நாடுகளில் அவர்களுக்காக ஆட்சி செய்ய முகவர்களை நியமித்துள்ளனர். அவர்கள்  பெயரில் மட்டுமே முஸ்லிம் ஆனால் மேற்கில் உள்ள தங்கள் எஜமானர்களின் நலன்களுக்காகவே சேவை செய்கின்றனர். இந்த ஆட்சியாளர்கள் முஸ்லிம்களிடையே உள்ள வேறுபாடுகளை வளர்த்து, உம்மாவை மேலும் பிளவுபடுத்துவதற்கு பல கோடி டொலர்களை செலவுசெய்கின்றனர்.

 

ஒற்றுமையும் ஒருமைப்பாடும் மட்டுமே முஸ்லிம்கள் தங்களிடம் உள்ள பரந்த ஆற்றலைப் பயன்படுத்தவும், ஏகாதிபத்தியவாதிகள், சியோனிஸ்டுகள், ஆணவ சக்திகள் மற்றும் இஸ்லாமிய வெறுப்பாளர்கள் அவர்களின் வரையிலான எதிரிகளின் முடிவில்லாத சூழ்ச்சிகளிலிருந்து அவர்களை மீட்கவும் உதவும் என்பதையும் இஸ்லாமிய உம்மத் உணரத் தொடங்கியுள்ளது.

 

செப்டம்பர் 11, 2001 அன்று நியூயார்க் மற்றும் வாஷிங்டனை உலுக்கிய மிகவும் சந்தேகத்திற்கிடமான சம்பவங்களைத் தொடர்ந்து, பயங்கரவாதத்தை எதிர்த்துப் போராடுகிறோம் என்ற பெயரில் பெரிய தீய சக்தியான அமெரிக்கா தலைமையிலான மேற்கத்திய அரசாங்கங்களால் கட்டவிழ்த்து விடப்பட்ட முஸ்லிம்களுக்கு எதிரான சிலுவைப் போர் பிரச்சாரத்திற்குப் பிறகு இஸ்லாமிய ஒற்றுமை காலத்தின் அளப்பரிய தேவையாகும்.

 

அதன் பின்னர் அமெரிக்கா, ஆப்கானிஸ்தான் மற்றும் ஈராக் ஆகிய இரண்டு முஸ்லிம் நாடுகளை ஆக்கிரமித்துள்ளதுடன், மற்ற இஸ்லாமிய நாடுகளையும் அச்சுறுத்தி வருகிறது. இஸ்லாமிய அணிகளுக்குள் ஒற்றுமை இல்லை என்பதை அறிந்த சியோனிஸ்டுகளும் அவர்களின் மேற்கத்திய கூட்டாளிகளும் முஸ்லிம்களின் முதல் கிப்லாவான புனித குத்ஸை தொடர்ந்து ஆக்கிரமித்துள்ள நிலையில், பாலஸ்தீனத்தின் பிரச்சினைகள் தொடர்ந்து நீடிக்கின்றன. காசாவில் முற்றுகையிடப்பட்ட 1.5 மில்லியன் பாலஸ்தீனியர்களின் அவல நிலை உலகில் உள்ள 1.5 பில்லியனுக்கும் அதிகமான முஸ்லிம்களிடையே ஒற்றுமைக்கான அழைப்பாக வலியுறுத்தப்படுகிறது.

 

ஒற்றுமை என்பது ஒவ்வொரு முஸ்லிமும் எல்லா நேரங்களிலும் முயற்சிக்க வேண்டிய ஒரு போற்றத்தக்க இலட்சியமாகும், குறிப்பாக இன்று இஸ்லாமிய உம்மத்தில் பிளவுகளை உருவாக்க குறுங்குழுவாதம் வேண்டுமென்றே ஊக்குவிக்கப்படுகிறது. வருந்தத்தக்க வகையில், பிரிவினை முயற்சிகள் ஓரளவிற்கு வெற்றி பெற்று, முஸ்லிம் உலகில் பெரும் துன்பத்தை ஏற்படுத்தியுள்ளன. இஸ்லாத்தின் எதிரிகளான ஏகாதிபத்தியவாதிகளும் சியோனிஸ்டுகளும் முஸ்லிம்களின் ஒற்றுமையைக் கண்டு அஞ்சுகிறார்கள். முஸ்லிம்கள் ஒன்றுபட்டால் அவர்களின் சூழ்ச்சி தோல்வியடையும் என்பது அவர்களுக்குத் தெரியும். ஏகாதிபத்தியவாதிகளும் சியோனிஸ்டுகளும் இனி முஸ்லிம் உலகத்தையோ அதன் வளங்களையோ சுரண்ட முடியாது. இஸ்லாத்தின் எதிரிகள் வெற்றி பெறுவதற்குக் காரணம் அவர்களிடம் உயர்ந்த சிந்தனைகள் இருப்பதால் அல்ல, மாறாக அவர்கள் இஸ்லாமிய உலகில் ஊடுருவி, தங்கள் சொந்த முகவர்களை ஆட்சியாளர்களாக திணித்து, தங்கள் எஜமானரின் நிகழ்ச்சி நிரலை செயல்படுத்துகிறார்கள்.

 

குர்ஆன் மற்றும் சீராவைப் பற்றிய தெளிவான புரிதலை வளர்த்துக் கொள்வதன் மூலம் முஸ்லிம்கள் "ஒருவருக்கொருவர் இரக்கம்" என்ற அழகான பண்பை வளர்த்துக் கொள்ள வேண்டும். அது அனைவரையும் உள்ளடக்கியதாகவும், நியாயம் மற்றும் நீதிக்கான ஆன்மீக கொள்கைகளை அடிப்படையாகக் கொண்டதாகவும் இருக்க வேண்டும். இந்தப் போராட்டத்தில் குறுங்குழுவாத நலன்களுக்கு இடமில்லை. இத்தகைய நலன்களை முன்னெடுப்பவர்கள் முஸ்லிம்களை பிரதிநிதித்துவப்படுத்துவதாக கூறிக்கொள்ள முடியாது, இஸ்லாத்தின் முழுமையையும் பிரதிநிதித்துவப்படுத்துவதாக கூறிக்கொள்ள முடியாது.

 

முஸ்லிம்கள் ஒருவருக்கொருவர் வர்த்தகம் செய்து நலனுக்காக உழைத்தால், அது வலுவான பொருளாதாரத்தை கட்டியெழுப்ப உதவும். இது தவிர, ஒற்றுமையால் முஸ்லிம்களை எதிரிகளின் தாக்குதல்களில் இருந்து காப்பாற்ற முடியும். ஒரு தனி நபர் எளிதில் திசைதிருப்பப்படலாம் அல்லது தாக்கப்படலாம். ஆனால் ஒரு பெரிய மக்கள் குழுவை சமாளிப்பது கடினம்.

 

அதேபோன்று முஸ்லிம்கள் அன்புடனும் அனுதாபத்துடனும் ஒன்றிணைந்து வாழ வேண்டும், சிறு சிறு சச்சரவுகளையும் தவிர்க்க வேண்டும், அப்போதுதான் அவர்கள் பலமாக இருப்பார்கள், வேறு எந்த நாடும் அவர்களைத் தாக்கவோ அல்லது வெல்லவோ முடியாது.

 

கடந்த காலங்களில் முஸ்லிம்கள் ஒற்றுமை மற்றும் புரிந்துணர்வு காரணமாக உயர்ந்தவர்களாகவும், செழிப்பானவர்களாகவும் இருந்தனர். ஆனால் இப்போது அவை பிரிந்து விட்டதால் மற்ற நாடுகள் அவர்களை முந்திச் செல்கின்றன. ஒற்றுமை மிகவும் முக்கியத்துவம் வாய்ந்தது, முஸ்லிம்கள் மீண்டும் ஒன்றுபட்டு, ஒன்றிணைந்து செயல்பட்டு, சிறிய கருத்து வேறுபாடுகளைப் புறக்கணித்தால், அவர்கள் தங்கள் நிலையை மீண்டும் பெறலாம்.

 

இஸ்லாமிய ஒற்றுமை வாரம் பல்வேறு முஸ்லிம் சமூகங்களிடையே ஒற்றுமை, உரையாடல் மற்றும் ஒத்துழைப்பை வளர்ப்பதை நோக்கமாகக் கொண்ட மாநாடுகள், பிரார்த்தனைகள் மற்றும் விவாதங்கள் போன்ற நிகழ்வுகளை உள்ளடக்கப்பட்டுள்ளது. முஸ்லிம்களைப் பிளவுபடுத்தும் முயற்சிகளை எதிர்க்கவும், அவர்களின் பொதுவான நம்பிக்கை மற்றும் குறிக்கோள்களைப் பற்றிய பகிரப்பட்ட புரிதலை மேம்படுத்தவும் இவ்வாரம் வருடந்தோறும் அனுஷ்டிக்கப்படுகிறது.

 

வெறும் கொண்டாட்டங்களுக்கு மாத்திரம் மட்டுப்படுத்தப்படாமல், இந்த இஸ்லாமிய ஒற்றுமை வாரமானது பொதுவான சவால்களுக்கான பகிரப்பட்ட மதிப்புகள் மற்றும் தீர்வுகளைப் பற்றி விவாதிக்க அறிஞர்கள் மற்றும் சமூக உறுப்பினர்களை ஒன்றிணைக்கும் நிகழ்வுகளான மாநாடுகள் மற்றும் விவாதங்களை உள்ளடக்கியது.

 

முஸ்லிம்கள் ஒற்றுமையுடன் ஒன்று சேரக்கூடிய கூட்டுப் பிரார்த்தனைகள் உட்பட கவிதை வாசித்தல் மற்றும் கதைகளைப் பகிர்தல் போன்ற நடவடிக்கைகளும் இடம்பெறும். இவை பெரும்பாலும் இறை தூதர் முஹம்மத் நபி (ஸல்) அவர்களின் பாத்திரத்தையும் போதனைகளையும் கௌரவிப்பதற்காக அவரது வாழ்க்கையை விவரிப்பதை உள்ளடக்குகின்றன. பல்வேறு முஸ்லிம் சமூகங்களிடையே சகோதரத்துவம், சகிப்புத்தன்மை மற்றும் ஒத்துழைப்பை வளர்ப்பதில் இன் நிகழ்வுகள் கவனம் செலுத்துவதோடு அவர்களிடையே பரஸ்பர புரிதலை ஊக்குவிக்கின்றன.

 

ஈரானிய அரசாங்கம் இந்த கொண்டாட்டங்களில் ஒரு முக்கிய பாத்திரம் வகிக்கிறது, பெரும்பாலும் உலகெங்கிலும் இருந்து பங்கேற்பாளர்களை ஈர்க்கும் சர்வதேச மாநாடுகளை நடத்துகிறது, பொதுவான சவால்களுக்கு எதிராக ஒரு ஒருங்கிணைந்த இஸ்லாமிய முன்னணியின் அவசியத்தை வலியுறுத்துகிறது. இவ்வருடம் 39 வது சர்வதேச இஸ்லாமிய ஒற்றுமை மாநாடு எதிர்வரும் செப்டம்பர் 8 முதல் 10 வரை தெஹ்ரானில் நடைபெறும் என தீர்மானிக்கப்பட்டுள்ளது. "கருணையின் நபியும் இஸ்லாமிய உம்மாவும்" என்ற தொனிப்பொருளின் கீழ் இந்த நிகழ்வு இடம்பெறவுள்ளது.

