பிரார்த்தனைகள் நிராகரிக்கப்படாத ஐந்து இரவுகளில் ஒன்று "பராஅத்"

 The 15th of Sha’ban - A Night for Asking Forgiveness

ஷாப்-ஏ-பராஅத், பராஅத் இரவு, செராக்-இ-பராஅத், பராஅத் காண்டிலி, அல்லது நிஸ்பு ஷ'பான் ஷாப்-ஏ-பராஅத் என அழைக்கப்படும் ஷ'பான் 15 ஆம் இரவு பல தெற்காசிய, மத்திய ஆசிய, தென்கிழக்கு ஆசிய மற்றும் மத்திய கிழக்கு முஸ்லிம் நாடுகளில் அனுஷ்டிக்கப்படும் ஒரு கலாச்சார நிகழ்ச்சியாகும். ஷ'பான் மாதம், இஸ்லாமிய நாட்காட்டியின் எட்டாவது மாதமாகும். இவ்வருடம் பராஅத் இரவு இலங்கையில் எதிர்வரும் 7ஆம் திகதி செவ்வாய் கிழமை சூரிய அஸ்தமனதில் இருந்து தொடங்குகிறது.

நாம் இப்போது அருள்மிகு ரமழான் மாத்திற்கு முந்திய ஷ'பான் மாதத்தில் இருக்கின்றோம். இந்த மாதமானது ரசூலுல்லாஹ் சந்திரனைப் பிளந்து அற்புதத்தை செய்து காட்டிய மாதம், தொழுகையின் போது முன்னோக்கும் கிப்லா மஸ்ஜிதுல் அக்ஸாவில் இருந்து புனித க'பாவிற்கு மாற்றப்பட்ட மாதம், "இந்த நபியின் மீது அல்லாஹ் அருள் புரிகிறான். மலக்குகளும் அவருக்காக அருளைத் தேடுகின்றனர். முஃமின்களே நீங்களும் அவர் மீது ஸலவாத்து சொல்லி அவர் மீது ஸலாமும் சொல்லுங்கள்" إِنَّ ٱللَّهَ وَمَلاَئِكَـتَهُ يُصَلُّونَ عَلَى ٱلنَّبِيِّ يٰأَيُّهَا ٱلَّذِينَ آمَنُواْ صَلُّواْ عَلَيْهِ وَسَلِّمُواْ تَسْلِيماً என்ற குர் ஆன் வசனம் இறங்கிய மாதம் போன்ற பல சிறப்புகளை தன்னகத்தே கொண்டுள்ளது. அதுமட்டுமல்லாமல் ஷா'பான் மாதத்திலேயே ஜைனப் பின்த் அலியின் பிறப்பு, ஹுசைன் இப்னு அலியின் பிறப்பு, அப்பாஸ் இப்னு அலியின் பிறப்பு, அலி இபின் ஹுசைன் ஸைன் அல்-அபிதின் பிறப்பு, அலி அல்-அக்பர் இபின் ஹுசைனின் பிறப்பு, காசிம் இப்னு ஹசனின் பிறப்பு, ருக்கையா பின்த் ஹுசைனின் பிறப்பு ஆகியவை நிகழ்ந்தன. லைலத்-அல்-பராஅத்தும் இம்மாத நடுப்பகுதியிலேயே வருகிறது.

ஆகவே முஸ்லிம்களான நாம் அனைவரும் ரஸூலுல்லாஹி (ஸல்) அவர்கள் மீதும் அவரின் புனித குடும்பத்தவர் மீதும் அதிகமதிகம் ஸலவாத் சொல்லி இவ்விரவை சிறப்புறச் செய்வோம்.

எமது ஷீஆ சகோதரர்களின் கூற்றுப்படி, இறுதி இமாமான முஹம்மது அல்-மஹ்தி (அலை) 15 ஷபான் அன்று பிறந்தார். ஷியாக்கள் அந்த நாளில் முஹம்மது அல்-மஹ்தி (அலை)யின் பிறந்தநாளைக் கொண்டாடுகிறார்கள் மற்றும் முஹம்மது அல்-மஹ்தி (அலை)விரைவாக தோன்றுவதற்கான பிரார்த்தனைகள், நோன்பு மற்றும் வழிபாடு போன்ற மதச் செயல்களைச் செய்கிறார்கள். ஈரானிய நகரங்கள் மத்திய ஷபானின் இரவில் அலங்கரிக்கப்பட்டு மக்கள் விசேட பிரார்த்தனைகளில் ஈடுபடுகின்றார்கள்.

இந்த ஆண்டு மார்ச் 7, 2023 (மக்ரிப் தொடக்கம்) லைலத் அல்-பராஅஹ், லைலத் அல்-நிஸ்ஃப் மின் ஷ’பான் மற்றும் ஷப்-இ-பராஅத் என்றும் குறிப்பிடப்படும் ஷாபானின் 15-ஆம் தேதி இரவு அனுஷ்டிக்கப்படும்.

ஷ’பானின் 15வது இரவின் முக்கியத்துவம் முஸ்லிம்கள் மத்தியில் விவாதப் பொருளாக இருந்தபோதிலும் சிலர் இந்த இரவை சிறப்புத் தொழுகைகளுடன் அனுஷ்டித்து, மறுநாள் நோன்பு நோற்கிறார்கள்,

ஹதீஸ் கலை ஆய்வாளர்கள் 15வது ஷ’பான் பற்றிய ஹதீஸ்களை ஸஹீஹ் மற்றும் ஹஸன் எனக் கருதும் அதேவேளை மற்றும் சில ஆய்வாளர்கள் அதை ழஈப் என்று கருதுகின்றனர். இருப்பினும், பலவீனம் கடுமையாக இல்லாததாலும், இந்த இரவின் அறம் சகல அறிஞர்களாலும் வணக்க வழிபாடுகளுக்காக பரிந்துரைக்கப்படும் ஒன்றாக இருக்கின்றது அவ்விரவை அனுஷ்டித்தல் சிறந்தது என்பதுவே பொதுவான கருத்தாகும்.

