இஸ்லாமிய நாடுகளின் எதிர்ப்பை சம்பாதித்த வெறுப்புப் பேச்சு

Hate speech that earned the opposition of Islamic countries 

India is in danger of sinking into darkness

இஸ்லாமிய நாடுகளின் எதிர்ப்பை சம்பாதித்த வெறுப்புப் பேச்சு

இந்தியா இருளில் மூழ்கும் அபாயம்

ஆளும் இந்து தேசியவாதக் கட்சியின் உயர் அதிகாரிகள் இஸ்லாம் மற்றும் நபிகள் நாயகம் (ஸல்) அவர்களை இழிவுபடுத்தும் வகையில் கருத்து தெரிவித்ததை அடுத்து, முஸ்லிம்கள் பெரும்பான்மையாக உள்ள நாடுகளில் இருந்து பெரும் இராஜதந்திர சீற்றத்தை இந்தியா எதிர்கொள்கிறது. புதுடெல்லி சேத கட்டுப்பாடு (Demage Control) நடவடிக்கையில் போராடிக் கொண்டிருக்கின்றது.

குறைந்தபட்சம் ஐந்து அரபு நாடுகள் இந்தியாவிற்கு எதிராக உத்தியோகபூர்வ எதிர்ப்புகளை பதிவு செய்துள்ளன, மேலும் (அரபு நாடுகள் அல்லாத)  ஈரான், பாகிஸ்தான் மற்றும் ஆப்கானிஸ்தான் ஆகியவையும் பிரதமர் நரேந்திர மோடியின் பாரதிய ஜனதா கட்சியின் இரண்டு உயர்மட்ட செய்தித் தொடர்பாளர்களின் கருத்துக்களுக்கு கடுமையாக கண்டனம் தெரிவித்துள்ளன.

சமூக ஊடகங்களில் கண்டனத்துடன் கோபமும் நிறைந்து வழிகின்றது, மேலும் இந்தியப் பொருட்களைப் புறக்கணிக்க வேண்டும் என்ற அழைப்பும் முஸ்லிம் நாடுகளில் எழுந்துள்ளது. உள்நாட்டில், நாட்டின் சில பகுதிகளில் மோடியின் கட்சிக்கு எதிரான போராட்டங்களுக்கும் அது வழிவகுத்துள்ளது.

2014 ஆம் ஆண்டு ப.ஜ.க. ஆட்சியை கைப்பற்றியதில் இருந்து இதுபோன்ற தாக்குதல்கள் குறித்து மோடியின் வழக்கமான மௌனத்தால் தைரியமடைந்த இந்து தீவிரவாதிகளால் இந்தியாவின் முஸ்லிம் சிறுபான்மையினரை குறிவைத்து அதிகரித்து வரும் வன்முறையைத் தொடர்ந்து மூர்க்கத்தனமான கருத்துக்கள் வெளியிடப்பட்டு வருகின்றன.

பல ஆண்டுகளாக, இந்திய முஸ்லிம்கள் அவர்களின் உணவு மற்றும் உடையில் இருந்து மதங்களுக்கு இடையேயான திருமணங்கள் வரை அனைத்திற்கும் இலக்கு வைக்கப்பட்டுள்ளனர்.

மனித உரிமைகள் கண்காணிப்பகம் மற்றும் சர்வதேச மன்னிப்புச் சபை போன்ற உரிமைக் குழுக்கள் இதுபோன்ற தாக்குதல்கள் இன்னும் அதிகரிக்கலாம் என எச்சரித்துள்ளன.

இந்தியாவின் 1.4 பில்லியன் மக்கள்தொகையில் 14% இருக்கும் முஸ்லிம்கள், உலகில் (இந்தோனேசியாவுக்கு அடுத்தபடியாக) இரண்டாவது பெரிய முஸ்லிம் மக்கள்தொகையை கொண்டதாக இருக்கும் அளவுக்கு அதிகமான எண்ணிக்கையில் இருக்கின்றனர். முஸ்லிம்களுக்கு எதிராக மோடியின் ஆளும் கட்சி கண்மூடித்தனமாகவும், சில சமயங்களில் வெறுப்பூட்டும் பேச்சை செயல்படுத்துவதாகவும் அவர்கள் குற்றம் சாட்டியுள்ளனர்.

மோடியின் கட்சி குற்றச்சாட்டுகளை மறுத்த போதிலும் இந்திய முஸ்லிம்கள் தங்களுக்கு எதிரான தாக்குதல்கள் மற்றும் அவர்களின் மத நம்பிக்கை குறிவைக்கப்படுவது வெகுவாக அதிகரித்துள்ளன என்று கூறுகிறார்கள்.

நூபுர் ஷர்மா மற்றும் நவீன் ஜிண்டால் ஆகிய இரு BJP செய்தித் தொடர்பாளர்களும் இஸ்லாத்தின் இறை தூதர் அவர்களையும் அவரது மனைவி அன்னை ஆயிஷா அவர்களையும் அவமதிக்கும் வகையில் கருத்துக்களை வெளியிட்டதைத் தொடர்ந்து முஸ்லிம்கள் மத்தியில் கோபாவேசம் தொடர்கிறது.

இந்தியாவில் கணிசமான இந்துக்கள் உட்பட பலரும் உலக முஸ்லிம்களால் கண்ணியப்படுத்தப்படும் ஒருவரை இழிவுபடுத்த மேற்கொள்ளப்படும் செயலை வன்மையாக கண்டித்து வருகின்றனர் என்பது குறிப்பிடத்தக்கது.