 

 

 

 

 

 

 

அல்-அக்ஸா நினைவுகூரல்: உலகெங்கிலும் உள்ள பள்ளிவாசல்களைப் பாதுகாக்கும் நாள்

 Al-Aqsa remembered: Day to protect mosques worldwide

பள்ளிவாசல்கள், வழிபாட்டுத் தலங்கள் மற்றும் சமூக மையங்களாக, வழிகாட்டுதலின் முக்கிய அமைப்பாக செயல்பட வேண்டும், அனைத்து நம்பிக்கைகள் மற்றும் மத பின்னணியைச் சேர்ந்த மக்களிடையே புரிந்துணர்வு மற்றும் ஒத்துழைப்பை ஊக்குவிக்க வேண்டும் என்பதையே உலக மஸ்ஜித் தினம் மையப்படுத்துகிறது.

 

ஈரான் இஸ்லாமிய குடியரசின் ஆலோசனை மற்றும் இஸ்லாமிய ஒத்துழைப்பு அமைப்பின் ஒப்புதலின் பேரில், அல்-அக்ஸா மஸ்ஜித் எரிக்கப்பட்ட ஆண்டு நிறைவான ஆகஸ்ட் 21 ஆம் தேதி, சர்வதேச மஸ்ஜித் தினமாக பெயரிடப்பட்டுள்ளது.

 

ஆகஸ்ட் 21, 1969 அன்று ஆஸ்திரேலிய கிறிஸ்தவ சியோனிஸ்டான டெனிஸ் மைக்கேல் ரோஹனால் அல்-அக்ஸா மஸ்ஜித் மீது நடத்தப்பட்ட தீ வைப்பு தாக்குதலின் ஆண்டு நினைவுகூரல் இஸ்லாமிய புரட்சியின் தலைவர் ஆயத்துல்லாஹ் இமாம் கொமெய்னி அவர்களால் உலக மஸ்ஜித் தினம் நிறுவப்பட்டது.

 

குத்ஸில் அமைந்துள்ள மற்றும் முஸ்லிம்களின் முதல் கிப்லாவான அல்-அக்ஸா மஸ்ஜித் மக்காவில் உள்ள மஸ்ஜித் அல்-ஹராம் மற்றும் மதீனாவில் உள்ள மஸ்ஜிதுல் நபவிக்கு அடுத்தபடியாக இஸ்லாத்தின் மூன்றாவது புனித தளமாகும். இருப்பினும், அல்-அக்ஸா மஸ்ஜித் சியோனிச குடியேற்றக்காரர்களால் தொடர்ந்து அவமானங்கள் மற்றும் தாக்குதல்களுக்கு உள்ளாகிறது, மேலும் இஸ்ரேலிய ஆக்கிரமிப்பு படையினர் அனைத்து பாலஸ்தீனர்களையும் புனித தளத்திற்குள் நுழைவதைத் தடுக்கின்றனர். இந்த வளாகம் பாலஸ்தீனியர்களுக்கும் இஸ்ரேலிய அதிகாரிகளுக்கும் இடையிலான பதட்டத்தின் வெடிப்பு புள்ளியாக உள்ளது, மத விடுமுறை நாட்களில் அடிக்கடி மோதல்கள் வெடிக்கின்றன. சியோனிச ஆக்கிரமிப்பில் இருந்து பாலஸ்தீனிய விடுதலைக்கான நீண்டகால போராட்டத்தில் புனித மஸ்ஜித் தொடர்ந்து குறிவைக்கப்பட்டு வருகிறது, ஆட்சி அடிக்கடி அல்-அக்ஸா மஸ்ஜித் மீது தாக்குதல்களுக்கு உத்தரவிடுகிறது.

 

17 ஆகஸ்ட் 2024 இல் இஸ்ரேலிய ஆட்சி கடலோரப் பகுதியில் உள்ள வழிபாட்டுத் தலங்களைக் கூட விட்டுவைக்கவில்லை, கண்மூடித்தனமாகவும் இலக்கின்றியும் அவற்றின்மீது குண்டுகளை வீசியது. விடியற்காலையில் தொழுகையின் போது தராஜ் மாவட்டத்தில் உள்ள அல்-தாபினில் உள்ள ஒரு மஸ்ஜிதில் இஸ்ரேலிய ஆட்சி குண்டு வீசியதில் குறைந்தது 100 பேர் வரை கொல்லப்பட்டனர், அவர்களில் பலரை அடையாளம் காண்பதில் சிரமம் ஏற்பட்டது.

 

2024 உலக மஸ்ஜித் தினம் கொண்டாடப்படும் நிலையில், அவ்வாண்டில் ஆகஸ்ட் மாதம் வரை கடந்த 320 நாட்களில் காசாவில் இஸ்ரேல் நடத்திய இனப்படுகொலை குண்டுவெடிப்பில் மொத்தம் 610 மஸ்ஜித்கள் முற்றிலுமாக அழிக்கப்பட்டுள்ளதாக காஸா ஊடக அலுவலகம் தெரிவித்துள்ளது.

 

அக்டோபர் 7, 2024 முதல், இஸ்ரேலிய ஆட்சி மஸ்ஜித்கள் உட்பட காசாவின் ஒவ்வொரு பகுதியிலும் குண்டுவீசி வருகிறது. காசா ஊடக அலுவலகத்தின் கூற்றுப்படி, 2024 இல் கடந்த 11 மாதங்களில் மொத்தம் 824 மசூதிகள் முழுமையாகவோ அல்லது பகுதியளவிலோ சேதமடைந்துள்ளன, இதில் 610 மஸ்ஜித்கள் முழுமையாக சேதமடைந்துள்ளன.

 

2019 ஆம் ஆண்டின் பாலஸ்தீனிய உத்தியோகபூர்வ தரவுகளின்படி, காசா பகுதியில் 1,117 மஸ்ஜித்கள் இருந்தன, அதாவது இதுவரை அனைத்து மஸ்ஜித்களிலும் 55 சதவீதம் அழிக்கப்பட்டுள்ளன.

 

காசாவின் பெரும்பான்மை முஸ்லீம் மக்களுக்கு அவற்றின் மத முக்கியத்துவத்திற்கு அப்பால், இந்த மஸ்ஜித்களில் பல பெரும் கலாச்சார மற்றும் வரலாற்று முக்கியத்துவம் வாய்ந்தவை, ஏனெனில் அவற்றின் வரலாறு பல நூற்றாண்டுகளுக்கு முந்தையது.

 

இஸ்லாமிய சமூகங்களில் மஸ்ஜித்கள் ஒரு முக்கிய இடத்தைப் பிடித்துள்ளன, அவை மரியாதைக்குரியவை, அதன் தூய்மையை கெடுத்தல் மற்றும் இழிவுபடுத்துதல் உலகெங்கிலும் உள்ள முஸ்லிம்களை ஆழமாக புண்படுத்துகிறது.

 

உலக மஸ்ஜித் தினம் அல்-அக்ஸா மஸ்ஜித் தீ வைப்பு தாக்குதலை நினைவுகூருகிறது, இது மத தள பாதுகாப்புக்கான விழிப்புணர்வை ஏற்படுத்துகிறது.

 

ஆகஸ்ட் 21, 1969 அன்று, முஸ்லிம்களின் முன்னாள் மற்றும் முதல் கிப்லா என்ற முக்கியத்துவம் வாய்ந்த இடமான அல்-அக்ஸா மஸ்ஜித் ஒரு தீவிரவாதியின் தீ தாக்குதலுக்கு உட்பட்டது. தீ கிட்டத்தட்ட 1500 சதுர மீட்டர் பரவி மஸ்ஜிதை மிகையாக சேதப்படுத்தி, வரலாற்று அம்சங்களை அழித்தது மற்றும் கட்டமைப்பு சரிவை ஏற்படுத்தியது, இஸ்லாமிய நாடுகளின் சீற்றத்தையும் கண்டனத்தையும் தூண்டியது.

 

ஐ.நா. பாதுகாப்பு கவுன்சில் இன் 271ம் தீர்மானத்தின் அடிப்படையில் இத் தாக்குதலுக்கு காரணியான இஸ்ரேலுக்கு கண்டனம் தெரிவித்தது. உலக மஸ்ஜித் தினம் இப்போது அல்-அக்ஸா மஸ்ஜிதின் முக்கியத்துவத்தையும் அதை இஸ்லாத்தின் மூன்றாவது புனித தளமாக எடுத்துக்காட்டுகிறது.

 

மஸ்ஜித் என்பது இஸ்லாமிய தொழுகை இல்லம் ஆகும், இது அரபு மொழியில் "ஸஜ்தா செய்யும் இடம்" அல்லது "சிரம் பணிந்த இடம்" என்பதிலிருந்து பெறப்பட்டது. ஆரம்பகால மஸ்ஜித்கள் நபிகள் நாயகம் (ஸல்) அவர்களின் மதீனா முற்றத்தை மாதிரியாகக் கொண்டு வடிவமைக்கப்பட்டன.

 

வயதெல்லையை பொருட்படுத்தாது அனைத்து முஸ்லிம்களுக்கும் வழிகாட்டுகின்ற மற்றும் தொடர்புகளை வளர்க்கின்ற பள்ளி வாசல்கள் வழிபாட்டுத் தலங்களாகவும், சமூகக் கூட்டங்கள் ஒன்று சேரும் புனித ஸ்தலமாகவும் போற்றப்படுகின்றன.

 

இஸ்லாமிய வரலாறு முழுவதும், மஸ்ஜித்கள் புனிதமாகவும், ஆன்மீகத்திற்கும் லௌகிகத்திற்கும் இடையிலான இணைப்பை உறுதிப்படுத்தும் பாலமாகவும் மற்றும் மனிதனின் ஆன்மீக வளர்ச்சியை மேம்படுத்தும் மையமாகவும் மதிக்கப்பட்டு வருகின்றன. முஸ்லீம் உலகை பாதிக்கும் சமூக, அரசியல் மற்றும் உலகளாவிய பிரச்சினைகளை விவாதிப்பதற்கான மன்றங்களாக அவை செயல்படுகின்றன.

ஈரானில் ஏராளமான மஸ்ஜித்கள் மற்றும் புனித ஸ்தலங்கள் உள்ளன, அவற்றின் சமச்சீர் வடிவமைப்புகள், வடிவியல் அலங்காரங்கள் மற்றும் துடிப்பான வண்ணங்களுக்கு புகழ் பெற்றவை. நசீர் அல்-முல்க் மஸ்ஜித், ஷேக் சஃபி அல்- தீன் கானேகா, ஷா-இ செராக் மஸ்ஜித், இமாம் மஸ்ஜித், யாஸ்தின் ஜாமே மஸ்ஜித், வகீல் மஸ்ஜித், தப்ரீஸின் நீல மஸ்ஜித், கோஹர் ஷாத் மஸ்ஜித், ஆகா போசோர்க் மஸ்ஜித் மற்றும் ஜம்கரன் மஸ்ஜித் ஆகியவை முக்கிய எடுத்துக்காட்டுகள்.