‘ஷாபானின் 15 வது இரவின் சிறப்பைப் பற்றி பல ஹதீஸ்களும் அறிவிப்புகளும் உள்ளன, இந்த இரவு சில நல்லொழுக்கங்களைக் கொண்டுள்ளது என்பதை ஏற்றுக்கொள்ள வேண்டிய கட்டாயம் உள்ளது. என்று இப்னு தைமியா (ரஹ்) கூறுகிறார், இதுவே இந்த இரவு தொடர்பான அறிஞர்களின் கருத்தாகும்.

எனவே 15வது ஷ’பானின் சிசேட தன்மை என்ன, அவற்றை நீங்கள் எவ்வாறு பயன்படுத்திக் கொள்ளலாம் என்பதை பார்ப்போம்:

அல்லாஹ் சுபுஹானஹு வ த'ஆலா தனது அடியார்களின்  பாவங்களை இந்த இரவில் மன்னிக்கிறான்

இந்த இரவின் முக்கிய ஆசீர்வாதம் என்னவென்றால், அல்லாஹ் தனது கருணையையும் மன்னிப்பையும் மக்ரிப் முதல் ஃபஜ்ர் வரை பூமியில் சொறிகின்றான். இத்தினம் தொடர்பாக நபிகள் நாயகம் (ஸல்) அவர்கள் மன்னிப்பின் அளவை பல வசனங்களில் நிச்சயப்படுத்தி விவரித்தார்கள்:

நபி (ஸல்) அவர்கள் கூறினார்கள், “ஷ’பானின் பதினைந்தாம் இரவில் அல்லாஹ் தனது படைப்பை உற்று நோக்குகிறான், பின்னர் அல்லாஹ்வுக்கு இணை கற்பிப்பவர்கள் மற்றும் தங்கள் சக முஸ்லிம்களிடம் வெறுப்பு கொண்ட இரண்டு வகையான மக்களைத் தவிர மற்ற அனைத்து நல்லடியார்களை மன்னிப்பான்”: [முஸ்னத் அஹ்மத்]

வேறு சில ஹதீஸ்களில் மன்னிக்கப்படாத நபர்களில் உறவினர் உடனான உறவுகளைத் துண்டித்தவர்கள் மற்றும் பெற்றோருக்குக் கீழ்ப்படியாதவர்கள் உட்பட இன்னும் பல வகையானவர்களைக் குறிப்பிட்டுள்ளார்கள்.

மு'மின்களின் அன்னை ஹஸரத் ஆயிஷா (ரலி) பின்வருமாறு கூறுகின்றார்:  நபிகள் நாயகம் (ஸல்) அவர்கள் இந்த இரவில் நீண்ட நேரம் சஜ்தாவில் தரித்திருப்பார்கள், அவர் (மரணித்துவிட்டார்களோ) என்று பயந்து, அவர் இன்னும் உயிருடன் இருப்பதை உறுதி செய்வதற்காக அவரது பாதத்தைத் சுரண்டியதாகவும் அப்போது ரஸூலுல்லாஹி (ஸல்) தனது பாதத்தை அசைத்து, பின்வரும் துஆவை ஓதுவதை கேட்டதாக குறிப்பிடுகின்றார்.

யா அல்லாஹ், உனது கோபத்திலிருந்து பாதுகாப்பை வேண்டுகிறேன், உனது மகிழ்ச்சியை நாடுகிறேன், உனது தண்டனையிலிருந்து விடுபடுவதற்கு உனது மன்னிப்பிலும் நான் பாதுகாவல் தேடுகிறேன். என்னால் உன்னை போதுமான அளவு புகழ முடியாது. நீ உன்னைப் புகழ்ந்தபடியே இருக்கிறாய்.

குறிப்பு: நபிகள் நாயகம் (ஸல்) அவர்கள் ஷ’பான் 15 ஆம் நாள் இரவு தொழுகையின் போது ஸஜ்தாவிலும், வித்ர் தொழுகைக்குப் பின்னரும் இந்த துஆவை ஓதுவார்கள் என்று கூறப்படும் இந்த ஹதீஸ் இமாம் பைஹக்கீ தொகுப்பில் உள்ளது, அறிஞர்களால் சஹீ என்று ஏற்றுக்கொள்ளப்பட்ட ஒன்றாகவும் உள்ளது.

நபி (ஸல்) அவர்கள் ஆயிஷா (ரலி) அவர்களிடம் கூறினார்கள், "அல்லாஹ் ஷ’பானின் நடு இரவில் அடி வானத்திற்கு இறங்குகிறான், மேலும் அவன் பனூ கல்பின் (அரபு இனத்தைச் சேர்ந்த) பெரிய செம்மறி ஆடுகளின் ரோமத்தின் எண்ணிக்கையை விட அதிகமாக (அதிக எண்ணிக்கையிலான பாவங்களை) மன்னிக்கிறான். [இப்னு மாஜா மற்றும் பலர்]

"ஷ’பான் 15 ஆம் தேதி, இரவில் விழிப்பு-தொழுகையைக் கடைப்பிடிக்கவும், பகலில் நோன்பு நோற்கவும் (பரிந்துரைக்கின்றேன்), ஏனென்றால் அல்லாஹ் அந்தி வேளையில் இருந்து விடியற்காலை சூரியன் உதிக்கும் வரை அருகிலுள்ள வானத்திற்கு இறங்குகிறான்: நான் அவரை மன்னிப்பதற்காக எவராவது மன்னிப்பு தேடுகிறார்களா? நான் அவருக்கு வழங்குவதற்காக எவராவது வாழ்வாதாரம் தேடுகிறார்களா? நான் அவரைக் காப்பாற்றுவதற்காக எவராவது இன்னல்களை எதிர்கொள்கிறார்களா?” (அறிவிப்பவர் இமாம் இப்னு மாஜா).