கடந்த ஞாயிற்றுக்கிழமை வரை மோடியின் கட்சி அவர்கள் மீது எந்த நடவடிக்கையும் எடுக்கவில்லை, கத்தார் மற்றும் குவைத் தங்கள் இந்திய தூதர்களை வரவழைத்து எதிர்ப்புத் தெரிவிக்கும் வரையில் அசட்டையாகேவே இருந்தது. அதன் பிறகுதான் பிஜேபி அரசு "எந்தவொரு மத நபர்களையும் அவமதிப்பதை கடுமையாக கண்டிக்கிறது" என்று ஓர் அறிக்கையை விட்டு சர்மாவை இடைநீக்கம் செய்து ஜிண்டாலை வெளியேற்றியது,

பின்னர், சவூதி அரேபியா மற்றும் ஈரானும் தமது கண்டனத்தை வெளியிட்டு, இந்தியாவிடம் புகார் அளித்தன, மேலும் ஜித்தாவை தளமாகக் கொண்ட இஸ்லாமிய ஒத்துழைப்பு அமைப்பு இந்த கருத்துக்கள் "இந்தியாவில் இஸ்லாம் மீதான வெறுப்பு மற்றும் துஷ்பிரயோகம் மற்றும் முஸ்லிம்களுக்கு எதிரான நடைமுறைகளை தீவிரப்படுத்தும் சூழலில்" வந்ததாகக் கூறியது.

ஞாயிற்றுக்கிழமை, கத்தார் மற்றும் குவைத்தில் உள்ள இந்திய தூதரகங்கள் ஒரு அறிக்கையை வெளியிட்டன, முஹம்மது நபி மற்றும் இஸ்லாம் பற்றி வெளிப்படுத்தப்பட்ட கருத்துக்கள் இந்திய அரசாங்கத்தின் கருத்துக்கள் அல்ல, அவை "விளிம்பு கூறுகளால்" உருவாக்கப்பட்டவை. தரக்குறைவான கருத்துக்களை தெரிவித்தவர்கள் மீது ஏற்கனவே கடும் நடவடிக்கை எடுக்கப்பட்டுள்ளதாக அந்த அறிக்கையில் தெரிவிக்கப்பட்டுள்ளது.

எவ்வாறாயினும், முஸ்லிம் நாடுகளின் விமர்சனம் கடுமையாக இருந்தது, இது நபிகள் நாயகத்தை (ஸல்) அவமதிப்பது ஒரு சிவப்பு கோடு என்பதைக் குறிக்கிறது.

உலக முஸ்லிம்கள் இறை தூதரை தம் உயிருக்கும் மேலாக மதிக்கின்றனர், அவர் பெயருக்கு களங்கம் ஏற்படுத்தும் எந்த செயலையும் அவர்கள் அங்கீகரிக்கப் போவதில்லை என்பதை புரிந்துகொள்வது நல்லது.

இந்திய அரசு பகிரங்க மன்னிப்பு கேட்கவேண்டும் என கத்தார் வெளியுறவு அமைச்சு தெரிவித்துள்ளது.மற்றும் குவைத் இந்த செயலுக்கு தண்டனை வழங்கப்படாவிட்டால், இந்தியாவில் "தீவிரவாதமும் வெறுப்பும் அதிகரிக்கும்" என்று எச்சரித்தது. ஓமானின் தலைமை முஃப்தி இஸ்லாம் மீதான மோடியின் கட்சியின் "ஆபாசமான முரட்டுத்தனத்தை" ஒரு "போரின்" வடிவமாக விவரித்தார். குறிப்பிட்ட கருத்துகள் அவமதிக்கும் செயலாகும் "நம்பிக்கைகள் மற்றும் மதங்களுக்கு மரியாதை கொடுக்கும் படி" ரியாத் அழைப்பு விடுத்தது. எகிப்தின் அல்-அஸ்ஹர் மசூதி, சன்னி உலகின் முதன்மையான மதக் கல்வி நிறுவனமானது, "உண்மையான பயங்கரவாதம் (அது) முழு உலகையும் கடுமையான நெருக்கடிகள் மற்றும் கொடிய போர்களில் மூழ்கடிக்கும்" என்று கருத்துகளை விவரித்தது.

இந்தியாவில் ஒரு தொலைக்காட்சி நிகழ்ச்சியின் போது ஷர்மாவும் மற்றும் ஒரு ட்வீட்டில் ஜிண்டாலும் தெரிவித்த கருத்துக்கள் முஸ்லிம் நாடுகளுடனான இந்தியாவின் உறவுகளை சேதப்படுத்தும் அபாயம் உள்ளது என்பதை புரிந்துகொள்ள வேண்டும்.

இந்தக் கருத்துக்களினால் இந்தியாவின் அண்டை நாடான பாகிஸ்தான் மற்றும் ஆப்கானிஸ்தான் சினம் கொண்டுள்ளன.

திங்களன்று, பாகிஸ்தானின் வெளியுறவு அமைச்சு  இந்திய தூதரக அதிகாரியை வரவழைத்து இஸ்லாமாபாத்தின் "கடுமையான கண்டனத்தை" தெரிவித்தது. குறிப்பிட்ட கருத்துக்கள் "வேதனைக்குரியவை" மற்றும் "மோடியின் கீழ் இந்தியா மத சுதந்திரத்தை மிதித்து, முஸ்லிம்களை துன்புறுத்துகிறது" என்று பிரதம மந்திரி ஷாபாஸ் ஷெரீப் கூறினார்.

காபூலில் இருந்தும் விமர்சனம் வந்தது. "இஸ்லாத்தை அவமதிக்கவும், முஸ்லிம்களின் உணர்வுகளைத் தூண்டவும் இத்தகைய வெறியர்களை" இந்திய அரசாங்கம் அனுமதிக்கக் கூடாது என்று ஆப்கானிஸ்தான் இஸ்லாமிய எமிரேட் கூறியது.

ஈரானின் வெளியுறவு அமைச்சகம் இந்திய தூதரை வரவழைத்து, ஈரானிய அரசாங்கம் மற்றும் ஈரானிய மக்களின் கடுமையான எதிர்ப்பை தெரிவித்தது என்று  ஈரானிய வெளியுறவு அமைச்சக இணையதளம் தெரிவித்துள்ளது.

இந்திய தூதர் வருத்தம் தெரிவித்தார், இஸ்லாம் மதத்தின் நபிக்கு எதிரான எந்தவொரு துர்பிரசாரத்தையும் ஏற்றுக்கொள்ள முடியாது என்று கூறினார்.