 

மஸ்ஜித் கட்டிடக்கலை பிராந்திய ரீதியாக வேறுபடுகிறது, பொதுவாக கிடைக்கக்கூடிய பொருட்கள் மற்றும் உள்ளூர் மரபுகளால் வடிவமைக்கப்பட்டுள்ளது. இருப்பினும், கிப்லாவை (மக்காவின் திசையை) குறிக்கும் ஒரு மாடமான மிஹ்ராப் மற்றும் பிரசங்கங்களை வழங்குவதற்கான பிரசங்க மேடையான மிம்பர் போன்ற சில அம்சங்கள் வேறுபடுவதில்லை, அவை ஒத்த மாதிரியைக் கொண்டுள்ளன. மினரத்கள், தொழுகைக்கான அழைப்பு (அதான்) அறிவிக்கப்படும் உயரமான கோபுரங்களும் பொதுவான அம்சங்களாகும். வுழு செய்வதற்கான தூய்மை வசதிகள் அவசியம் கொண்டிருக்கும்.

 

எழுத்தணிகலை, வடிவியல் அலங்காரங்கள் மற்றும் மலர் உருவங்கள் பெரும்பாலும் மஸ்ஜித் சுவர்களை அலங்கரிக்கின்றன, இது இஸ்லாமிய கலை மரபுகளைப் பிரதிபலிக்கிறது. இந்த அலங்கார கூறுகள் பிரதிநிதித்துவ உருவகங்களைத் தவிர்த்து, அதற்கு பதிலாக அருவமான வடிவமைப்புகள் மற்றும் குர்ஆனின் வசனங்களில் கவனம் செலுத்துகின்றன.

 

மஸ்ஜித்களின் இடம் சார்ந்த அமைப்பு கூட்டு பிரார்த்தனையை அனுமதிக்கும் முகமாக பொதுவாக ஒரு பெரிய, திறந்த தொழுகை மண்டபத்தை முக்கியமாக கொண்டுள்ளது. பள்ளிவாசலில் அமைதியான மற்றும் ஆன்மீக சூழலை உருவாக்குவதற்கு இயற்கை ஒளி பெரும்பாலும் குறிப்பிடத்தக்க அங்கம் வகிக்கிறது, பள்ளிவாயில் முற்றங்கள் பிரார்த்தனை மற்றும் சமூக தொடர்புகளுக்கு ஏராளமான இடத்தை வழங்குகின்றன.

 

மஸ்ஜித்களைப் பாதுகாத்தல் மற்றும் பராமரித்தல் ஆன்மீகத்தின் செயல்களாகக் கருதப்படுகிறது, இதனால் நம்பிக்கை, கற்றல் மற்றும் சமூக ஈடுபாட்டின் மையங்களாக அவற்றின் தொடர்ச்சியான பங்கு உறுதி செய்யப்படுகிறது.

 

சமகால மஸ்ஜித்கள் பெரும்பாலும் நவீன வசதிகளை கொண்டிருக்கும் அதே வேளை, பாரம்பரிய கட்டிடக்கலை கூறுகளைத் தக்கவைத்துக் கொள்கின்றன, மாறிவரும் தேவைகள் மற்றும் சூழல்களுக்கு ஈடு கொடுக்கும் வகையில் இஸ்லாமிய கட்டிடக்கலையின் தற்போதைய பரிணாம வளர்ச்சி பிரதிபலிக்கின்றன.

 

உலக மஸ்ஜித் தினத்தை நிறுவுவது உலகெங்கிலும் உள்ள முஸ்லிம்களின் வாழ்க்கையில் மஸ்ஜித்களின் முக்கியத்துவத்தை, குறிப்பாக அல்-அக்ஸா மஸ்ஜிதின் முக்கியத்துவத்தை நினைவூட்டுகிறது.

 

நீதி மற்றும் சமூக மாற்றத்தை ஊக்குவிப்பதில் மஸ்ஜித்கள் வரலாற்று ரீதியாக ஒரு பங்கைக் கொண்டிருப்பதால், இது ஒற்றுமை மற்றும் அடக்குமுறைக்கு எதிரான எதிர்ப்பின் சின்னமாகும்.

 

சமகாலத்தில், இஸ்லாமிய உம்மத் எதிர்கொள்ளும் பல சவால்களைக் கருத்தில் கொண்டு, முஸ்லிம்களிடையே ஒற்றுமைக்கான தேவை முன்னெப்போதையும் விட அதிகமாக உள்ளது என்று கூறினால் அது மிகையாகாது. இஸ்லாமிய போதனைகளின் மையமான அமைதி, சகிப்புத்தன்மை மற்றும் பரஸ்பர மரியாதை மற்றும் புரிந்துணர்வு ஆகிய கொள்கைகள் வாழ்க்கையின் அனைத்து அம்சங்களிலும் நிலைநிறுத்தப்பட்டு நடைமுறைப்படுத்தப்பட வேண்டும்.

 

முஸ்லிம்களை ஒன்றிணைக்கும் பகிரப்பட்ட விழுமியங்களை நினைவில் கொள்வதும், அனைவருக்கும் சிறந்த எதிர்காலத்தை நோக்கி ஒன்றிணைந்து செயல்படுவதும் தலையாய கடமையாகும்.

 

கர்பலா - உணர்ச்சியுடன் கலந்த புரிதல் இமாம் ஹுஸைன் (அலை) அவர்களின் எழுச்சியின் உண்மையான செய்தியை மறைக்கின்றன: இஸ்லாமிய அறிஞர் ஹுஜ்ஜதுல்-இஸ்லாம் வல்முஸ்லிமீன் ஹமீத் கராத்தி

Emotional Interpretations Obscure True Message of Imam Hussein’s Uprising: Scholar Hojat-ol-Islam Hameed Qara'ati

இக்னா, இஸ்லாமிய ஈரானின் ஒரு பிரபலமான ஊடகம், ஜூலை 14, 2025 வெளியிட்ட ஆக்கம் இது. இவ்வாக்கம் புனித கர்பலாவின் தொனிப்பொருளை, விதிவிலக்காக, ஒரு புது கண்ணோட்டத்தில் நோக்குகிறது.

 

பொதுவாக முஹர்ரம் மாதத்தின் முதல் பத்து தினங்களை உலகெங்கும் இலட்சக்கணக்கான முஸ்லிம்கள் துக்க தினங்களாக அனுஷ்டிக்கிறார்கள். பல்வேறு வழிகளில் தங்களது துயரத்தையும் துக்கத்தையும் வெளிப்படுத்துகிறார்கள். 1300 வருடங்களுக்கு முன்பு ஈராக் தேசத்து கர்பலா மைதானத்தில் நபி (ஸல்) அவர்களின் பேரர் ஹுஸைன் (அலை) அவர்கள் தனது இன்னுயிரை இஸ்லாத்திற்காக ஈந்ததை நினைவூட்டும் சடங்காக இந்த துக்க தின அனுஷ்டித்தல்கள் அமைந்துவிட்டன. ஆனால் துக்கம் அனுஷ்டிக்கும் இலட்சக்கணக்கான மக்களில் பெரும்பாலோருக்கு ஹுஸைன் (அலை) அவர்களின் உயிர்த் தியாகத்தின் தாத்பர்யமே தெரியாததுதான் விந்தை.

 

‘கர்பலா’ எனும் போதே உள்ளத்தில் எழுப்பப்படும் உணர்ச்சி, கவலையும் சோகத்தையும் கலந்த ஒரு உணர்வுசார் நிகழ்வாகவே கருதப்படுவது, அதன் ஆழமான கருப்பொருளை வெளிக்கொணர்வதனை கடினமாக்கியுள்ளதாகவும் அந்நிகழ்வில் புதைந்துள்ள தாத்பர்யமான ஆன்மீக கருத்தையும் மறைப்பதாகவும் இஸ்லாமிய ஈரானின் பிரபல மார்க்க அறிஞர்கள் கவலையடைகிறார்கள். இக்னாவில் வெளியிட்டுள்ள இவ்வாக்கம் இதனையே பின்வருமாறு கூறுகிறது;

ஈரானிய அறிஞர்களில் ஒருவரான ஹுஜ்ஜதுல்-இஸ்லாம் வல்முஸ்லிமீன் ஹமீத் கராத்தி, இமாம் ஹுஸைன் (அலை) அவர்களின் எழுச்சியின் உணர்ச்சிகரமான விளக்கங்கள் அவரது மரபைப் பற்றிய ஆழமான புரிதலைத் தடுக்கின்றன என்றும், அவரது உதாரணத்தை மக்கள் அர்த்தமுள்ளதாக பின்பற்றுவதை கடினமாக்கியுள்ளன என்றும் கூறுகிறார்.

 

 

இமாம் ஹுஸைன் (அலை) அவர்களின் எழுச்சியில் இருந்து கற்றுக்கொள்வதற்கான தடைகள் குறித்து இக்னாவிடம் பேசிய, பக்கீர் அல்-ஒலும் பல்கலைக்கழகத்தின் விரிவுரையாளரும் ஆசிரிய உறுப்பினருமான இஸ்லாமிய அறிஞர் ஹுஜ்ஜதுல்-இஸ்லாம் வல்முஸ்லிமீன் ஹமீத் கராத்தி பல முக்கிய தடைகளை அடையாளம் கண்டார். "இமாம் ஹுஸைன் (அலை) அவர்களின் வாழ்க்கை மற்றும் போதனைகளுடன் கலந்த தகவல்களின் வெளிப்பாட்டின் பற்றாக்குறை மற்றும் அறிவார்ந்த ஈடுபாடு இல்லாதது முக்கிய தடைகளில் ஒன்றாகும்," என்று அவர் கூறினார்.

 

இமாம் ஹுஸைன் (அலை) அவர்களின் புரட்சியை விளக்குவதில் நம்பகத்தன்மையற்ற தனிநபர்களின் தலையீடு மற்றும் நம்பகத்தன்மையற்ற ஆதாரங்களின் பங்களிற்பிக்கு எதிராக அவர் எச்சரித்தார், அவை இரண்டாவது பெரிய தடை என்று ஹமீத் கராத்தி சுட்டிக் காட்டினார். "மூன்றாவது சவால்," ஹமீத் கராத்தி தொடர்கையில், "ஆன்லைன் மற்றும் ஆஃப்லைன் தளங்களில் இமாம் ஹுஸைன் (அலை) அவர்களின் எழுச்சியின் அகநிலை, அவர்களுடன் கர்பலா போரில் பங்கேற்ற அவர்களின் குழு, பயன்படுத்திய உத்தி ஆகியவை பற்றிய பொறுப்பற்ற விளக்கங்கள் மற்றும் அவற்றின் பிரபலம்."

 

‘அதீத உணர்ச்சிவசப்படுதல்’ மற்றொரு கடுமையான தடை என்று அவர் குறிப்பிட்டார் – எங்கு உணர்வுகளும் பேரார்வமும் பகுத்தறிவை விட அதிகமாக இருக்குமோ அங்கு தெளிவு பிறப்பது கடினமே. "உணர்ச்சி என்பது இன்பம் மற்றும் துன்பம் இரண்டிலும் இயற்கையான மனித வெளிப்பாடு," என்று அவர் விளக்கிய அவர் மேலும் கூறுவதாவது, "ஆனால் உணர்ச்சி, பகுத்தறிவு மற்றும் சிந்தனைமிக்க பிரதிபலிப்பை மழுங்கச் செய்யக்கூடாது. பகுத்தறிவுதான் மனிதர்களை மற்ற உயிரினங்களிலிருந்து வேறுபடுத்திக் காட்டுகிறது" என்றார்.