எனவே, ஷ’பானின் 15வது இரவில் மன்னிப்புக்காக இறைவனிடம் இறைஞ்சுங்கள். உங்கள் இறை தியானத்தை அதிகரித்துக் கொள்ளுங்கள், குறிப்பாக அல்லாஹ்விடம் மன்னிப்பு, கருணை, துன்பத்திலிருந்து நிவாரணம் மற்றும் வாழ்வாதாரங்களை அதிகரிக்கக் கேளுங்கள். நீங்கள் வெறுப்பு கொண்டுள்ளவர்களை மன்னியுங்கள், குறிப்பாக அவர்கள் குடும்ப உறுப்பினர்களாக இருந்தால், அவர்களுடன் உங்கள் பிணக்குகளை, தீர்க்க மறவாதீர்கள், அல்லாஹ் நிச்சயமாக உங்களை மன்னிப்பான் என்பதில் உறுதியான நம்பிக்கை கொள்ளுங்கள்.

மேலும், ஷ’பானின் போது நமது நபிலான நோன்புகளை அதிகரிப்பது நபி (ஸல்) அவர்களின் சுன்னாவிலிருந்து வரும் விடயமாகும், ஏனெனில் அல்லாஹ்விடம் நற்செயல்கள் உயர்த்தப்படும் மாதம் இது:

பிரார்த்தனைகள் நிராகரிக்கப்படாத ஐந்து இரவுகள்: வெள்ளிக்கிழமை இரவு (வியாழன் இரவு), ரஜப் மாதத்தின் முதல் இரவு, நிஸ்ஃபு ஷபானின் (15 ஆம் இரவு), இரண்டு ஈத் இரவுகள் - ஈதுல் பித்ர் மற்றும் ஈதுல் அல்ஹா). என்று இமாம் அல்-பைஹகி விவரிக்கின்றார்.

உஸாமா பின் ஸைத் (ரலி) அவர்கள் அறிவிக்கின்றார்கள்: நான் றஸூலுல்லஹ்விடம் 'நீங்கள் ஷ'பான் மாதத்தைப் போல் வேறு எந்த மாதத்திலும்  இந்தளவு நோன்பிருப்பதைக் கண்டதில்லை' என்று சொன்னதற்கு ரசூலுல்லாஹ் (ஸல்) அவர்கள்

“ரஜப் மற்றும் ரமலான் மாதங்களுக்கு இடையே (வரும் இம்மாதம்) மக்கள் (அறியாமையால்) புறக்கணிக்கும் மாதம் இது. இது இறைவனிடம் செயல்களை உயர்த்தும் மாதமாகும், மேலும் நான் நோன்பிருக்கும் போது (எனது நற்செயல்கள்) உயர்த்தபடுவதை விரும்புகிறேன்” என்று கூறினார்கள். - (அன்-நஸயீ)

இந்த இரவுக்கு பரிந்துரைக்கப்பட்ட பிரார்த்தனைகள்

இருப்பினும், அதன் ஆசீர்வாதங்களிலிருந்து பயனடைய இந்த இரவில் நீங்கள் நஃப்ல் (தன்னார்வ) தொழுகைகளை இன்னும் அதிகமாக செய்யலாம். ‘இறையச்சம் கொண்ட சில முன்னோர்கள் இந்த இரவை (ஷாபான் 15ஆம் நாள்) தொழுகைக்காக சிறப்பாக அர்ப்பணித்தனர்', என்று இப்னு தைமிய்யா (ரஹ்) அவர்கள் குறிப்பிடுகின்றார்.

எனவே, இந்த இரவில் நமது இபாதத்தை அதிகரிக்கவும், அல்லாஹ்வின் கருணையையும் மன்னிப்பையும் கோருவதற்கும் நாம் முயற்சி செய்ய வேண்டும். இந்த இரவில் அல்லாஹ்வின் மன்னிப்பைப் பெறுவதற்காக, நமது சக முஸ்லிம்கள் மீதான வெறுப்பு அல்லது குரோதம் போன்றவற்றை நம் இதயங்களிலிருந்து அகற்றவும் நாம் முயற்சி செய்ய வேண்டும்.

நினைவில் கொள்ளுங்கள்: ஷஃபான் என்பது நமது வருடாந்திர செயல்களை அல்லாஹ்விடம் உயர்த்தும் மாதம் - மேலும் ஷபான் 15 ஆம் தேதி பராஅத் இரவு நமது பாவங்கள் மன்னிக்கப்பட்ட நிலையில் நாம் ரமழானுக்குள் நுழைவதற்கான சரியான வாய்ப்பாகும், இன் ஷா அல்லாஹ்!

ரமலான் மாதத்தில் நமது வணக்க வழிபாடுகளை அதிகப்படுத்த முடியும் என்ற நம்பிக்கையில், நமது பேரன்பிற்குரிய நபிகள் நாயகம் (ஸல்) அவர்கள் அழகாகக் காட்டியபடி, இந்த ஷ’பான் மாதத்தில் பாவமன்னிப்பு கோரல் மற்றும் வணக்க வழிபாடுகளை அதிகரிக்க வேண்டும் என்று நமது அறிஞர்கள் நினைவூட்டியுள்ளனர்.

இந்த இரவின் அருட்கொடைகளை அல்லாஹ் நமக்கு பூரணமாக வழங்குவானாக. அவன் எம்முடைய பாவங்களை மன்னித்து, எமது வாழ்வாதார வசதிகளை அதிகப்படுத்தி, கஷ்டங்களிலிருந்து நம்மை விடுவிக்க பிரார்த்திப்போம். அல்லாஹ் ஷ'அபானில் நம்மை ஆசீர்வதித்து ரமழானை அடைய உதவுவானாக, ஆமீன்.