மோடியின் ஆட்சியில் இந்தியா முழுவதும் முஸ்லிம்களுக்கு எதிரான உணர்வுகளும் தாக்குதல்களும் அதிகரித்துள்ளன. மிக சமீபத்தில், சில இந்து தீவிரவாத குழுக்கள் வடக்கு வாரணாசி நகரத்தில் உள்ள ஒரு உள்ளூர் நீதிமன்றத்திற்குச் சென்று 17 ஆம் நூற்றாண்டில் கட்டப்பட்ட பள்ளிவாசலில், அது ஒரு கோவிலை இடித்து கட்டப்பட்டதாகக் கூறி, மசூதியில் பிரார்த்தனை செய்ய அனுமதி கோரியதனால், மதப் பதட்டங்கள் அதிகரித்தன. இந்திய தொலைக்காட்சி விவாத நிகழ்ச்சிகளின் போது தொகுப்பாளர்களால் இந்த பதட்டங்கள் மேலும் அதிகரித்துள்ளதாக விமர்சகர்கள் கூறுகின்றனர்.

பாரசீக வளைகுடா நாடுகளுடன் இந்தியா வலுவான உறவுகளைப் பேணுகிறது, மில்லியன் கணக்கான இந்திய புலம்பெயர் தொழிலாளர்கள் இந்நாடுகளில் சேவையாற்றுகின்றனர்; இதனால் இந்தியா பெரும் நன்மையடைகிறது; இந்தியா தனது சக்திவள தாகம் கொண்ட பொருளாதாரத்தை ஆற்றுவதற்கும் அன்றாட வாழ்க்கையின் இயந்திரங்களை இயக்கவும் சவுதி அரேபியா போன்ற எண்ணெய் வளம் கொண்ட பாரசீக வளைகுடா அரபு நாடுகளையும் சார்ந்துள்ளது என்பது மனதில் கொள்ளப்பட வேண்டும்.

https://kayhan.ir/en/news/103382/india%E2%80%99s-risk-of-descent-into-darkness

இமாம் காமனெய் மக்கள் பிரதிநிதிகளுக்கு வழங்கிய அறிவுரை

 Advice given by Imam Khamanei to the people's representatives

Religious democracy is a new idea that has provoked the animosity of world powers

இஸ்லாமியப் புரட்சியின் தலைவரான இமாம் காமனெய், மதத்தின் அடிப்படையிலான ஜனநாயகம் என்பது இஸ்லாமியப் புரட்சியால் உலக அரசியல் இலக்கியங்களுக்கு அறிமுகப்படுத்தப்பட்ட ஒரு புதிய யோசனை என்றும் அது உலகின் வல்லரசு நாடுகளின் பகைமையையும், குரோதத்தையும் தூண்டும் ஒரு யோசனையாக மாறியுள்ளது என்றும் அவர் குறிப்பிட்டார்.

கடந்த வாரம் ஈரானிய நாடாளுமன்றத்தின் இஸ்லாமிய ஆலோசனைச் சபையின் சபாநாயகர் மற்றும் உறுப்பினர்களுடனான சந்திப்பின் போதே புரட்சியின் தலைவர் இமாம் காமனெய்  மேற்கண்டவாறு குறிப்பிட்டார்.

இஸ்லாமியப் புரட்சியால் அறிமுகப்படுத்தப்பட்ட மதத்தின் அடிப்படையிலான ஜனநாயகம் ஆதிக்க சக்திகளின் நிகழ்ச்சி நிரலை சீர்குலைத்துள்ளது என்றும் வேறு வார்த்தைகளில் கூறுவதானால், ஈரான் இஸ்லாமியக் குடியரசினால், "ஆதிக்கவாதிகள்" மற்றும் "ஆதிக்கம் செலுத்தபடுபவர்கள்" என்ற இரு குழுக்களாகப் பிரிக்கப்பட்ட முறையை பெரும்பாலும் மாற்ற முடிந்தது என்றார்.

"மத ஜனநாயகம் என்ற இந்த சொல், இந்த உண்மை மற்றும் இந்த நிகழ்வு உலகின் வல்லரசுகளின் பகையையும் விரோதத்தையும் தூண்டியுள்ளது" இஸ்லாமியக் குடியரசு மீதும் அது நிறுவியுள்ள  ஜனநாயகத்தின் மீதுமான உலகளாவிய சக்திகளின் பகைமைக்கான காரணம் அதுவே என்று இஸ்லாமியப் புரட்சியின் தலைவர் தெளிவுபடுத்தினார்.

(சதாமினால் திணிக்கப்பட்ட போரில்) கொரம்ஷாஹ்ரின் விடுதலையின் ஆண்டு விழாவைப் பற்றி பேசுகையில், இஸ்லாமியப் புரட்சியின் தலைவர், இந்த நிகழ்வை ஒரு நகரத்தை மீண்டும் கைப்பற்றுவதை விட மிக பெறுமதியான ஒன்று என்றும் "கொரம்ஷாஹ்ரின் விடுதலை உண்மையில் ஒரு கசப்பான சூழ்நிலையை இனிமையானதாக மாற்றியது, இது இஸ்லாமிய வீரர்களுக்கு சாதகமாக அமைந்தது என்றும் கொரம்ஷாஹ்ரை விடுவிப்பதற்கு உதவிய காரணிகள், மக்களின் ஜிஹாத், சுய தியாகம், தளரா உறுதி, முன்முயற்சி, இலக்குகள் மற்றும் இலட்சியங்களை நோக்கிய தூர பார்வை மற்றும் மிக முக்கியமாக, நேர்மை மற்றும் இறை நம்பிக்கை என்பதை நாம் மறந்துவிடலாகாது” என்றார்.