 

உணர்ச்சிகள் முக்கியமானவை மற்றும் தவிர்க்க முடியாதவை என்றாலும், ஆன்மீக புரிதல் உணர்ச்சியிலிருந்து பகுத்தறிவை நோக்கி நகர வேண்டும், மாற்றமாக அல்ல என்று ஹமீத் கராத்தி வாதிட்டார். "நீண்ட காலமாக அதிகப்படியாக உணர்ச்சிவசப்படுதல் என்பது தனிப்பட்ட ரீதியாகவும் சமூக ரீதியாகவும் மனிதகுலத்தின் மிகப்பெரிய ஆபத்துகளில் ஒன்றாக மாறியிருக்கிறது," என்றும் ஹமீத் கராத்தி கூறினார்.

 

கி.பி 680 இல் கர்பலா போரில் இமாம் ஹுஸைன் (அலை) அவர்கள் மற்றும் அவரது தோழர்கள் ஷஹீதாக்கப்பட்ட இஸ்லாமிய மாதமான முஹர்ரம் மாதத்தின் 10 வது நாளான ஆஷுராவின் நிகழ்வுகளைப் பற்றி குறிப்பிடுகையில், "இந்த நிகழ்வு சக்திவாய்ந்த மற்றும் மனதை இளக்குகிற காட்சிகளால் நிரம்பியுள்ளது, ஆனால் அதைப் பற்றிய நமது பார்வை அதன் உணர்ச்சிகரமான அம்சங்களுடன் மட்டுப்படுத்தப்படக்கூடாது." என்று எச்சரித்தார்.

 

உணர்ச்சியின் மூலம் மட்டுமே பெறப்படும் அறிவு தற்காலிகமானது என்று சுட்டிக்காட்டிய அவர் மேலும் கூறுகையில், "சுவாரஸ்யமாக, நம்பகமான வரலாற்று ஆதாரங்கள் இமாம் ஹுஸைன் (அலை) அவர்களின் நடத்தை, பேச்சுகள் மற்றும் நடவடிக்கைகள் பெரும்பாலும் தர்க்கம் மற்றும் பகுத்தறிவை அடிப்படையாகக் கொண்டவை என்பதையும் வெளிப்படுத்தி காட்டுகின்றன. தன்னைப் பின்பற்றுபவர்களையும், எதிரிகளையும் சிந்தித்து செயல்பட இமாம் ஹுஸைன் (அலை) அவர்கள் அழைப்பு விடுத்தார்கள். அவர்களின் நடத்தையால் இன்னும் சிலர் வழிநடத்தப்படுவார்கள் என்ற நம்பிக்கையில், எதிரிகளை எதிர்கொண்டபோதும் அவர்களுடன் கோபத்தோடு பேசாமல், இரக்கத்தோடு அணுகினார்கள்."

 

இந்த பகுத்தறிவு மற்றும் கொள்கை அணுகுமுறை, மகாத்மா காந்தி போன்ற முஸ்லிம் அல்லாத தலைவர்கள் கூட இமாம் ஹுஸைன் (அலை) அவர்களை உத்வேகத்தின் ஆதாரமாகப் பார்த்தார்கள் என்பதை விளக்குகிறது என்று ஹமீத் கராத்தி கூறினார். "போரின் குழப்பத்திலும் இமாமின் பகுத்தறிவு தெளிவாகவும் தனித்தும் நிற்கின்றன," என்று அவர் மேலும் கூறினார்.

 

ஒரு வரலாற்று நபரைப் பின்தொடரும்போது இரண்டு மட்டங்களில் பகுத்தறிவு தேவைப்படுகிறது என்று கூறிய அவர், "முதலில், அந்த நபரின் வீர பண்புகளைத் தாண்டி அவரின் நிலையான மற்றும் கொள்கை ரீதியான நடத்தைகளில் நாம் கவனம் செலுத்த வேண்டும். இரண்டாவதாக, வெவ்வேறு சவால்களுக்கு அவர்களின் அணுகுமுறையை பகுப்பாய்வு செய்ய நமது சொந்த பகுத்தறிவைப் பயன்படுத்த வேண்டும். அப்போதுதான் நாம் பின்பற்றத் தகுந்த செயல் மற்றும் தர்க்கத்தின் மாதிரியைப் பிரித்தெடுக்க முடியும்."

 

ஹமீத் கராத்தியின் இக்கருத்துக்கு ஒப்பான கருத்தை ஈரானின் மற்றுமொரு அறிஞர் டாக்டர் நெமத்துல்லா சஃபாரி ஃபோரோஷானி, ஆஷுரா என்பது ஒரு வரலாற்று நிகழ்வு மட்டுமல்ல, அது ஷியா இஸ்லாமின் ஆன்மீக மற்றும் இறையியல் அடித்தளமாகும் என்று வலியுறுத்துகிறார். கும்மில் ஒரு அறிஞர் அமர்வில் பேசிய அவர், வரலாற்று பகுப்பாய்வை மட்டுமே நம்பியிருப்பது மதச்சார்பற்றதாக மாறும் அபாயம் உள்ளது என்று எச்சரிக்கிறார். அதற்கு பதிலாக, அஷுராவின் முக்கியத்துவத்தை முழுமையாக புரிந்துகொள்ள ஃபிக்ஹ் (இஸ்லாமிய சட்டவியல்), இறையியல், சமூகவியல், மற்றும் காவிய ஆய்வுகள் உள்ளிட்ட ஒரு பல்துறை அணுகுமுறைக்கு அவர் வாதிடுகிறார். அவரின் கருத்தில் அடங்கியுள்ள முக்கிய கூறுகளாவன:

• ஆஷுரா என்பது கடந்த கால அவலம் மட்டுமல்ல, அது ஷீஆ அடையாளத்தின் ஒரு அடிப்படைத் தருணம்.
• ஹதீஸ், இல்ம் அல்-ரிஜால் போன்ற இஸ்லாமிய அறிவியலை வரலாற்றாசிரியர்கள் புரிந்து கொள்ள வேண்டும்.
• அறிவார்ந்த ஈடுபாட்டின் நான்கு நிலைகளான பரிச்சயம், தேர்ச்சி, நிபுணத்துவம் மற்றும் வாழ்நாள் முழுவதுமான இறை நம்பிக்கை ஆகியவற்றை அவர் கோடிட்டுக் காட்டுகிறார்.
• இமாம் ஹுஸைன் (அலை) அவர்களின் தியாகம் ஒரு வரலாற்று சத்தியம் மட்டுமல்ல, எதிர்ப்பு மற்றும் நீதியின் நிலைத்திருக்கும் மற்றும் தொடரும் அடையாளமாகும்.

 

ஈரானிய அறிஞர் ஹுஜ்ஜதுல் இஸ்லாம் நஜாஃப் லக்சாய் ஆகியோரும், இமாம் ஹுஸைன் (அலை) அவர்களின் யஸீதுக்கு எதிரான எழுச்சி நவீனகால கொடுங்கோல் ஆட்சி மற்றும் அநீதியை எதிர்ப்பதற்கான காலமற்ற வரைபடமாக செயல்படுகிறது என்று வாதிடுகிறார்கள். குர்ஆனிய ஆட்சி குறித்த ஆன்லைன் கருத்தரங்கில் பேசிய லக்சாய், யஸீதின் ஆட்சியை ஃபிர்அவ்னின் அடக்குமுறை ஆட்சியுடன் ஒப்பிடுகிறார், இமாம் ஹுஸைன் (அலை) அவர்கள் யஸீதின் தலைமையை சட்டவிரோதமானது மற்றும் இஸ்லாத்திற்கு ஆபத்தானது என்று கருதுவதாகவும் வலியுறுத்துகிறார். அவர் தெரிவிப்பதாவது:

• இமாம் ஹுஸைன் (அலை) அவர்கள் மதீனாவிலிருந்து வெளியேறுவதை நியாயப்படுத்த குர்ஆன் வசனமான அல்-கசாஸ் 21 ஐ மேற்கோள் காட்டி, யஸீதுக்கு விசுவாசத்தை மறுத்தார்.
• யஸீதின் சொந்த எழுத்துக்கள் மத விழுமியங்களை கேலி செய்தன, இது இவனை எதிர்க்க இமாமின் முடிவை வலுப்படுத்தின.
• இமாம் ஹுஸைன் (அலை) அவர்களின் மரபு உலகளாவிய ஒடுக்குமுறைக்கு எதிரான தொடர்ச்சியான எதிர்ப்பைத் தூண்டுகிறது என்றும், இன்றும் சத்தியத்தின் பாதையைத் தேர்ந்தெடுக்க மக்களை வலியுறுத்துகிறது என்றும் அறிஞர் முடிக்கிறார்.

 

இக்கருத்துக்களை திறம்பட புரிந்துகொண்டு கர்பலா என்பது வெறும் வரலாறு அல்ல - அது ஒரு தார்மீக திசைகாட்டி என்பதை ஒரு கிளர்ச்சியூட்டும் நினைவூட்டலாக நோக்குவோம்.

 

https://iqna.ir/en/news/3493836/emotional-interpretations-obscure-true-message-of-imam-hussein%E2%80%99s-uprising-scholar

 

 

 

 

 

 

 

அர்பயீன் யாத்திரை: அன்பு மற்றும் அர்ப்பணிப்பை உணர்த்தும் உலகின் மிகப்பெரிய யாத்திரை

 Arbaeen Walk: World’s largest pilgrimage of love and devotion

 

 

ஸியாரத் அர்பயீன் என்பது ஈராக்கில் உள்ள புனித நகரமான கர்பலாவில் நடைபெறும் வருடாந்த யாத்திரை ஆகும். ஒவ்வொரு ஆண்டும் மில்லியன் கணக்கான யாத்ரீகர்கள் ஈராக்கின் கர்பலாவுக்கு வருகிறார்கள், பெரும்பாலும் அருகிலுள்ள நகரமான நஜாஃப்பிலிருந்து பாதயாத்திரையாக அங்கு வருகிறார்கள்.

 

இமாம் ஹுஸைன் இப்னு அலீ (அலை) அவர்கள் இஸ்லாத்திற்காக உயிர் நீத்த தியாக ஆண்டு நிறைவைக் குறிக்கும் 40 நாட்களைக் கொண்ட அர்பயீன் யாத்திரை, உலகெங்கிலும் இருந்து பல்லாயிரக்கணக்கான மக்களை ஈர்க்கும் உலகின் மிகப்பெரிய அமைதியான கூட்டமாக கருதப்படுகிறது.