- தாஹா முஸம்மில் 

அமெரிக்காவுக்கோ அல்லது அதன் கொள்கைகளை பின்பற்றும் நாடுகளுக்கோ "ஈரானின் மனித உரிமைகள் பற்றி பேச எந்த தார்மீக தகுதியும் இல்லை"

Iran Roasts Rights Bodies in Geneva Address

ஈரான் வெளியுறவு அமைச்சர் ஹுசைன் அமீர்-அப்துல்லாஹியான் திங்களன்று அமெரிக்கா மற்றும் வாஷிங்டன் தலைமையிலான "சில நாடுகள்" தங்கள் அரசியல் நிகழ்ச்சி நிரல்களுக்கு ஏற்ப மனித உரிமைகள் என்ற கருத்தை கையாள்வதை கடுமையாக விமர்சித்தார்.

"ஐ.நா மனித உரிமைகள் வழிமுறைகளினால் உண்மையான உரையாடல், ஆக்கப்பூர்வமான தொடர்பு மற்றும் திறனை வளர்க்கும் மரியாதைக்குரிய ஒத்துழைப்பு ஆகியவற்றின் மூலம் மனித உரிமைகளை மேம்படுத்துவதற்கும் பாதுகாப்பதற்கும் பங்களிக்க முடியும்," என்று சுவிஸ் நகரில் மனித உரிமைகள் பேரவையின் 52வது அமர்வில் அமீர்-அப்துல்லாஹியான் கூறினார்.

"மனித உரிமை சபை உட்பட மனித உரிமை நிறுவனங்கள், வருந்தத்தக்க வகையில் அமெரிக்கா தலைமையிலான ஒரு சில நாடுகளின் வெளியுறவுக் கொள்கையின் கருவியாக மாற்றப்பட்டுள்ளன."

சம உரிமைகள் மற்றும் மக்களின் சுயநிர்ணயக் கோட்பாட்டின் அடிப்படையில் நாடுகளுக்கிடையே உறவுகளை மனித உரிமை சபை ஊக்குவிக்க வேண்டும், எனினும் "நடைமுறையில், மனித உரிமை கவுன்சில் சில சக்திகளின் நிகழ்ச்சி நிரல்களை நடைமுறைப்படுத்த நிர்ப்பந்திக்கப்பட்டு உள்ளது, அவை நாடுகளிடையே நட்புறவு கொள்கைகளுக்கோ அல்லது அத்தகைய நோக்கங்களுக்கோ ஒருபோதும் சேவையும் செய்யாது, பங்களிப்பும் செய்யாது." என்று அமீர்-அப்துல்லாஹியான் குறிப்பிட்டார்.

"உறுப்பு நாடுகளிடையே 'ஒத்துழைப்பு மற்றும் உண்மையான உரையாடல் கொள்கைகளை' நிலைநிறுத்துவதன் மூலம் மனித உரிமை கவுன்சில் அதன் நம்பகத்தன்மை மற்றும் செயல்திறனை மீட்டெடுக்க வேண்டும்," என்றும் அவர் கூறினார்.

அமெரிக்கா மற்றும் அதன் மேற்கத்திய கூட்டாளிகள் அவற்றுடன் ஒத்துப்போகாத மற்ற நாடுகளுக்கு எதிராக முற்றிலும் அரசியல் அடிப்படையில் விதித்துள்ள ஒருதலைப்பட்ச தடைகளை அவர் சுட்டிக்காட்டினார்.

ஒருதலைப்பட்சமாக எடுக்கப்பட்டுள்ள நடவடிக்கைகள், சட்டவிரோதமானவை மற்றும் மனிதாபிமானமற்றவை, அவை இலக்கு வைக்கப்பட்ட மக்களின் அடிப்படை மனித உரிமைகளை முழுமையாகவும் அப்பட்டமாகவும் மீறுகின்றன,” என்றும் அவர் கூறினார்.

“அமெரிக்காவின் தொடர்ச்சியான நிர்வாகங்கள் அவை செய்த அட்டூழியக் குற்றங்களுக்காக பொறுப்புக் கூற வேண்டும். அமெரிக்காவின் சட்டவிரோத ஒருதலைப்பட்சமான நடவடிக்கைகளுக்கு இணங்கும் ஐரோப்பிய மற்றும் பிற நாடுகள் குற்றத்தில் பங்காளிகளாக பொறுப்பேற்கச் செய்ய வேண்டும், ”என்று அவர் தெரிவித்தார்.

அமெரிக்காவுக்கோ அல்லது அதன் மிருகத்தனமான கொள்கைகளை பின்பற்றும் நாடுகளுக்கோ "ஈரானின் மனித உரிமைகள் பற்றி பேச எந்த தார்மீக தகுதியும் இல்லை" என்று அமீர்-அப்துல்லாஹியான் கூறினார்.

"ஈரானிய மக்களின் மருத்துவ உரிமை, கல்வி மற்றும் வாழ்க்கைக்கான அடிப்படை உரிமைகளை பறித்துக்கொண்டு, ஈரானியர்களின் மனித உரிமைகளுக்காக குரல் எழுப்புவதாக கூப்பாடு போடுவது ஒரு சுத்த பாசாங்குத்தனமாகும்." என்று அவர் கூறினார்.

Iranian FM meets with UN Secretary General Antonio Guterres

"இராணுவ ஆக்கிரமிப்புகள் மற்றும் தலையீடுகள், சதியின் மூலம் ஆட்சிக் கவிழ்ப்புகள் மற்றும் பிற நாடுகளுக்கு எதிரான பொருளாதாரத் தடைகள் ஆகியவற்றில் அமெரிக்கா முதலிடத்தில் இருப்பதால், முறையான மற்றும் கடுமையான மனித உரிமை மீறல்களுக்கு அமெரிக்கா மட்டுமே பொறுப்பாகும்."