இந்த காரணிகள் எல்லா விவகாரங்களிலும் எல்லா நேரங்களிலும் வெற்றிக்கு ஆதாரமாக இருக்கின்றன.  "இந்த விடுதலைக் காரணிகள் குர்ஆனில் இறைவனின் மாற்ற முடியாத வாக்குறுதியை அடிப்படையாகக் கொண்டவை என்பதால் இவற்றில் உறுதியாக உள்ள அனைத்து நபர்களும் வெற்றி பெறுவார்கள், ஏனெனில் இந்த நபர்களின் முயற்சிகள் தொடர்பாக இறைவன் பாராமுகமாக இருக்கமாட்டான்" என்று அவர் வலியுறுத்தினார்.

“சுய தியாகம் என்பது கீழ்மட்ட ஆசைகளின் பிடியில் சிக்கிக் கொள்ள மறுப்பது. இந்த கீழ்மட்ட ஆசைகளுக்கு மக்கள் அடிபணியும்போது தான் பல தனிநபர்கள் மற்றும் சமூகங்களில் பிரச்சினைகள் தொடங்குகின்றன.

இஸ்லாமிய ஆலோசனைப் பேரவை ஒரு முக்கிய பதவியை வகிக்கும் நிர்வாகத்தின் முக்கிய தூண்களில் ஒன்றாகும் என்று இமாம் காமனெய் கூறினார். “வெவ்வேறு நகரங்களைச் சேர்ந்த எம்.பி.க்கள் - குறைந்த மக்கள்தொகை கொண்ட நகரங்கள் கூட - நாடாளுமன்றத்தை நோக்கிய இத்தகைய கண்ணோட்டத்தைக் கொண்டிருக்க வேண்டும், மேலும் நாட்டை நிர்வகிப்பதில் உள்ள சிரமம் மற்றும் சிக்கலான தன்மையை அவர்கள் அறிந்திருக்க வேண்டும். ஈரானின் புவியியல் சூழ்நிலையுடன் ஒரு நாட்டை நிர்வகிப்பது ஒரு முக்கியமான பணியாகும். இன்றைய உலகில் உள்ள விசேஷ சூழ்நிலைகளைக் கருத்தில் கொண்டு பார்க்கையில் , இயற்கையாகவே இது கடினமான பணியாகும்.”

"நிச்சயமாக இன்றைய சூழ்நிலையில், நிர்வாகம் செய்வது என்பது அனைத்து நாடுகளுக்கும் கடினமான ஒன்றாக மாறியுள்ளது.. வல்லாதிக்க சக்திகளுக்கிடையேயான விரோதப் போக்குகள், போட்டிகள், அணுசக்தி வல்லமைக் கொண்ட நாடுகளுக்கு இடையே அச்சுறுத்தல் பரிமாற்றம், அதிகரித்து வரும் இராணுவ நடவடிக்கைகள் மற்றும் ஐரோப்பாவில் போர் சூழல்  கவலையளிப்பதாக உள்ளது. இது உலகின் மிகவும் போரால் பாதிக்கப்பட்ட பகுதிகளில் ஒன்றாகும், மேலும் ஒரு புதிய தொற்று நோயின் பரவல் மற்றும் உணவுப் பற்றாக்குறை போன்ற  அனைத்து காரணிகளும் உலகில் இந்த சிறப்பு சூழ்நிலைகளை கொண்டு வந்துள்ளன. இத்தகைய நிலைமைகளின் கீழ், நிர்வாகம் செய்வதில் பாரிய சிக்கல்களை ஏற்படுத்தி உள்ளது. நிலைமையை சமாளிப்பது பல நாடுகளுக்கு கடினமாகவும் மாறியுள்ளது.

ஈரானைப் பொறுத்தமட்டில், எல்லா நாடுகளுக்கும் இருக்கும் இந்தப் பிரச்சனை எமக்கும் உண்டு; அதன் காரணமாக ஒரு புதிய மாதிரியை முன்வைக்கிறது என்பதால் நமது நாடு பல்வேறு பகுதிகளில் ஆதிக்க சக்திகளுடன் தொடர்ச்சியான சவால் மற்றும் மோதலில் ஈடுபட்டுள்ளது, ஏனெனில் இது ஆதிக்க சக்திகளின் நிகழ்ச்சி நிரலை சீர்குலைத்த ஒரு மத அடிப்படையிலான ஜனநாயகமாக இருப்பதே அதற்கு காரணம்.

இஸ்லாமியக் குடியரசு குறிப்பிட்ட அனைத்து விரோதங்களையும் பகைமைகளையும் தாங்கி தொடர்ந்து முன்னேறி வருகிறது என்பதை வலியுறுத்திய தலைவர், “மக்கள் பிரதிநிதிகளான எம்.பி.க்கள், நிர்வாகம், நீதித்துறை கிளைகள் மற்றும் அனைத்து அரசாங்க அமைப்புகளும் தாங்கள் எவ்வளவு மகத்தான நிர்வாக பொறுப்பை சுமந்துள்ளனர் என்பதை அறிந்து கொள்ள வேண்டும் என்றும் குறிப்பிட்டார்.

இந்த பதவியின் மகத்துவத்திற்கு ஏற்ப செயல் திட்டங்களை  கண்காணிப்பதில் அவர்கள் விழிப்புணர்வை அதிகரிக்க வேண்டும். திறன்கள் மற்றும் குறைபாடுகளை நாம் சரியாகப் புரிந்து கொள்ள வேண்டும், மேலும் எந்த தவறும் நடக்காமல் பார்த்துக் கொள்ளவும் வேண்டும், ஏனென்றால் எதிரிகள் அவர்களது சொந்த திறன்களை நம்புவதை விட நாம் விடக்கூடிய தவறுகளில் நம்பிக்கை வைத்திருக்கின்றனர்.”

"புரட்சியின் இலட்சியங்களை நோக்கி நகர்வது நாட்டிற்கு நன்மை பயக்கும் மற்றும் நாடு அனுபவிக்கும் வலிகளுக்கு இது ஒரு தீர்வாக இருக்கும்."