 

ஈராக்கில் சுன்னி சமூகத்தை ஆதரித்த ஈராக்கிய ஜனாதிபதி சதாம் ஹுசைன் (1979-2003) அவருடைய ஆட்சிக் காலத்தில் அர்பயீன் யாத்திரையை அரசியல் அச்சுறுத்தலாகக் கருதி தடை செய்தார். 2003 ஆம் ஆண்டில் சதாம் பதவி நீக்கம் செய்யப்பட்ட உடனேயே இந்த யாத்திரை புமீண்டும் உயிர்பெற்றது, இந்த பல நாள் நிகழ்விற்கான மொத்த வருகை எண்ணிக்கை அந்த ஆண்டில் இரண்டு மில்லியன் பங்கேற்பாளர்களிலிருந்து 2008 ஆம் ஆண்டில் ஒன்பது மில்லியனாக அதிகரித்தது, மேலும் 2014 ஆம் ஆண்டில் சுமார் இருபது மில்லியனாக அதிகரித்து, அந்த ஆண்டின் புனித யாத்திரையை வரலாற்றில் இந்து திருவிழாவான கும்பமேளாவுக்கு அடுத்தபடியாக இரண்டாவது பெரிய கூட்டமாக ஆக்கியது. இந்த எண்ணிக்கை 2015 ஆம் ஆண்டில் இருபத்தி இரண்டு மில்லியனை எட்டியதாக ஈராக் அரசு தரப்பு ஊடகங்கள் தெரிவிக்கின்றன. 2016 ஆம் ஆண்டில், அல்-கோயி அறக்கட்டளை சுமார் இருபத்தி இரண்டு மில்லியன் யாத்ரீகர்களை மதிப்பிட்டுள்ளது. கும்பமேளா உலகின் மிகப்பெரிய கூட்டமாக கருதப்பட்டாலும் இது மூன்று ஆண்டுகளுக்கு ஒரு முறையே நடத்தப்படுகிறது. இருப்பினும் அர்பயீன் யாத்திரை வருடா வருடம் இருபதிற்கும் மேற்பட்ட மில்லியன் மக்களால் கூடப்படுவதால், இது “உலகின் மிகப்பெரிய வருடாந்திர கூட்டம்” ஆக கருதப்படுகிறது. கடந்த 3 வருடங்களில்- 2022, 2023, 2024- அர்பயீன் யாத்ரீகர்களின் வருகை அண்ணளவாக;

• 2022 - 22.1 மில்லியன்
• 2023 - 22 மில்லியன்
• 2024 - 21.4 மில்லியன்

 

ஆஷுரா எனப்படும் முஹர்ரம் பத்தாம் நாளுக்குப் பிறகு நாற்பது நாட்களை அர்பயீன் குறிக்கிறது. ஹிஜ்ரி 61 (கி.பி. 680) இல் இந்த நாளில், உமய்யா கலீபா யஸீத் இப்னு முஆவியாவின் (ஆட்சி. 680-683) இராணுவத்திற்கு எதிரான கர்பலா போரில் இமாம் ஹுஸைன் (அலை) அவர்கள் தனது உறவினர்கள் மற்றும் அவரது சிறிய கூட்டத்தாருடன் கொல்லப்பட்டார்.

 

இஸ்லாமிய நாட்காட்டியின் இரண்டாவது மாதமான சஃபர் மாதத்தில் ஒவ்வொரு ஆண்டும் ஈராக்கின் வறண்ட பாலைவனங்கள் மனிதகுலத்தின் அன்பு மற்றும் ஒற்றுமையின் மிகப்பெரிய வெளிப்பாட்டின் கட்டமாக இந்த ஸியாரத் அர்பயீன் மாற்றுகிறது. அரபு மொழியில், "அர்பயீன்" என்றால் "நாற்பது" என்று பொருள், இமாம் ஹுஸைன் (அலை) அவர்கள் இறந்த 40 வது நாளை இது குறிக்கும், மேலும் "ஸியாரத்" என்றால் "வருகை" என்று பொருள். ஹஜ் (மக்காவுக்கு புனித யாத்திரை) போன்று ஸியாரத் அர்பயீன் யாத்திரை ஒரு இஸ்லாமிய கடமையாக கருதப்படவில்லை என்றாலும், இது ஷியாவின் ஆன்மீக வாழ்க்கையில் ஒரு ஒருங்கிணைந்த பங்கை வகிக்கிறது.

 

மூன்றாவது ஷியா இமாமும் நபிகள் நாயகத்தின் பேரனுமான இமாம் ஹுஸைன் (அலை) அவர்கள் கி.பி 680 இல் கர்பலா போரில் ஷஹீதானார். அவர்களின் மரணத்தை கௌரவிக்கும் வகையில் இந்த யாத்திரை வருடாந்தம் மேற்கொள்ளப்படுகிறது. முஸ்லீம் வரலாற்றாசிரியர்களால் பெரும்பாலும் இறை நிந்தனையாளர் மற்றும் ஒழுக்கக்கேடானவர் என்று சித்தரிக்கப்படும் அன்றைய ஆட்சியாளரான யஸீதுக்கு விசுவாசத்தை உறுதிமொழி எடுக்க மறுத்த இமாம் ஹுஸைன் (அலை) அவர்கள், ஒரு சிறிய குடும்பம் மற்றும் விசுவாசமான தோழர்களுடன், கொடுங்கோல் ஆட்சிக்கு எதிராக 40,000 பேர் கொண்ட இராணுவத்தை எதிர்த்து நின்றார். அவரது தியாகம் - அவரது குழந்தை மற்றும் அன்புக்குரியவர்களுடன் - தைரியம், நீதி மற்றும் தியாகத்தின் காலமற்ற அடையாளமாக மாறியது. ஷியா கோட்பாட்டில், கர்பலா நன்மைக்கும் தீமைக்கும் இடையிலான நித்திய போராட்டத்தையும், சுய தியாகத்தின் உச்சத்தையும் குறிக்கிறது.

 

ஸியாரத் அர்பயீன் கர்பலாவின் இயக்கத்தில் ஒரு முக்கியமான திருப்புமுனையைக் குறிக்கிறது. ஆஷுரா நாளின் முக்கியத்துவத்திற்கு ஒத்த இந்த நாள் பல காரணங்களுக்காக சிறப்பு பெறுகிறது – அஹ்லுல் பைத்கள் இந்த நாளில் கர்பலா நாட்டை அடைந்து இஸ்லாத்திற்காக தங்கள் உயிரைக் கொடுத்த ஸையித் அல்-ஷுஹதா இமாம் ஹுஸைன் (அலை) அவர்களுக்கும் அவர்களின் விசுவாசமான குடும்பத்தினர் மற்றும் நண்பர்களின் தியாகத்தை மதித்து நினைவுகூரும் நாளாகும்.

 

நஜாஃப் முதல் கர்பலா வரை: நம்பிக்கையின் நடைப்பயணம்

 

அர்பயீன் பயணம் பெரும்பாலும் புனித நகரமான நஜாப்பில் தொடங்குகிறது, அங்கு யாத்ரீகர்கள் இமாம் ஹுஸைன் (அலை) அவர்களின் தந்தையும் ஷியா முஸ்லிம்களின் முதல் இமாமுமான இமாம் அலீ (அலை) அவர்களின் ஸியாரத்திற்கு வருகை தருகிறார்கள். அங்கிருந்து கர்பலாவை நோக்கி 50 மைல் (80 கிலோமீட்டர்) மலையேற்றத்தை மேற்கொள்கின்றனர். ஈராக்கின் கடுமையான வெயிலின் கீழ் திறந்த பாலைவனத்தின் வழியாக அமையப்பெறும் இந்த நடைப்பயணம் முழுமையடைவதற்கு பல நாட்கள் எடுக்கும். இருப்பினும், வயது, உடல்நலம் அல்லது பிராந்திய எல்லைகளை கடந்து, யாத்ரீகர்கள் விடாமுயற்சியுடன் இந்த பயணத்தை மேற்கொள்கின்றனர் - தங்கள் இறைபக்தியால், ஆன்மீகத்தால் ஒன்றுபடுகிறார்கள்.

 

வழியில், ஆயிரக்கணக்கான மௌகிப்கள் (Mawkibs - தன்னார்வ சேவை நிலையங்கள்) சாலையில் வரிசையாக நின்று, இலவச உணவு, தண்ணீர், மருத்துவ உதவி மற்றும் ஓய்வு நிலையங்களை வழங்குகின்றன. இங்கு விருந்தோம்பலுக்கு எல்லையே இல்லை; ஏழைகள் கூட தங்களால் முடிந்ததை கொடுக்கிறார்கள் - வீட்டில் சமைத்த உணவு முதல் சோர்வடைந்த பயணிகளுக்கு எளிய கால் மசாஜ் வரை. ஈராக்கியர்கள், ஈரானியர்கள் மற்றும் டஜன் கணக்கான பிற நாடுகளைச் சேர்ந்தவர்கள் இந்த நிலையங்களை நடத்துகிறார்கள், இது இமாம் ஹுஸைன் (அலை) அவர்களின் தாராள மனப்பான்மை மற்றும் தன்னலமற்ற மதிப்புகளை உள்ளடக்கியது.

 

அர்பயீன் இன் உள்ளார்ந்த அர்த்தம்

தமிழில் "நாற்பது" என்று பொருள் படும் "அர்பயீன்", பாரம்பரிய 40 நாள் துக்க காலத்தின் முடிவைக் குறிக்கிறது. ஷியா முஸ்லிம்களைப் பொறுத்தவரை, புனித யாத்திரை என்பது ஒரு மத சடங்கை விட மேலானது - இது இமாம் ஹுஸைன் (அலை) அவர்கள் தன்னை இழந்து பாதுகாத்த இஸ்லாமிய மதிப்புகளை நிலைநிறுத்துவதற்கான ஒரு உறுதிமொழியாகும். "லப்பைக் யா ஹுஸைன்" ("நான் இங்கே இருக்கிறேன், ஓ ஹுஸைன்") என்ற பயணிகளின் கோஷம் சாலை முழுவதும் எதிரொலிக்கிறது, இது உண்மை மற்றும் நீதிக்கான தனது பணியைத் தொடர யாத்ரீகர்களின் தயார்நிலையைக் குறிக்கிறது.

 

 

ஒற்றுமைக்கான உலகளாவிய செய்தி

ஸியாரத் அர்பயீன் யாத்திரையை தனித்துவமாக்குவது அதன் உள்ளடக்கம் மற்றும் பன்முகத்தன்மை கொண்ட உள்ளார்ந்த அர்த்தம். ஷியா, சுன்னி, கிறிஸ்தவர் மற்றும் நாத்திகர்கள் என அனைத்து மதங்களையும் சேர்ந்த பார்வையாளர்கள் ஒன்றாக நடந்து, உணவு மற்றும் கதைகளைப் பகிர்ந்து கொள்கிறார்கள். ஒவ்வொரு கண்டத்திலிருந்தும் தேசியக் கொடிகள் ஒருமித்த குரலில் அசைந்து, ஒரு சக்திவாய்ந்த செய்தியை வெளிப்படுத்துகின்றன: இமாம் ஹுஸைன் (அலை) அவர்களின் மரபு அனைத்து மனிதகுலத்திற்கும் சொந்தமானது.

 

பலருக்கு, அர்பயீன் என்பது கற்றல் மற்றும் உரையாடலுக்கான நேரம். யாத்ரீகர்கள் கருத்துக்களைப் பரிமாறிக்கொள்கிறார்கள், சமூக மற்றும் அரசியல் பிரச்சினைகளைப் பற்றி விவாதிக்கிறார்கள் மற்றும் கலாச்சாரங்களுக்கிடையேயான பிணைப்புகளை வலுப்படுத்துகிறார்கள். இன்றைய உலகில் சமாதான சகவாழ்வுக்கு இது ஒரு உயிர்ப்புள்ள சிறந்த உதாரணம்.

 

கர்பலா வருகை

களைத்துப்போன பயணிகளுக்கு, கர்பலாவின் தங்க குவிமாடங்களின் காட்சி பிரமிக்க வைக்கிறது. இமாம் ஹுஸைன் (அலை) அவர்கள் மற்றும் அவரது சகோதரர் ஹஸ்ரத் அப்பாஸ் (அலை) ஆகியோரின் அடக்கஸ்தலங்களுக்கு இடையிலான இடமான பய்ன் அல்-ஹரமைன் (Bayn al-Haramayn) இற்க்குள் நுழையும்போது கண்ணீர் ததும்புகிறது. இங்கே, அவர்கள் பெருந்திரள் துக்க அனுஷ்டானங்களில் கலந்துகொள்கிறார்கள், துஆ பிரார்த்தனைகளை ஓதுகிறார்கள், தொண்டு செயல்களைச் செய்கிறார்கள் - ஒவ்வொரு யாத்ரீகரும் தங்கள் ஆன்மீக தொடர்பை ஆழமாக வலுப்படுத்துகிறார்கள்.