பயங்கரவாதம் பற்றி பேசுகையில் "உலகெங்கிலும் பயங்கரவாத மற்றும் தீவிரவாத குழுக்களின் தோற்றம் தற்போதைய சகாப்தத்தின் முக்கிய சவால்களில் ஒன்றாகும் என்று அமீர்-அப்துல்லாஹியான் குறிப்பிட்டார்.

“ஈரான் இஸ்லாமியக் குடியரசு எப்போதும் பயங்கரவாதத்தை எதிர்ப்பதில் முன்னணியில் உள்ளது. தாயேஷ் பயங்கரவாதத்திற்கு எதிராக ஜெனரல் சுலைமானியின் தியாகத்தையும் போராட்டத்தையும் மறந்துவிடலாகாது. பயங்கரவாத செயல்களை கட்டவிழ்த்துவிட்டோரை மற்றும் படுகொலைக்கு காரணமானவர்களை நீதியின் முன் நிறுத்த ஈரான் இஸ்லாமிய குடியரசு எந்த முயற்சிகளையும் எடுக்க தயங்காது".

"எனது நாட்டில் சமீபத்தில் நடந்த கலவரங்களில் ஈரான்-எதிர்ப்பு பயங்கரவாத குழுக்களின் பங்கு தெளிவாகவும் நிரூபிக்கப்பட்டுள்ளது" என்றும் வெளியுறவு அமைச்சர் கூறினார்.

"சில ஐரோப்பிய நாடுகள் இரட்டைத் தரங்களைப் பயன்படுத்தி 'பயங்கரவாதத்தை சுத்தப்படுத்துவதில்' ஈடுபட்டன. ஈரானில் அமைதியின்மையின் போது வன்முறை மற்றும் பயங்கரவாத சக்திகளுக்கு கணிசமான நிதி மற்றும் தளவாட வசதிகளை அவை வழங்கின".

ஈரானில் சமீபத்திய கலவரங்களின் போது, அமெரிக்கா மற்றும் இங்கிலாந்தை தளமாகக் கொண்ட பல பாரசீக மொழி தொலைக்காட்சி ஊடகங்கள் வெறுப்பைத் தூண்டுபவையாகவும் வன்முறையைப் பரப்புபவையாகவும் செயல்பட்டன என்றும் அவர் சுட்டிக்காட்டினார்.

பெண்களின் உரிமைகள் பற்றி பேசுகையில், ஈரான் இஸ்லாமிய குடியரசில் பெண்களை ஒடுக்குவது குறித்த மேற்கத்திய ஊடகங்களின் பிரச்சாரத்தை மறுத்த அமீர்-அப்துல்லாஹியான், “இந்த ஆண்டுகளில், நமது பெண்கள், அறிவியல் மற்றும் கல்வி, சுகாதாரம் மற்றும் மருத்துவம், சமூக மற்றும் அரசியல் செயல்பாடுகளில் பிறர் பொறாமைப்படும் அளவு முன்னேற்றம் கண்டுள்ளனர், மேலும் சாதனைகளை பதிவு செய்துள்ளனர். அரசியல், சர்வதேச, சமூக, அறிவியல் விடயங்களிலும் தொழில்நுட்ப மற்றும் வணிகப் துறைகளிலும் ஈரானியப் பெண்களின் திறமையான மற்றும் ஆற்றல்மிக்க உருவத்தை உலகிற்குச் சித்தரித்துள்ளது.

"எங்களைப் பொறுத்தவரை, 'மனித உரிமைகள் மற்றும் கண்ணியத்திற்கு' மதிப்பளித்தல் என்பது நமது தேசிய பாரம்பரியத்தில் ஆழமாக வேரூன்றி, நமது மத நம்பிக்கைகளில் ஆழமாக உட்பொதிக்கப்பட்ட ஒரு முக்கிய மதிப்புமாகும். மேலும் சிறந்த பாதுகாப்பு மற்றும் மனித உரிமைகள் மற்றும் மனித கண்ணியத்தை மேம்படுத்துவதற்கு நாங்கள் அயராது பணியாற்றி வருகிறோம். எங்களுடைய நீண்ட வரலாற்றில் நாம் மனச்சோர்வடையவோ அல்லது முரண்பாடுகளால் திசைதிருப்பப்படவோ கூடாது என்பதை நாங்கள் கற்றுக்கொண்டோம், என்றும் அவர் தெரிவித்தார்.

https://kayhan.ir/en/news/112898/iran-roasts-rights-bodies-in-geneva-address

 

ஹஸ்ரத் அபுல் ஃபஸ்ல் அல்-அப்பாஸ் தைரியம், விசுவாசம், தியாகம் ஆகியவற்றின் அடையாளம்

Hazrat Al-Abbass symbol of courage, loyalty, sacrifice

அபுல் ஃபஸ்ல் அல்-அப்பாஸ் என்ற பெயரை நாம் ஒவ்வொரு வாரமும் இரண்டாவது குத்வாவில் கேட்டிருப்போம். யார் இவர்? முக்கிய ஸஹாபாக்கள் வரிசையில் இவர் பெயரும் கூறப்படுவது ஏன்? அவரின் சிறப்பு என்ன? என்பது பற்றியெல்லாம் நாம் எப்போதாவது சிந்தித்ததுண்டா? குத்பாக்களில் கூட இவர் யார் என்பது பற்றி விளக்கப்படுவதை இதுவரை நான் கேட்டதில்லை. ஆனால் எமது ஷீஆ சகோதரர்கள் இவரை ஒருபோதும் மறப்பதில்லை.

தைரியம், அன்பு, விசுவாசம் மற்றும் சுய தியாகத்தின் அடையாளமாகக் கருதப்படும் ஹஸ்ரத் அபுல் ஃபஸ்ல் அல்-அப்பாஸ் அவர்களின் பிறந்த நாளை உலகெங்கிலும் உள்ள புனித அஹ்லுல் பைத்தின் மீது அன்பு கொண்டோர் மற்றும் ஷியா சகோதரர்கள் நினைவுகூர்வதற்கு ஒருபோதும் தவறுவதில்லை.