"புரட்சிக்குப் பிந்திய முதல் ஆண்டுகளில், சிலர் மிகவும் உற்சாகமாகவும், மிகவும் புரட்சிகரமாகவும் இருந்தனர், ஆனால் இந்தப் பாதையில் தொடர்ந்தும் நிலைத்திருப்பதற்கு அவர்களுக்கு பொறுமையும் சகிப்புத்தன்மையும் இல்லை என்று தெரிகிறது. எனவே, பாராளுமன்றம் ஒரு தனிப்பட்ட மற்றும் கூட்டு மட்டத்தில் புரட்சிகரமாக இருக்க வேண்டும், மேலும் இது புரட்சிகரமாக மாறுவதை விட அதில் (புரட்சியில்) நிலைத்திருப்பது மிகவும் கடினமான ஒன்று.."

இமாம் காமனெய், புரட்சிகர எம்.பி.க்களின் பண்புகளை விவரிக்கையில், “முதல் பண்பு எளிமையான வாழ்க்கை முறையைக் கொண்டிருப்பதும், உலக செல்வங்களின்பால் வசப்பட மறுப்பதும், உயர்குடி வாழ்க்கை முறையைத் துறப்பது ஆகும். மேலும் எம்.பி.க்களின் வாழ்க்கை வசதி அவர்கள் பாராளுமன்றத்திற்குள் நுழையும் முன்பு இருந்ததை விட வித்தியாசமாக இருக்கக்கூடாது.

“மக்களுடன் தொடர்பில் இருப்பது என்பது மக்களைச் சந்திப்பது மட்டுமல்லாமல், அவர்களின் கோரிக்கைகளுக்கு செவிசாய்ப்பதுமாகும். மேலும் அவர்களின் கோரிக்கைகளை பூர்த்தி செய்ய முடியாத போது, அதற்கான நான் முன்னர் தெளிவுபடுத்திய குறிப்பிட்ட போராட்டத்திற்கு இது ஒரு எடுத்துக்காட்டாக இருக்க வேண்டும்.."

"ஒரு புரட்சிகர மக்கள் பிரதிநிதியின் மற்றொரு குணாதிசயம் என்னவென்றால், நாட்டின் முக்கிய பிரச்சினைகளுக்கு முன்னுரிமை அளிப்பதாகும்.  மற்றது பாகுபாடு மற்றும் ஊழல் போன்றவற்றை கவனமாகத் தவிர்ப்பதும், தடுப்பதும் ஆகும், ஏனையோரின் ஊழல்களில் மிகவும் அவதானமாக இருப்பதோடு இதுபோன்ற சந்தர்ப்பங்களை எதிர்கொள்ளும் போது குறிப்பிட்ட தீய செயலில் இருந்து தம்மையும் பாதுகாத்துக்கொள்ள வேண்டும்."

ஏனைய கிளைகள் மற்றும் அவற்றுடன் இணைந்த நிறுவனங்களுடன் உண்மையான ஒத்துழைப்பு இருக்கவேண்டியது ஒரு புரட்சிகர பாராளுமன்றத்தின் தேவை என குறிப்பிட்ட அவர் சுயநலன்களை மற்றும் உள் மோதலைத் தவிர்ப்பது கட்டாயம் என்றும் குறிப்பிட்டார். “ஒரு சட்டத்தை இயற்றும்போது, அதற்கு நியாயமான ஆட்சேபனை இருந்தால், அந்த ஆட்சேபனையை ஏற்க வேண்டும். மறுபுறம், இதற்கு மாற்றமான கருத்து மற்றும் எதிர்ப்பு உங்கள் கடமைகளை சரியாக நிறைவேற்றுவதைத் தடுக்கக்கூடாது.”

அரசியலமைப்பு மற்றும் அதன் ஆணைகளுக்கு முழுமையான அர்ப்பணிப்பு ஒரு புரட்சிகர எம்.பி.யின் மற்றொரு பண்பாகும் என்று அவர் வலியுறுத்தினார். "நிச்சயமாக, புரட்சிகரமாக இருப்பதற்கான அறிகுறி உணர்ச்சிவசப்பட்ட நிலையில் பேசப்படும், காரசாரமான, கசப்பான பேச்சு அல்ல" என்றும் அவர் கூறினார்,

நாடாளுமன்றத்தின் நடவடிக்கைகள் மற்றும் அதன் நடவடிக்கைகள் குறித்து மக்களுக்கு ஊடகங்கள் மூலம் விளக்க வேண்டியதன் அவசியத்தை எடுத்துரைத்த அவர், “தவறான விளக்கங்களை வழங்குவது கொந்தளிப்பை உருவாக்குவதற்கான வாய்ப்பை உருவாக்கி விடுகிறது. அது உங்களை அங்கீகரிப்பதற்கு பதிலாக உங்கள் ஊக்கத்தை குறைத்துவிடும் என்றும் குறிப்பிட்டார்.

https://english.khamenei.ir/news/9002/Religious-democracy-is-a-new-idea-that-has-provoked-the-animosity

ஆட்சியாளராக இமாம் கொமைனியின் முன்மாதிரியான வாழ்க்கை முறை

 Imam Khomeini’s exemplary lifestyle as a ruler

- 

இமாம் ருஹுல்லா முசவி கொமைனியின் மறைவின்

33வது ஆண்டு நினைவு தினம்

ஜூன் 3, 2022 அன்று அனுசரிக்கப்படுகிறது.

1979 - 1989 காலகட்டத்தில் அதிகம் பேசப்பட்டவர் ஈரானின் மறைந்த ஆயதுல்லா ரூஹுல்லா கொமெய்னி. ஏனெனில் அவர் பாரசீக வளைகுடாவின் போலீஸ்காரர் என்று அழைக்கப்பட்ட சக்திவாய்ந்த ஷா பஹ்லவிக்கு எதிராக ஒரு வெற்றிகரமான புரட்சியை வழிநடத்தினார்.