 

இது ஏன் முக்கியமானது

அர்பயீன் யாத்திரை என்பது உலகின் மிகப்பெரிய வருடாந்திர கூட்டம் மட்டுமல்ல - இது தன்னலமற்ற தன்மை, ஒற்றுமை மற்றும் ஒடுக்குமுறைக்கு எதிரான எதிர்ப்பின் ஒரு நெகிழ்ச்சியான வெளிப்பாடு. நபிகள் நாயகம் (ஸல்) அவர்களின் வார்த்தைகளில்: "ஹுஸைன் என்னைச் சேர்ந்தவர், நான் ஹுஸைனைச் சேர்ந்தவன். ஹுஸைனை நேசிப்போரை அல்லாஹ் நேசிக்கின்றான்."

 

மில்லியன் கணக்கானவர்கள் தாயகம் திரும்புகையில், அவர்கள் தங்களுடன் ஒரு புனிதமான பயணத்தின் நினைவுகளை மட்டும் சுமக்கவில்லை, மாறாக இமாம் ஹுஸைன் (அலை) அவர்கள் இஸ்லாத்தை பாதுகாக்க தனது உயிரைக் கொடுத்த கொள்கைகளின்படி வாழ்வதற்கான புதுப்பிக்கப்பட்ட அர்ப்பணிப்பையும் ஏந்திச் செல்கின்றனர்.

https://en.mehrnews.com/news/234993/Arbaeen-Walk-World-s-largest-pilgrimage-of-love-and-devotion

கர்பலா முதல் காசா வரை: அநீதிக்கு எதிரான அணிதிரள்வு முழக்கம்

 From Karbala to Gaza: A rallying cry against injustice that won't be silenced

 

பதினான்கு நூற்றாண்டுகளுக்கு முன்பு கர்பலாவின் பாலைவன சமவெளியில் எதிர்ப்பையும் தார்மீக தைரியத்தையும் மறுவரையறை செய்த 'தியாகிகளின் தலைவரை' கௌரவிப்பதற்காக உண்மை மற்றும் நீதியின் குரல்கள், இனம், பிரிவு மற்றும் சித்தாந்தத்தின் கோட்பாடுகளைக் கடந்து ஒன்றுபட்டு எழும் ஆண்டின் அந்த தருணம் இது.

 

யஸீதின் கொடுங்கோல் ஆட்சிக்கு எதிராக ஹிஜ்ரி 61 இல் (கி.பி. 680) இமாம் ஹுஸைன் (அலை) அவர்கள் நடத்திய எழுச்சி, மனித வரலாற்றில் இணையற்ற மற்றும் உலகெங்கிலும் உண்மை மற்றும் நீதியின் பிரச்சாரகர்களுக்கு தொடர்ந்து ஊக்கமளித்து உந்துதல் அளிக்கும் ஒரு சிறந்த தமைத்துவமாகும்.

 

நபிகள் நாயகம் (ஸல்) அவர்களின் அன்புப் பேரன் ஹுஸைன் இப்னு அலீ (அலை) அவர்கள் அதிகாரத்திற்காகவோ, பதவிக்காகவோ அல்லது சலுகைக்காகவோ போராடவில்லை. உண்மை மற்றும் பொய்மை, நீதி மற்றும் கொடுங்கோல் ஆட்சி, கண்ணியம் மற்றும் அவமதிப்பு ஆகியவற்றின் முனையில் நின்று, வரலாற்றின் சத்திய பாதையில் பயணிக்க முடிவு செய்தார்.

 

பாரசீக கவிஞன் இக்பால் லஹோரியின் பிரபல கூற்றை போல், "ஹுஸைன் (அலை) அவர்கள் சுதந்திரத்தின் வறண்ட தோட்டத்தை தனது இரத்த அலையால் ஈரலிப்பாக்கி, சர்வாதிகாரத்தை வேரோடு பிடுங்கி, துயிலில் இருந்த முஸ்லீம் தேசத்தை எழுப்பினார்."

 

கர்பலா போர் அதிகாரத்திற்கான போராட்டம் அல்ல. அது இரத்தத்திற்கும் வாளுக்கும் இடையிலான மோதல். ஹுஸைன் (அலை) அவர்கள், 71 விசுவாசமான தோழர்களுடன், 30,000 பேர் கொண்ட இராணுவத்தை எதிர்த்து நின்றார். அவரது தெரிவு தெளிவாக இருந்தது, நோக்கம் ஆன்மீக நியமங்களை அடிப்படையாகக் கொண்டது.

 

மதீனாவின் ஆளுநர் வலீத் இப்னு உக்பா, ஹுஸைன் (அலை) அவர்களை யஸீதுக்கு விசுவாசியாக உறுதிமொழி எடுக்க அழைத்தபோது, ஹுஸைன் (அலை) அவர்கள், காலத்தின் அடிவாரங்களில் இன்னும் எதிரொலிக்கும் ஒரு பிரகடனத்துடன் பதிலளித்தார்: "என்னைப் போன்ற ஒரு மனிதன் அவரைப் போன்ற ஒரு மனிதனுக்கு விசுவாசத்தை உறுதிமொழி எடுக்க முடியாது."

 

ஒவ்வொரு ஆண்டும், முஹர்ரம் மாதத்தில், விசுவாசிகள் கர்பலாவின் நடவடிக்கைகள் மூலம் ஹுஸைன் (அலை) அவர்களின் நித்திய கொள்கைகளுக்கு தங்கள் உறுதிமொழியை மீண்டும் உறுதிப்படுத்துகிறார்கள். இந்த வருடாந்த நினைவுகூரல்கள் துக்கத்தை மையமாகக் கொண்ட சடங்குகள் அல்ல, இவை எதிர்ப்பின் சக்திவாய்ந்த செயல்களாகும், மற்றும் அதிகாரத்திற்கு உண்மையைப் பேசுவதற்கான உறுதியை மீண்டும் தூண்டுகிற செயல்களாகும், கர்பலாவில் ஹுஸைன் (அலை) அவர்கள் தனது இரத்தத்தின் மூலம் செய்ததைப் போல, அவரது சகோதரி ஸைனப் பின்த் அலீ (ரலி) அவர்கள் கர்பலாவுக்குப் பிறகு தனது வார்த்தைகளால் செய்தார்.

 

கர்பலாவின் செய்தி காலத்தால் அழியாதது. ஸியாரத் அஷுராவில், நம்பிக்கையாளர்கள் துஆ பிரார்த்தனை செய்கிறார்கள்: "யா அல்லாஹ், நீதிக்காக எழுந்து நிற்க எங்களுக்கு கண்ணியத்தை வழங்குவாயாக..." இது எங்கெல்லாம் அநீதி தலைவிரித்தாடுகிறதோ அங்கெல்லாம் கர்பலாவின் இலட்சியத்தை முன்னெடுத்துச் செல்வோம் என்ற உறுதிமொழியின் வெளிப்பாடாகும்.

காஸா இன்றைய கர்பலா என்று சொன்னால் அது மிகையாகாது. ஊழல் மற்றும் கொடுங்கோலன் உமய்யாத் ஆட்சிக்கு எதிராக ஹுஸைன் (அலை) அவர்களின் எழுச்சி, கடந்த காலத்திலிருந்த ஒரு அத்தியாயம் மட்டுமல்ல, அது நிகழ்காலம் வரை உயர்த்திப் போற்றப்பட்ட ஒரு பிரதிபலிக்கும் கண்ணாடியாகும்.

 

"ஒவ்வொரு நாளும் ஆஷுரா, ஒவ்வொரு நிலமும் கர்பலா" என்று அடிக்கடி மேற்கோள் காட்டப்படும் சொற்றொடர் மீண்டும் மீண்டும் சொல்லப்படும் ஒரு மறு கூற்றாக தோன்றலாம், ஆனால் அதன் உள்ளார்த்தம் மிகவும் பொருத்தமானது. உரிமைக்கும் வலிமைக்கும் இடையிலான போராட்டம் காலம் அல்லது புவியியலால் மட்டுப்படுத்தப்படவில்லை என்பதை நமக்கு நினைவூட்டுகிறது - நேற்று கர்பலா, இன்று காஸா.

 

அக்டோபர் 2023 முதல் முற்றுகையிடப்பட்ட காசா பகுதியில் மக்கள் மீது கட்டவிழ்த்து விடப்பட்ட கொடூரங்கள், ஒரு காலத்தில் கர்பலா சமவெளியில் இருந்து எழுந்த ஒடுக்கப்பட்டவர்களின் கூக்குரல்களை எதிரொலிக்கின்றன. பயங்கரமும் கொடுங்கோலும் பல முகங்களை அணிந்து பல கொடிகளை பறக்கவிடுகின்றன, ஆனால் அவற்றின் தன்மை மாறவில்லை. நம் காலத்து யஸீதை இனங்கண்டு ஹுஸைன் (அலை) அவர்கள் நமக்கு போதித்தபடி பதிலளிப்பது நமது கடமையாகும்.

 

"அவமானத்துடன் வாழ்வதை விட கண்ணியத்துடன் கூடிய மரணம் சிறந்தது" என்று சவால்களின் தலைவர் கூறினார். ஒரு நிறவெறி ஆட்சி, 76 ஆண்டுகளாக, பாலஸ்தீனிய நிலத்தை ஆக்கிரமித்துள்ளது, குடும்பங்களை இடம்பெயர்த்துள்ளது, வீடுகளைக் கொள்ளையடிக்கிறது, எதிர்ப்பின் தீயை அணைக்க முயன்றுள்ளது.

 

அக்டோபர் 2023 முதல், காசாவில் 56,000 க்கும் மேற்பட்டவர்கள், பெரும்பாலும் குழந்தைகள் மற்றும் பெண்கள், கொடூரமாக கொல்லப்பட்டுள்ளனர். காசாவில் ஒவ்வொரு நாளும் ஏதோ ஒரு குடும்பத்தின் கர்பலா ஆகிவிட்டது.

 

உயிரற்ற குழந்தைகளை தொட்டிலில் போடும் தாய்மார்கள், தங்கள் அன்புக்குரியவர்களுக்காக இடிபாடுகளை தோண்டும் தந்தைகள், முழு அண்டை பகுதிகளும் சல்லடை கண்ணாக தூளாகிவிட்டதை, மருத்துவமனைகள் மற்றும் பள்ளிகள் ஈவு இரக்கமின்றி, மனிதாபிமானமின்றி குண்டுவீசித் தகர்க்கப்படுவதை, அகதி முகாம்கள் இலக்கு வைக்கப்படுவதை நாம் காண்கிறோம். இது ஒடுக்குமுறையாளரின் எல்லையில்லா கொடுமையை உணர்வுபூர்வமாக காட்டுகிறது.

 

ஆனாலும் பாலஸ்தீன மக்கள் மண்டியிட மறுத்துவிட்டனர். தங்கள் மன உறுதியையும் நேர்மையையும் தவிர வேறெதுவும் இல்லாத நிலையில், உலக வல்லரசுகளின் ஆதரவுடன் மிகவும் கொடூரமான இராணுவ இயந்திரங்களில் ஒன்றை அவர்கள் எதிர்கொண்டுள்ளனர். அவர்களின் எதிர்ப்பு ஹுஸைனி உணர்வை; "மரணம் வரை, எந்த சரணடைதலும் இல்லை." என்பதை பிரதிபலிக்கிறது.