இமாம் அலி இப்னு அபு தாலிப் (அலை) நபிகள் நாயகம் (ஸல்) அவர்களின் மகள் ஹஸ்ரத் ஃபாத்திமா ஸஹ்ரா (அலை) அவர்கள் காலமான பல ஆண்டுகளுக்குப் பிறகு பாத்திமா பின்த் ஹிஸாம் அவர்களை மணம் செய்து கொண்டார்கள். இவர்களுக்கு பிறந்தவரே அல்-அப்பாஸ் ஆவார். அவரது தாயாரின் முழுப் பெயர் உம் அல்-பனீன் பாத்திமா பின்த் ஹிஸாம் ஆகும். அல்-கிலாபிய்யா குலத்தைச் சேர்ந்த நல்லொழுக்கமுள்ள பெண்மணி (அல்-கிலாபிய்யா குலம் அக்காலத்தில் அதன் தைரியம் மற்றும் துணிச்சலுக்காக போற்றப்படும் ஒன்று).

ஹஸ்ரத் அபுல் ஃபஸ்ல் அல்-அப்பாஸ் அவர்கள் ஹிஜ்ரி 26 ஆம் ஆண்டு ஷபான் மாதம் 4 ஆம் தேதி புனித மதீனாவில் பிறந்தார்.

ஹஸ்ரத் பஸல் அல் அப்பாஸ் தனது மூத்த சகோதரர்களான திரு நபியின் பேரன்கள், இமாம் ஹசன் (அலை) மற்றும் இமாம் ஹுசைன் (அலை) ஆகியோரை விட இருபது வயதுக்கு மேல் குறைந்தவர்கள், சிறுவயதிலிருந்தே ரசூழுலுல்லாஹ்வின் குடும்பத்துடன் மிகவும் நெருக்கமாக இணைந்திருந்தார்.

இஸ்லாத்தைப் பாதுகாப்பதற்காக தனது உயிரைத் தியாகம் செய்த வரலாற்றுச் சிறப்புமிக்க கர்ம வீரர்; கர்பலா போரில் இமாம் ஹுசைனின் இராணுவத்தில் துணிச்சலாக செயற்பட்ட தியாகி ஆவார்.

கர்பலா களத்தில் ஹஸ்ரத் அல் அப்பாஸ்

இமாம் ஹுசைன் (அலை) அவர்களின் அரை சகோதரரான அவர் கர்பலா போரில், இமாம் ஹுசைன் (அலை) அருகில் ஒரு நிழல் போல் இருந்தார். அவரது புனைப்பெயரே அபு ஃபாதில் (நல்லொழுக்கங்களின் தந்தை) ஆகும். அவர் சத்தியம், இறை நீதி நிலைக்க வேண்டும் என்பதற்காக ஆஷுரா நாளில் தனது உயிரை அர்ப்பணித்தார்.

இமாம் ஹுஸைன் (அலை) அவர்களது இராணுவத்தின் கொடியை ஏந்தியவர் அவர், எதிர்தரப்பினர் பயந்து நடுங்கும் அளவிற்கு மாவீரர், இமாமின் தீவிர விசுவாசியாக இருந்தார். தாகத்தால் தவித்த இமாம் ஹுஸைன் (அலை) அவர்களது புதல்விகளுக்கு குடிப்பதற்கு நீர் எடுத்து வர சென்ற வேளையில் மறைந்திருந்து தாக்கப்பட்டு ஷஹீதாக்கப்பட்டார்.

இமாம் ஹுஸைன் (அலை) அவர்களினதும் அவரது குழந்தைகளினதும் தாகத்தை தீர்க்க நீரை கொண்டு வருவதற்கு விரைந்த அபு பஸல் ஆற்றை அடைந்ததும், நா வறண்ட நிலையில் தானும் நீரருந்த முயன்றார். கூடாரத்தில் தாகத்தால் தவிப்போரின் நிலை அவர் கண் முன் வந்து நின்றது, தான் தாகம் தணிக்கும் முன் அவர்களது தாகத்தைத் தீர்க்க வேண்டும் என்ற தன்னலமற்ற எண்ணம் காரணமாக அவர் தான் கையில் ஏந்திய நீரையும் குடிக்காமல், நீர் நிரப்பட்ட கூஜாவை எடுத்துக்கொண்டு கூடாரத்துக்கு திரும்புகையில், மறைந்திருந்து தாக்கிய யஸீதின் இராணுவத்தால் கைகள் இரண்டும் துண்டிக்கப்பட்டு கொல்லப்பட்டார். அந்த நாளில் அவர் எமக்கு வழங்கிய பல பாடங்களில் இதுவும் ஒன்று. சுயநலமின்மை, தன்னலத்தை விட பிறர் நலனே முக்கியம் என்பதை இந்த நிகழ்வு நினைவூட்டுகிறது.

இமாம் ஹுசைன் (அலை) அவர்களுக்கு பாதுகாப்பு வழங்குதல், றஸூலுல்லாஹ்வின் வீட்டுப் பெண்கள் தங்கியிருந்த கூடாரங்களைப் பாதுகாத்தல், குழந்தைகளைப் பராமரித்தல், முகாமில் தரித்திருந்தோருக்கு தண்ணீர் கொண்டு வருவதல் போன்றவற்றில் கண்ணும் கருத்துமாக இருந்தார். இவை அனைத்தும் அவரது வாழ்க்கையின் மிக அழகான மற்றும் உச்சக்கட்ட தியாகத்தின்  வெளிப்பாடுகளாகும்.