இந்தப் புரட்சி, அதன் இயல்பு காரணமாக, ‘புரட்சிகளை புரட்சிமயப்படுத்தும் புரட்சி’ என்று அடையாளம் காணப்பட்டது, ஏனெனில் இது நிராயுதபாணியான மக்கள் போராட்டத்தை அடிப்படையாகக் கொண்டது மற்றும் அந்நியச் சார்பிலிருந்து முற்றிலும் விடுபட்டது.

இமாம் கொமெய்னிக்கு நாட்டின் விவகாரங்களில் ஏறக்குறைய முழு அதிகாரமும் ஒப்படைக்கப்பட்டது, ஆனால் அவர் மக்களின் விருப்பப்படி இஸ்லாமிய போதனைகளின் அடிப்படையில் குடியரசு ஆட்சி முறையைத் தேர்ந்தெடுத்து நிறுவினார்.

முதல் நாளில் இருந்தே இந்த புரட்சிகர அரசாங்கத்தை வீழ்த்த பல சதித்திட்டங்கள் தீட்டப்பட்டன, MKO (Mojahideen Kalk Org) பயங்கரவாதிகள் நடத்திய குண்டுவெடிப்புகளில் புரட்சியின் தலைவர்கள் பலர் உயிரிழந்தனர். ஆனால் இமாம் இந்த சதிகளுக்கு எதிராக உறுதியாக நின்று விரும்பிய அரசாங்கத்தை நிறுவுவதில் வெற்றி பெற்றார்.

இமாம் கொமெய்னி மிக உச்சபட்ச அதிகாரத்தை கொண்டிருந்தவராக இருந்த போதிலும், தேவைப்படும்போது வழிகாட்டுதலைத் தவிர, அரசாங்க நிர்வாகத்தில் அவர் தலையிட்டதில்லை. மக்களால் தேர்ந்தெடுக்கப்பட்ட பிரதிநிதிகள் அரச அமைப்பை நடத்த அனுமதித்தார்.

இமாமின் தனிப்பட்ட வாழ்க்கை

பரந்த மற்றும் செல்வம் கொழிக்கும் ஒரு நாட்டினது அதி சக்திவாய்ந்த ஆட்சியாளரின் தனிப்பட்ட வாழ்க்கையும் நடத்தையும் ஒரு ஏழையைப் போலவே இருந்தது. அவர் சாதாரண மனிதனின் உணவை மட்டுமே சாப்பிட்டார். அவரது ஆடை தேர்வு குறைவாகவே இருந்தது. அனைத்து ஆடம்பரங்களையும் அவர் தவிர்த்து வந்தார்.

சமகால தோழர்கள், சகாக்கள், அரசியல்வாதிகள் ஆகியோரிடம் எளிமையான வாழ்க்கை வாழ வேண்டும் என்றும் அறிவுரை கூறினார்.

ஷா பஹ்லவி அரசனால் கட்டப்பட்ட பல பளிங் மாளிகைகள் உள்ளன. அவற்றில் குடியேறி, ஒரு ஆடம்பரமான வாழ்க்கையை இமாம் வாழ்ந்திருக்கலாம், ஆனால் அவர் அதில் விருப்பம் காட்டவில்லை. அவரது வீடு அடக்கமாகவும் எளிமையாகவும் இருந்தது. அவருடைய வாழ்க்கை முறை ஒரு ஏழை, எளிய மனிதரைப் போல் இருந்தது. ஒரு பெரிய தேசத்தின் பாரிய பொறுப்பை சுமந்துகொண்டு உலகத் தலைவர்களைச் சந்திப்பதில் ஈடுபட்டிருந்த நேரத்திலும் அவர் தன்னிலையை மாற்றிக்கொள்ளவில்லை.

அவரது சமூக நடத்தை, நீதி நிர்வாகம் மற்றும் விருப்பு வெறுப்பு அனைத்தும் இறை திருப்தியை நாடியதாகவே இருந்தன. இவ்வளவு பெரும் அதிகாரத்தைக் கொண்ட தலைமைப் பொறுப்பில் இருக்கும் அவர் ஏன் இப்படிப்பட்ட எழிய வாழ்க்கையை வாழ வேண்டும் என்று சிந்திக்கும் எந்த மனமும் ஆச்சர்யப்படும்.

மறைந்த இமாமின் இறை பக்தி, அவரது தனிப்பட்ட நடத்தை மற்றும் சக்திவாய்ந்தவராக இருந்தபோது அவர் வாழ்ந்த வாழ்க்கை, அவர் பணிவு மற்றும் அவர் செய்த இறை வழிபாடுகள் தனித்துவமானது. இது அவரது ஆன்மீக முதிர்ச்சியை எடுத்துக்காட்டுகிறது.

இமாமின் ஆன்மீக நிலைகள், அவரது ஏகத்துவ புரிதல், அவரது வழிபாட்டுச் செயல், இறைவனுடனான அவரது நெருக்கம் மற்றும் அவரது தூய்மை ஆகியவை உண்மையில் சாதாரண மனிதர்களால் இலகுவில் அடைய முடியாத உச்சமாகும்.

ஷியா மற்றும் சன்னி அறிஞர்கள் மற்றும் முஸ்லிம் அல்லாத அறிஞர்கள் உட்பட அனைத்து சிறந்த அறிஞர்களும் மறைந்த இமாமின் ஆளுமையின் இந்த பகுதியைப் புரிந்துகொள்வது கடினம் என்று கூறியுள்ளனர்.

மறைந்த இமாமின் வாழ்க்கையின் இந்தப் பகுதியும், அவரது உன்னதமான, அறிவு ரீதியான செயல்பாடுகளும் அனைவரின் கண்களையும் கவர்ந்த போதிலும், அவரது வாழ்க்கையின் பல்வேறு பரிமாணங்களை அவர்களால் எளிதில் புரிந்து கொள்ள முடியவில்லை. இது அவருடைய ஆன்மீக பக்குவ நிலையை எடுத்துக்காட்டுகிறது.