 

கர்பலாவில் தாகத்தால் தவித்த ஒரு குழந்தை அம்பினால் தாக்கப்பட்டது. வீரம் செறிந்த இளைஞன் ஒருவன் போர்வீரனைப் போல போரிட்டான். கொடி ஏந்தியவர் தண்ணீர் எடுக்க அணிவகுத்துச் சென்றவர் திரும்பி வரவேயில்லை. அதே தியாகத் தன்மையே இன்று பாலஸ்தீனியர்களின் நரம்புகளில் ஓடுகிறது, அவர்கள் தங்கள் எதிர்ப்பை அசாதாரண தைரியத்துடன் சுமக்கிறார்கள்.

 

"எனக்கு உதவ யாராவது இருக்கிறார்களா?" என்ற ஹுஸைன் (அலை) அவர்களின் கூக்குரல் யஸீதின் இராணுவத்திற்கான ஒரு வேண்டுகோள் அல்ல. இது மனிதகுலத்தின் மனசாட்சிக்கு காலமற்ற அழைப்பு. ஒவ்வொரு ஆண்டும், நஜாஃபிலிருந்து கர்பலாவுக்கு அர்பீனில் லட்சக்கணக்கானோர் அணிவகுத்துச் செல்லும்போது, அவர்கள் பதிலளிக்கிறார்கள்: லப்பைக் யா ஹுஸைன் - "இதோ நான் இருக்கிறேன், ஹுஸைனே!"

 

ஹுஸைன் (அலை) அவர்களின் தீபத்தை ஏந்துபவர்கள் ஒருபோதும் வஞ்சகத்துக்கும் பொய்க்கும் அடிபணிய மாட்டார்கள். அது எவ்வளவு செவிடன் காதில் ஊதிய சங்காக இருந்தாலும் சரி, எவ்வளவு வன்முறையான எதிர்வினையாக இருந்தாலும் சரி, அதிகாரத்திடம் உண்மையைப் பேசுகிறார்கள்.

 

இன்று, பாலஸ்தீனியர்கள் அதே புனிதமான மறுப்பைப் பிரதிபலிக்கிறார்கள். ஆக்கிரமிப்புக்கும், உடைமை பறிப்புக்கும், அவமானத்துக்கும் தலைவணங்க மறுக்கிறார்கள். அதனால்தான் முஹர்ரம் என்பது வெறுமனே ஒரு துக்க மாதம் அல்ல - அது உலகெங்கிலும் உள்ள ஒவ்வொரு ஒடுக்கப்பட்ட ஆன்மாவுடனும் ஒருமைப்பாட்டின் கீதமாகும்.

 

டாக்டர் அலி ஷரியாதி நமக்கு நினைவூட்டுவது போல், மனித வரலாறு என்பது "இறைவனின் துருவங்களுக்கும் ஷைத்தானுக்கும் இடையிலான நித்திய மோதலின் வெளிப்பாடு", பெயர்களும் முகங்களும் மட்டுமே மாறுபடும் ஒரு போராட்டம். இன்று ஹுஸைன் (அலை) அவர்களின் வெற்றியையும், யஸீதின் அவமானத்தையும் வரலாறு பதிவு செய்கிறது.

 

டாக்டர் ஷரியாதி மேலும் கூறுகிறார், ஒவ்வொரு புரட்சிக்கும் இரண்டு முகங்கள் உள்ளன: இரத்தம் மற்றும் செய்தி. ஹுஸைன் (அலை) அவர்கள் மற்றும் அவரது தோழர்கள் தங்கள் இரத்தத்தைக் கொடுத்தனர்; "கர்பலாவின் இரட்சகர்" ஸைனப் (ரலி) அவர்கள் அந்தச் செய்தியை எடுத்துச் சென்றார்கள். நாமும் அவ்வாறே செய்ய வேண்டும்.

 

நம் காலத்தின் யாஸிதுகளின் பெயரைச் சொல்லி அவமானப்படுத்துவதும், அவர்களின் கொடுங்கோல் தன்மையை அம்பலப்படுத்துவதும், அசைக்க முடியாத உறுதியுடனும் தைரியத்துடனும் ஒடுக்கப்பட்டவர்களுடன் நிற்பதும் ஆஸாதாரியின் (துக்கம்) பணியாகும். வெறுமனே வார்த்தைகளால் மட்டுமல்ல, செயலாலும், உறுதியாலும், மனசாட்சியாலும் ஆகும்.

 

ஆஸாதாரியின் பாரம்பரியம் கர்பலாவின் கைதிகளான சையதா ஸைனப் (ரலி) அவர்கள், உம்மு குல்சூம் (ரலி) அவர்கள், மற்றும் இமாம் ஜைனுல் ஆபிதீன் (அலை) அவர்கள் ஆகியோருடன் தொடங்கியது. அவர்களின் சொற்பொழிவுகள் யஸீதின் வலிமைமிக்க சாம்ராஜ்யத்தின் அஸ்திவாரத்தையே அசைத்தன. பேசப்பட்ட வார்த்தையும் எழுதப்பட்ட வார்த்தையும் ஒடுக்குபவனுக்கு எதிரான ஆயுதங்களாயின.

 

மதீனாவில் கர்பலாவுக்கு துக்கம் அனுஷ்டிக்கும் கூட்டங்கள் பற்றி யஸீதுக்குத் தெரிவிக்கப்பட்டபோது, அவர் பீதியடைந்து, கிளர்ச்சிக்கு பயந்து இமாம் ஜைனுல் ஆபிதீன் (அலை) அவர்களை மீண்டும் கைது செய்தார். ஆனாலும் எதிர்ப்புணர்வு ஏற்கெனவே வேரூன்றி விட்டது. ஆஸாதாரி விரைவில் பரவினார் – பாக்தாத்திலிருந்து கூஃபா வரை, ஈரானிலிருந்து இந்தியா வரை.

 

இமாம் ஜைனுல் ஆபிதீன் (அலை) அவர்கள் ஆஸாதாரி நிறுவனத்தை நிறுவனமயமாக்கினார்கள். தியாகிகளின் நினைவை உயிரோட்டத்துடன் வைத்திருக்க கவிஞர்கள் அழைக்கப்பட்டனர், அவர்களில் ஒருவர் கலீபா ஹிஷாம் அவர்களின் படைகளால் கைது செய்யப்பட்ட புகழ்பெற்ற கவிஞர் ஃபராஸ்டாக் ஆவார்.

 

இமாம் முஹம்மத் பக்கீர் (அலை) மற்றும் இமாம் ஜாபர் சாதிக் (அலை) ஆகியோர் தங்கள் காலத்தில் ஆஸாதாரிக்கு மேலும் உத்வேகம் அளித்தனர். அவை கர்பலாவின் தத்துவத்தைப் பற்றிய புரிதலை மக்களிடையே ஆழப்படுத்தின. இமாம் மூஸா காசிம் (அலை) அவர்கள் கவிஞர்களை தங்கள் தாய்மொழிகளில் எழுத ஊக்குவித்தார், இது எல்லையை விரிவுபடுத்தியது.

 

பதினான்கு நூற்றாண்டுகளுக்குப் பிறகு, கர்பலாவின் கூக்குரலை யஸீதுகளால் அடக்க முடியாததை போலவே, இன்றைய யஸீதுகளாலும் உண்மையை மௌனமாக்க முடியவில்லை. ஹுஸைன் (அலை) அவர்களின் இரத்தம் இன்னும் பேசுகிறது. ஸைனப் (ரலி) அவர்களின் தூதுக்குழு இன்றும் உயிர்ப்புடன் இருக்கிறது.

 

ஏனெனில், கர்பலா என்பது வெறும் இடம் அல்ல. உண்மை நசுக்கப்படும் ஒவ்வொரு நிலமும் கர்பலா தான். ஆஷுரா என்பது ஒரு நாள் மட்டுமல்ல. அநீதிக்கும், அடக்குமுறைக்கும் எதிராக யாராவது ஒருவர் நிற்கும் ஒவ்வொரு கணமும் ஆஷுரா தான்.

 

அடக்குமுறையாளர்கள் இருக்கும் வரை கர்பலாக்கள் இருப்பார்கள். ஹுசைனிகள் இருக்கும் வரை அநீதிக்கு எதிர்ப்பு இருக்கும். இறுதியில், அதிகாரம் மறைந்துவிடும், அதே நேரத்தில் சத்தியம் நிலைத்திருக்கும்.

 

ஆக்கம்: சையத் ஸபர் மஹ்தி

தமிழில் மஹ்ஜுபா முஸம்மில்

https://www.presstv.ir/Detail/2025/07/05/750670/Islam-Shiism-Imam-Hussain-Karbala-Gaza-Muharram-Ashura-Zeinab-Yazid-Prophet-Mohammad

 

இஸ்லாமிய உலகுக்கான அடித்தளம் இஸ்லாமிய ஒற்றுமை

Islamic unity is the foundation for the Islamic world

இஸ்லாமிய ஈரானின் உச்ச தலைவர் ஆயத்துல்லாஹ் செய்யித் அலீ காமெனயீ அவர்களின் பார்வையில் இஸ்லாமிய ஒற்றுமை

 

உச்ச தலைவரின் அண்மைக்கால உரைகளின் ஒரு ஆய்வு.

 

“ஈரான் முக்கியமல்ல இஸ்லாமே முக்கியம்” எனும் இஸ்லாமிய ஈரானின் உச்ச தலைவர் ஆயத்துல்லாஹ் செய்யித் அலீ காமெனயீ அவர்களின் சமீபத்திய கூற்று, இஸ்லாத்திற்காக ஈரானிய மக்களின் தியாகத்திற்கான தயார்நிலையைக் குறிப்பிடும் அதே வேளை, இஸ்லாமிய ஒற்றுமையை வலியுறுத்தும் மற்றும் உலக முஸ்லிம்களின் மனதில் தாக்கத்தை ஏற்படுத்தும் ஒரு அருமையான கூற்றாகும்.

 

இஸ்லாம் என்பது அமைதி, கருணை, ஒற்றுமை மற்றும் மனிதகுல நலனுக்காக வந்த ஒரு ஆன்மீக மார்க்கம் ஆகும். இதன் அடிப்படை தத்துவங்களுள் ஒன்றாக அமைவது “இஸ்லாமிய உம்மத்தின் ஒருமைப்பாடு” – இது முஸ்லிம்கள் அனைவரும் ஒருவரை ஒருவர் நேசித்து, துணைபுரிந்து வாழ வேண்டும் என்பதைக் குறிப்பிடுகிறது. இன்று உலகம் முழுவதும் முஸ்லிம்கள் பல்வேறு பிரிவுகள், மொழிகள், பழக்கவழக்கங்கள் மற்றும் பண்பாடுகள் கொண்டவர்களாக இருந்தாலும், அவர்களை ஒன்று சேர்க்கும் சக்தி தான் இஸ்லாமிய ஒற்றுமை.