அவரது நினைவாக கட்டப்பட்டுள்ள கம்பீரமான கல்லறை மாடம் இன்றுவரை இமாம் ஹுசைனின் (அலை) அவர்களின் சன்னதியைக் காக்கும் ஒரு காவலாளி போல் உள்ளது. கர்பலாவிற்கு விஜயம் செய்யும் எவரும் அபூ பஸல் அவர்களின் அடக்கஸ்தலத்தை பார்வையிடாமல் வருவதில்லை.

அப்பாஸ் அவர்கள் ஷீஆ சகோதரர்களால் இறையச்சம், தைரியம், வீரம், அன்பு, நேர்மை மற்றும் சுய தியாகம் ஆகியவற்றின் இறுதி முன்னுதாரணமாக கருதப்படுகிறார். ஹஸ்ரத் அல்-அப்பாஸுக்கும் இஸ்லாத்தில் மிகப் பெரிய பதவி உண்டு.

- தாஹா முஸம்மில் 

இஸ்ரா மற்றும் மிராஜ் அருள்மிக்க அற்புத நிகழ்வாகும்

Isra and Miraj is a miraculous event of grace

மனிதகுல வரலாற்றில் மகத்துவமிக்க நாட்களில் ஒன்றை அடைந்தவர்களாக நாம் இருக்கிறோம். சர்வவல்லமையுள்ள அல்லாஹ் தனது இறுதித் தூதருக்கு இஸ்லாத்தின் உலகளாவிய செய்தியை முறையாக ஒப்படைத்த நாள் இது.

இந்த நாளுக்கு இத்தினத்தை மிஹ்ராஜ் என்று அழைப்போம். மீட்சி என்று பொருள்படும் "மப்'அத்" என்றும் இத்தினம் அழைக்கப்படுகிறது. இது ரஜப் மாதத்தின் 27 ஆம் தேதி (முஸ்லிம் நாட்காட்டியின் 7 வது மாதத்தின் 27 வது நாளில்) கொண்டாடப்படும் இஸ்ரா மற்றும் மிராஜ் என்னும் அற்புத நிகழ்வாகும். 

முதலில் மெக்காவிலிருந்து ஜெருசலம் வரை, பின்னர் ஜெருசலமிலிருந்து வானங்கள் வரை நபிகள் நாயகம் மேற்கொண்ட ஒரு அற்புதமான இரவு நேர பயணத்தைக் குறிக்கிறது. விசுவாசிகள் இதை றஸூலுல்லாஹ்வின் உடல் மற்றும் ஆன்மீக பயணமாக கருதுகின்றனர்.

 سُبْحٰنَ الَّذِىْۤ اَسْرٰى بِعَبْدِهٖ لَيْلًا مِّنَ الْمَسْجِدِ الْحَـرَامِ اِلَى الْمَسْجِدِ الْاَقْصَا الَّذِىْ بٰرَكْنَا حَوْلَهٗ لِنُرِيَهٗ مِنْ اٰيٰتِنَا‌ ؕ اِنَّهٗ هُوَ السَّمِيْعُ الْبَصِيْرُ‏

(அல்லாஹ்) மிகப் பரிசுத்தமானவன்; அவன் தன் அடியாரை பைத்துல் ஹராமிலிருந்து (கஃபத்துல்லாஹ்விலிருந்து தொலைவிலிருக்கும் பைத்துல் முகத்தஸிலுள்ள) மஸ்ஜிதுல் அக்ஸாவிற்கு ஓரிரவில் அழைத்துச் சென்றான்; (மஸ்ஜிதுல் அக்ஸாவின்) சுற்றெல்லைகளை நாம் அபிவிருத்தி செய்திருக்கின்றோம்; நம்முடைய அத்தாட்சிகளை அவருக்குக் காண்பிப்பதற்காக (அவ்வாறு அழைத்துச் சென்றோம்); நிச்சயமாக அவன் (யாவற்றையும்) செவியுறுவோனாகவும்; பார்ப்போனாகவும் இருக்கின்றான். (புனித குர் ஆன் 17:1)

நபிகள் நாயகம் (ஸல்) அவர்களுக்கு முதன்முதலில் ஐந்து நேரத் தொழுகைகள் கடமையாக்கப்பட்டது இத்தினத்திலாகும். இந்தப் பயணத்தில் நபி (ஸல்) அவர்களுக்கு பல அசாதாரண காட்சிகள் காண்பிக்கப்பட்டன.  

இரவுப் பயணமும், விண்ணேற்றமும் நடந்த வரலாற்றுக் காலம், முஹம்மது நபி (ஸல்) அவர்கள் தனது அன்பான குடும்ப உறுப்பினர்கள் மற்றும் ஆதரவாளர்கள் சிலரின் தொடர்ச்சியான மரணத்திற்குப் பிறகு கடுமையான துன்பங்களையும் துயரங்களையும் எதிர்கொண்ட காலகட்டம், அதே சமயம் தாயிஃப் மக்களின் கொடூரமான நிராகரிப்புகளையும் எதிர்கொண்டது. இது மக்காவிலிருந்து மதீனாவுக்கு ஹிஜ்ரத் (இடம் பெயர்தல்) செய்வதற்கு ஒரு வருடத்திற்கு முன்பு நடந்ததாகக் கருதப்படுகிறது.

கடந்த காலத்தின் அனைத்து தீர்க்கதரிசிகளும் முன்னறிவித்தபடி, முழு பிரபஞ்சத்தையும் படைத்த ஒரே இறைவன், ஏகத்துவத்தின் உலகளாவிய பணியை இப்ராஹீம் (அலை) அவர்களின் தூய சந்ததியான முஹம்மத் முஸ்தபா (ஸல்) அவர்களிடம் ஒப்படைத்தான், சமாதானம், நல்லொழுக்கம், ஆரோக்கியமான வாழ்க்கை சர்வவல்லமையுள்ள இறைவனைத் தவிர வேறு யாருக்கும் அடிபணியாமை ஆகியவற்றின்பால் அழைக்கும் பணியை ஒப்படைத்தான். இந்த தூதுக்கு அரபியில் "இஸ்லாம்" என்று பொருள்.