 

நீதி நிர்வாகம்

நீதியை நிலைநாட்டுவதில் அவர் எப்போதும் உறுதியுடன் இருந்தார். தேசத்தின் மீது திணிக்கப்பட்ட போர் மற்றும் பொருளாதாரத் தடைகள் போன்ற கடினமான சோதனைகளை எதிர்கொண்ட போதிலும் அவர் பொறுமையுடனும் தைரியத்துடனும் அவற்றை எதிர்கொண்டார் என்பது எல்லா நிகழ்வுகளிலிருந்தும் தெளிவாகிறது.

மறைந்த இமாம் தனது நிகழ்வு நிறைந்த வாழ்க்கையில் சில விஷயங்களில் அதிக கவனம் செலுத்தினார். அவர் எப்போதும் நீதியையும் ஒற்றுமையையும் மிக உயர்ந்ததாகக் கருதினார், மேலும் அவர் கவனம் செலுத்திய விஷயங்களில் இவை மிக முக்கியமானவை. இந்த மாபெரும் தலைவரிடமிருந்து முஸ்லிம் உலகம் கற்க பெரும் பாடங்கள் உள்ளன.

 

முஸ்லிம் நாடுகளின் ஆட்சியாளர்களுக்கு முக்கிய முன்னுதாரணம்

இன்றைய காலகட்டம் உலகெங்கிலும் உள்ள இஸ்லாமிய நாடுகளுக்கு படிப்பினைகள் நிறைந்தது. இஸ்லாமிய உலகத் தலைவர்கள் இமாமின் இந்தப் படிப்பினைகளைப் பின்பற்றினால், நிச்சயமாக அவர்கள் செழிப்பு, சுயமரியாதை, பாதுகாப்புப் பாதையை நோக்கிச் செல்வார்கள். "கிழக்கும் வேண்டாம், மேற்கும் வேண்டாம்" என்ற கொள்கையில் இமாம் உறுதியாக இருந்தார். இஸ்லாமிய உலகு இழந்த கண்ணியத்தை மீண்டும் பெற வேண்டுமானால் இமாமின் வாழ்விலிருந்து பாடம் கற்க வேண்டும்.

 

இஸ்லாமிய உம்மத்தின் ஒற்றுமை

இஸ்லாமிய சமுதாயம் எல்லா காலங்களிலும் அநீதிக்கு ஆளாகியிருக்கிறது. இது முஸ்லிம்களுக்கிடையில் ஒற்றுமையின்மை, முரண்பாடு மற்றும் மோதல்களால் ஏற்பட்டுள்ளது என்பது உண்மையாகும். இந்த கசப்பான உண்மைகளால் இஸ்லாமிய உலகம் இன்றளவிலும் பாதிக்கப்பட்டுள்ளது. இஸ்லாத்தின் வரலாற்றை - குறிப்பாக சமீபத்திய நூற்றாண்டுகளில் இஸ்லாத்தின் வரலாற்றை நீங்கள் எவ்வளவு அதிகமாகக் ஆராய்கிறீர்களோ, அவ்வளவு தெளிவாக இந்த உண்மைகளை உங்களால் உணர்ந்துகொள்ள முடியும்.

இமாம் கொமெய்னி (ரஹ்) எப்போதும் நீதியை வலியுறுத்தினார், மேலும் அவர் அதை தீர்க்கமாக பின்பற்றவும் செய்தார். அவர் இறைவனுக்காகவும், இஸ்லாத்துக்காகவும், முஸ்லிம்களின் ஒற்றுமைக்காகவும் தனது சொந்த நலனில் கவனம் செலுத்தவே இல்லை. அவர் எவருடனும் மோதலில் ஈடுபட விரும்பவில்லை. அவர் எப்போதும் இஸ்லாமிய உம்மத்தையும் இஸ்லாமிய உலக ஒற்றுமையையும் மதிப்பவராக இருந்தார்.

இஸ்லாத்தின் எதிரிகள் பல்வேறு முஸ்லிம் குழுக்களிடையே கருத்து வேறுபாடுகளைத் தூண்ட முயற்சிக்கின்றனர், இதற்காக அவர்கள் மில்லியன் கணக்கான டாலர்களை செலவிடுகிறார்கள். இவையெல்லாம் முஸ்லிம் உலகம் அறிந்திருக்க வேண்டிய உண்மைகள்.

இஸ்லாமிய நாட்காட்டியின் மூன்றாவது மாதமான ரபிஅல்-அவ்வல் 12 முதல் 17 வரையிலான நாட்களை இஸ்லாமிய ஒற்றுமை வாரமாக இமாம் கொமேனி அறிவித்தார். இந்த வாரத்தில் உலகம் முழுவதிலுமிருந்து வரும் அறிஞர்கள் இஸ்லாத்தின் அனைத்து சிந்தனைப் பள்ளிகளிலிருந்தும் கருத்துக்களைப் பகிர்ந்துகொள்வது மட்டுமல்லாமல், இஸ்லாமிய உலகின் தற்போதைய நிலைமையைப் பற்றி சிந்திக்கவும் அழைக்கப்படுகிறார்கள்.

இஸ்லாமிய உலகின் இன்றைய.தேவை ஒற்றுமை

        - தாஹா முஸம்மில்

 

"அறிவை அடிப்படையாகக் கொண்ட வாழ்க்கையே முழுமையான இறை அருள்."

“The most complete gift of God is a life based on knowledge”.

விசுவாசிகளின் தளபதியும், இறையச்சமுடையோரின் தலைவருமான “ஞானத்தின் நுழைவாயில்” இமாம் அலி இப்னு அபி தாலிப் (அலைஹிஸ்ஸலாம்) அவர்கள் நமக்கு வழங்கிய ஞானத்தின் சிகரங்களில் இதுவும் ஒன்றாகும்.