 

இஸ்லாமிய ஒற்றுமை (இத்திஹாத்) என்பது பல்வேறு இஸ்லாமிய பிரிவுகளிடையே நல்ல மற்றும் அமைதியான உறவுகளை நிறுவுவதைக் குறிக்கும் ஒரு சொல். இஸ்லாமிய ஒற்றுமையின் முதன்மை நோக்கம் உலகெங்கிலும் உள்ள அனைத்து முஸ்லிம்களையும் ஒன்றிணைப்பதாகும். முஸ்லிம்களிடையே சுன்னி / ஷியா போன்ற சில பிளவுகள் இருந்தாலும், ஆயத்துல்லாஹ் இமாம் காமெனயீ அவர்கள் போன்ற இஸ்லாமிய ஒற்றுமையின் ஆதரவாளர்களின் கூற்றுப்படி இப் பிளவுகள் என்பது ஒரு அற்பமே. வெவ்வேறு நாடுகளைச் சேர்ந்த முஸ்லிம்கள் ஒருவருக்கொருவர் நெருக்கமான உறவுகளை உருவாக்க வேண்டும் என்பதே இவர்கள் வலியுறுத்தும் கடமையாகும்.

 

சகோதரத்துவம் மற்றும் சகவாழ்வு பற்றிய முக்கியத்துவத்தைப் பற்றியும், முஸ்லிம்கள் மற்ற இனத்தவர்களுடனான உறவு பற்றியும், இனம், தேசிய அல்லது பிராந்தியம் ஆகியவற்றைப் பொருட்படுத்தாமல் செய்யவேண்டியதென்ன என்பதைப் பற்றியும் பரிசுத்த குர்ஆன் ஆலோசனை வழங்குகிறது. “இறைநம்பிக்கையாளர்கள், ஒருவர் மற்றவருக்குச் சகோதரர் ஆவார்கள். எனவே, உங்கள் சகோதரர்களுக்கிடையே தொடர்புகளைச் சீர்படுத்துங்கள். மேலும், அல்லாஹ்வுக்கு அஞ்சுங்கள். உங்கள் மீது கருணை பொழியப்படக் கூடும்.” (49:10)

 

ஆயத்துல்லாஹ் இமாம் காமெனயீ அவர்களின் அண்மைக்கால சொற்பொழிவுகள் சர்வதேச அளவில் கவனம் செலுத்தப்பட்டதாகவும் அவை “இஸ்லாமிய ஒற்றுமை” – அரசியல், பண்பாடு, சாதி, மற்றும் மொழி எல்லையைத் தாண்டிய ஒரு உயர்வான நிகழ்வாக, இஸ்லாமிய சகோதரத்துவத்தை நுணுக்கமாக வெளிப்படுத்துகின்ற அருமையான உரைகளாகும்.

 

சூரா அல்-ஹஜ்ஜில் புனித குர்ஆனின் உன்னத வசனத்தை மேற்கோள் காட்டிய, ஆயத்துல்லாஹ் இமாம் காமெனயீ அவர்களின் இவ்வருட புனித ஹஜ் பெருநாளை முன்னிட்டு மே 30, 2025 ஆற்றிய உரையில், ஹஜ் ஒன்றுகூடலின் நோக்கம் பல்வேறு மனித நன்மைகளை அடைவதாக அடையாளமாகவும், "இன்று இஸ்லாமிய உம்மத்திற்கு ஒற்றுமையை விட பெரிய நன்மை எதுவும் இல்லை. அத்தகைய ஒற்றுமை, நல்லிணக்கம் மற்றும் பரஸ்பர ஒத்திசைவு இருந்திருந்தால், காஸா மற்றும் பாலஸ்தீனத்தில் இன்றைய துயரங்கள் நடந்திருக்காது, என்பதை வலியுறுத்தும் இஸ்லாமிய ஒற்றுமையின் வெளிப்பாடாகும். “The Hajj gathering is for the benefit of humanity and there is no benefit for the Islamic Ummah greater than unity… If the Islamic Ummah were united, the issues of Palestine and Gaza would not happen.” (presstv.ir)

 

12 நாள் இஸ்ரேல் உடனான ஈரானிய போரில் வெற்றிகொண்ட ஈரானிய தேசத்துக்கு தனது வாழ்த்துக்களை ஜூன் 26, 2025 ஆற்றிய உரையில் ஆயத்துல்லாஹ் இமாம் காமெனயீ அவர்கள் தெரிவிப்பதாவது;

 

“ஈரானிய தேசம் காட்டிய குறிப்பிடத்தக்க ஒற்றுமைக்கும் சகோதரத்துவத்துக்கும் எனது வாழ்த்துகள். எல்லாம் வல்ல இறைவனுக்கு நன்றி, சுமார் 90 மில்லியன் மக்களைக் கொண்ட ஒரு தேசம் ஒன்றாக நின்றது, குரலில் ஒன்றுபட்டது, தோளோடு தோள் நின்றது, தங்கள் கோரிக்கைகளிலோ அல்லது அவர்கள் வெளிப்படுத்திய இலக்குகளிலோ எந்த வேறுபாடுகளையும் காட்டவில்லை. அவர்கள் ஒன்றாக நின்று, கோஷங்களை எழுப்பினர், குரல் கொடுத்தனர், ஆயுதப்படைகளின் நடவடிக்கைகளை ஆதரித்தனர், இது எதிர்காலத்திலும் தொடரும். இந்த நிகழ்வில் ஈரானிய தேசம் அதன் மகத்துவத்தையும் அதன் தனித்துவமான, தன்மையையும் வெளிப்படுத்தியது. தேவைப்படும்போது, ​​இந்த தேசத்திலிருந்து ஒன்றுபட்ட குரல் ஓங்கி ஒலிக்கும், அல்லாஹ்வின் கருணையில் இதுதான் இன்று வெற்றிக்கு வழிவகுத்தது.” இக் கூற்று புனித அல்குர்ஆனில் குறிப்பிடப்படும் "அல்லாஹ் நீட்டிய ஒற்றுமை எனும் கயிற்றை நீங்கள் அனைவரும் உறுதியாக பற்றிப் பிடித்துக் கொள்ளுங்கள், உங்களிடையே பிரிந்து விடாதீர்கள்." (3:103) எனும் இறைமறையின் வெளிப்பாடாகும்.

 

இஸ்ரேல் உடனான போரில் இஸ்லாமிய குடியரசுக்கு தனது குழு "முழு ஆதரவை" வெளிப்படுத்தியதாகக் கூறிய இயக்கத்தின் செயல் தலைவர் சலா அப்தெல் ஹக் ஈரானின் உச்ச தலைவர் ஆயத்துல்லாஹ் அலீ காமெனயீ அவர்களுக்கு எழுதிய கடிதத்தில், "எங்கள் முதன்மை ஆயுதம்... இஸ்லாமிய உம்மத்தின் ஒற்றுமை" என்று கூறியதோடு, முஸ்லிம் சக்திகள் கடந்த கால பிளவுகளைக் கடந்து "சியோனிச அமைப்பை எதிர்கொள்வதில்" தங்கள் கவனத்தை திருப்பிவிட வேண்டும் என்று அழைப்பு விடுத்திருந்தார். இது ஈரானிய தமைத்துவம் இஸ்லாமிய இணக்கப்பாட்டை வலியுறுத்தும் கொள்கையை கொண்டதாக கோடிட்டு காட்டுகிறது.

 

மார்ச் 31, 2025 அன்று அதிகாரிகள், இஸ்லாமிய நாடுகளின் தூதர்கள் மற்றும் பல்வேறு மக்கள் குழுவினரிடையே உரையாற்றிய ஆயத்துல்லாஹ் அலீ காமெனயீ அவர்கள், அனைத்து இஸ்லாமிய அரசாங்கங்களுடனும் ஈரானின் சகோதரத்துவ நிலைப்பாட்டையே உறுதிப்படுத்தினார். அவர் இஸ்லாத்தின் அதிகரித்து வரும் கண்ணியம் மற்றும் உலகளாவிய ஆணவத்திற்கு எதிரான எதிர்ப்பு ஆகியவை இஸ்லாமிய உம்மாவின் ஒற்றுமை மற்றும் ஆன்மீக அறிவைப் பொறுத்தது என்று வலியுறுத்தினார். பாலஸ்தீனம் மற்றும் லெபனானில் சியோனிச ஆட்சியின் கொடூரமான குற்றங்கள் உட்பட, இஸ்லாமிய உலகம் முன்னெப்போதும் இல்லாத சவால்களை எதிர்கொண்டுள்ள ஒரு நேரத்தில், முஸ்லிம் நாடுகளிடையே ஒற்றுமைக்கான அழைப்பு குறிப்பிடத்தக்க மூலோபாய முக்கியத்துவத்தைக் கொண்டுள்ளது. அல்லாஹ் புனித அல் குர்ஆனில் கூறுகிறான்: "முஃமின்கள் ஒரே சகோதரரே. நீங்கள் உங்கள் இரு சகோதரர்களுக்கிடையில் சமாதானம் உண்டாக்குங்கள்; இன்னும் நீங்கள் கிருபை செய்யப்படும் பொருட்டு, அல்லாஹ்வை அஞ்சுங்கள் (49-10). இஸ்லாமிய ஒருமைப்பாட்டுக்கான முக்கியத்துவம் இதில் புலப்படுகிறது.

 

இஸ்லாமிய ஒற்றுமை பற்றி உச்ச தலைவர் ஆயத்துல்லாஹ் அலீ காமெனயீ அவர்கள் வரையறுப்பதாவது, "ஒற்றுமை என்பது அரசியல் சித்தாந்தங்களில் அமையப்பெறும் சீரான தன்மை அல்ல, மாறாக உள்ளார்ந்த முரண்பாடுகளை தவிர்க்கும் பொதுவான நலன்களைப் பற்றிய பகிரப்பட்ட புரிதல் ஆகும்." மேலும் அவர் "இஸ்லாமிய உலகம் தன்னை ஒரு குடும்பமாகப் பார்க்க வேண்டும்" என்பதை வலியுறுத்தி, அனைத்து இஸ்லாமிய நாடுகளுடனும் ஈரானின் திறந்த நட்புறவை ஆன்மீக தலைவர் உறுதி செய்தார்.

இறைவன் அருளால் ஈரானிய தேசம் வெற்றி பெற்றது, தொடர்ந்தும் வெற்றி பெறும். எல்லாம் வல்ல இறைவன் இந்த தேசத்தை தனது கிருபையின் கீழ் தொடர்ந்து பாதுகாப்பார், அதை கண்ணியத்துடனும் மரியாதையுடனும் பாதுகாப்பார் என்று நாங்கள் நம்புகிறோம். அவர் இமாம் கொமெய்னி (ரலி) அவர்களின் ஆன்மீக அந்தஸ்தை உயர்த்தட்டும். மேலும் இமாம் மஹ்தி (அவருக்காக எங்கள் ஆன்மாக்கள் தியாகம் செய்யப்படட்டும்) இந்த தேசத்தில் மகிழ்ச்சியடைந்து திருப்தி அடையட்டும், மேலும் அவர் தனது உதவியுடன் அதை ஆதரிக்கட்டும் என்ற துஆவோடு தனது ஈரான் வெற்றியின் பின்னரான நன்றி உரையை முடித்தார்.

 

இவ்வாறு ஆயத்துல்லாஹ் இமாம் காமெனயீ அவர்களின் அண்மைக்கால   உரைகள், இஸ்லாமிய ஒன்றிணைப்பின் முக்கியத்துவத்தை உலகத்தின் முன் குர்ஆனிய அடிப்படையோடும், அதற்கு இருக்கும் சவால்களை எதிர்கொள்ளும் அறிவினையும் பிணைத்து நுட்பமாக விளக்குகின்றன.