பல்வேறு காலங்களிலும், உலகின் பல்வேறு பகுதிகளிலும் அல்லாஹ் தூதர்களை அனுப்பிவைத்தான்; ஈஸா (அலை), மூஸா (அலை), இப்ராஹீம் (அலை), நூஹ் (அலை) மற்றும் எண்ணற்ற தூதர்களை, சமூக நீதியை ஊக்குவிப்பதற்கும், மறுக்கப்படும் அனைத்து மனிதாபிமான விழுமியங்களுக்கும் முக்கியத்துவம் கொடுத்து உருவ வழிபாடு, நாத்திகம், அடக்குமுறை, தீமைகள் மற்றும் மற்ற எல்லா பாவங்களிலும் ஈடுபடுவதிலிருந்து மக்களை தடுப்பதற்காகவே நியமித்தான்.

சர்வவல்லமையுள்ள இறைவன் முஹம்மத் (ஸல்) அவர்களுக்கு முறையான நியமனம் வழங்கி இவ்வாறு கூறுகிறான்: 

وَمَاۤ اَرْسَلْنٰكَ اِلَّا رَحْمَةً لِّـلْعٰلَمِيْنَ

"(நபியே!) உங்களை உலகத்தாருக்கு ஓர் அருளாகவேயன்றி நாம் அனுப்பவில்லை." (புனித குர்ஆன் 21:107).

றஸூலுல்லாஹ்வின் வருகைப்பற்றி முன்வந்த அனைத்து மதங்களிலும் முன்னறிவிப்பு செய்யப்பட்டுள்ளது.

கடந்த பல்லாயிரம் ஆண்டுகளில் இந்த வேத நூல்களை இடைத்தரகர்கள் சேதப்படுத்திய போதிலும், இந்த மத நூல்களில் றஸூலுல்லாஹ்வின் வருகை தொடர்பான இந்த பத்திகள் இன்னும் பாதுகாக்கப்பட்டுள்ளதானது  இஸ்லாத்தின் உண்மைத்தன்மையையும், நபிகள் நாயகத்தின் ஒப்பற்ற ஆளுமையையும் உறுதிப்படுத்துகிறது என்பது சுவாரஸ்யமானது. இறைவன் இவரைப்பற்றி கூறுகையில்:

لَقَدْ كَانَ لَكُمْ فِىْ رَسُوْلِ اللّٰهِ اُسْوَةٌ حَسَنَةٌ لِّمَنْ كَانَ يَرْجُوا اللّٰهَ وَالْيَوْمَ الْاٰخِرَ وَذَكَرَ اللّٰهَ كَثِيْرًا ؕ‏

எவர்கள் அல்லாஹ்வையும், இறுதி நாளையும் உறுதியாக நம்புகிறார்களோ அவர்கள் பின்பற்றி நடக்கவேண்டிய அழகான உதாரணம் நிச்சயமாக அல்லாஹ்வின் தூதரிடமே இருக்கின்றது. அவர்கள் (அவரைப் பின்பற்றி நடந்து) அல்லாஹ்வை அதிகமாக நினைவு செய்துகொண்டிருப்பார்கள். (புனித குர்ஆன் 33:21)

முஹம்மது நபி (ஸல்) அவர்கள் இந்த வசனத்தின் முழுமையான அர்த்தத்திலும் ஓர் உன்னதமான சிறந்த எடுத்துக்காட்டு ஆவார். அவர் நல்லொழுக்கத்தின் சிகரம் மற்றும் மனித இனத்திற்கு மிகச் சிறந்த முன்மாதிரியாக இருந்தார்.

அடக்கம், உண்மைத்தன்மை, கருணை, பொறுமை, விசுவாசம், நேர்மை, தைரியம், துணிச்சல், தாராளம், பெருந்தன்மை, ஞானம் போன்ற சிறந்த குணங்களை தன்னுடைய உயர்ந்த ஆளுமையில் வெளிப்படுத்தியதன் மூலம் சர்வவல்லமையுள்ள இறைவன்  அவரை மற்றவர்களிடமிருந்து வேறுபடுத்தி காட்டினான்.

அவரது உயர்ந்த பண்புகள் மற்றும் அவரது குடும்பத்தினர், தோழர்கள், மனைவிகள் மற்றும் பிறருடன் அவர் வழிநடத்திய அதிசயமான எளிமையான வாழ்க்கையைப் படிப்பதன் மூலம், அவருடைய நடத்தையிலிருந்து மதிப்புமிக்க படிப்பினைகளைக் கற்றுக் கொள்ள முடிகிறது, அதன்படி நமது சொந்த வாழ்க்கை முறையை நாம் வடிவமைக்க வேண்டும்.

அல்லாஹ்வின் இறுதி தூதரின் காலடி சுவட்டை பின்பற்றி, அவருடைய போதனைகளுக்கு செவிசாய்த்து, அவருடைய உன்னத தோழர்களைப் போலவே அவருடைய நடைமுறையையும் வாழக்கை உதாரணங்களையும்  (சுன்னா மற்றும் சீரா) பின்பற்றினால் ஒழிய நமது சமூகம் ஒருபோதும் இஸ்லாமிய சமூகமாக இருக்க முடியாது. இதன் பொருள் என்னவென்றால், அவர் தடைசெய்தவற்றிலிருந்து விலகி, அவர் நமக்குக் போதித்த வற்றுக்கு கீழ்ப்படிந்து நடத்தலாகும்.

ஆகவே எம்மத்தியில் உள்ள வீண் தர்க்கங்களை ஒதுக்கி விட்டு றஸூலுல்லாஹ்வின் அடியொற்றி, ஒற்றுமை குலையாது, புனித வேதத்தை ஒழுகி நடப்போம்.

தாஹா முஸம்மில்