முஹம்மது நபி (ஸல்லல்லாஹு அலைஹி வ ஆலிஹி வ ஸல்லம்) அவர்களால் அலீ (அலை) அவர்கள் குறித்து வழங்கிய அடைமொழிகளில் இதுவும் ஒன்றாகும், ரஸூலுல்லாஹி (ஸல்) அவர்கள் தனது கலீபாவின் தகுதியைப் பற்றி மற்றொரு பிரபலமான ஹதீஸில் இவ்வாறு வெளிப்படுத்தினார்: "நான் அறிவின் பட்டணம் மற்றும் அலி அதன் நுழைவாயில்; இந்த பட்டணத்தில் நுழைய விரும்புபவர் நுழைவாயில் ஊடாக வரவேண்டும்".

நபிகள் நாயகம் (ஸல்) அவர்கள் சொன்ன எதுவும் பிழைப்பதில்லை, அவர் தனது மனோ இச்சையின் படி பேசுவதுமில்லை, சூரா நஜ்மின் முதல் சில வசனங்கள் சொல்வது போல் அவருடைய வார்த்தைகள் அனைத்தும் எல்லாம் வல்ல இறைவனால் வெளிப்படுத்தப்பட்டவை (வஹீ) ஆகும்.

இவ்வாறு, வரலாறு முழுவதும், சர்வவல்லமையுள்ள இறைவனின் கொடையான அறிவைத் தேடுவதில் தங்கள் வாழ்க்கையைக் கழித்தவர்கள், ஞானத்தின் நகரத்திற்குள் சரியான முறையில், அதாவது ரஸூலுல்லாஹி (ஸல்) அவர்கள் கூறிய அதன் நுழைவாயில் வழியாக நுழைவதை ஒரு குறிக்கோளாகக் கொண்டனர்.

இஸ்லாத்தின் புனித தீர்க்கதரிசியின் கூற்றுப்படி, இமாம் அலி (அலை) உண்மையை அங்கீகரிப்பதற்கான அளவுகோலாகும்.

அமீருல் முஃமினீன் இமாம் அலி (அலை) அவர்களின் பாத்திரம் பிறப்பு முதல் உயிர்த் தியாகம் வரை விதிவிலக்கானது. அவர் கஅபாவிற்குள் பிறந்தார் - அதற்கு முன்னும் சரி, அதற்கு பின்னும் சரி இவ்வாறு நிகழவில்லை - மேலும் அவர் மஸ்ஜிதில் தொழுகையின் போது வீரமரணம் அடைந்தார்.

அமீருல் முஃமினீன் அலி (அலை) அவர்கள் (பிறப்பு - இறப்பு) இந்த இரண்டு புள்ளிகளுக்கு இடையில் ஜிஹாத், இறைவனுக்காக பொறுமை காத்தல், அறிவு மற்றும் நுண்ணறிவைப் பெறுதல் மற்றும் இறை திருப்தியின் பாதையில் நகர்தல் ஆகியவற்றில் தனது எல்லா நேரத்தையும் கழித்தார்.

அவரது குழந்தைப் பருவத்தின் ஆரம்பத்தில், அலி இப்னு அபி தாலிப் (அலை) அவர்களை பராமரிக்கும் பொறுப்பு நபி (ஸல்) அவர்களுக்கு வழங்கப்பட்டது. இறைத்தூதர்(ஸல்) அவர்கள் அபிதாலிபின் வீட்டிலிருந்து அவரைத் தம் வீட்டிற்கு அழைத்து வந்தபோது, விசுவாசிகளின் தளபதி (அலை) அவர்களுக்கு ஆறு வயதுதான். இறை நம்பிக்கையாளர்களின் தளபதி (அலை) அவர்கள் சிறுவயதிலிருந்தே நபிகள் நாயகம் (ஸல்) அவர்களிடம் கல்வி கற்றவர். அவர் தனது சிறுவயதிலேயே நபிகள் நாயகம் (ஸல்) மீது தனது நம்பிக்கையை அறிவித்தார். அவர் நபி (ஸல்) அவர்களுடன் ஒன்றாக பிரார்த்தனை செய்தார். அவர் நபி (ஸல்) அவர்களுடன் ஒன்றாக ஜிஹாதில் ஈடுபட்டார். அவர் நபி (ஸல்) அவர்களுக்காக தியாகம் செய்தார். அவர் தனது வாழ்நாளில், புனித நபி (ஸல்) அவர்கள் மறைவதற்கு முன்னும் பின்னும் நீதி வழங்கவும், இஸ்லாத்தை மேம்படுத்தவும், இஸ்லாத்தைப் பாதுகாக்கவும் தன்னால் முடிந்த அனைத்தையும் செய்தார்.

நபி (ஸல்) அவர்களின் கண்ணோட்டத்தில், உண்மை மற்றும் நீதிக்கான அளவுகோல் விசுவாசிகளின் தளபதி அமீருல் முஃமினீன் அலி (அலை) (அலை) ஆவார். ஷியா மற்றும் சன்னி முஸ்லிம்கள் புனித நபியை மேற்கோள் காட்டி, "அலி உண்மையுடன் இருக்கிறார், உண்மை அலியுடன் உள்ளது. உண்மை அவர் எங்கிருந்தாலும் அவரைச் சுற்றி வருகிறது." என்று குறிப்பிடப்பட்டுள்ளது. விசுவாசிகளின் தளபதி (அலை) அவர்களின் வாழ்க்கை முறை இப்படித்தான் இருந்தது.

இமாம் அலி (அலை) அவர்கள் இறைவனின் முன் வைத்திருக்கும் உயர்ந்த அந்தஸ்து அவரது தன்னலமற்ற முயற்சி மற்றும் பக்தியின் காரணமாகும்... இமாம் அலி (அலை) மீது இறைத்தூதர் (ஸல்) அவர்கள் கொண்டிருந்த பாசத்தைப் பற்றி சன்னி முஸ்லிம்கள் மேற்கோள் காட்டிய மரபுகளில் சில முக்கிய விடயங்கள் உள்ளன. இந்த விடயங்கள் அனைத்து முஸ்லிம்களும் ஆழ்ந்து சிந்திக்க வேண்டியவை.

சுன்னி முஸ்லிம்களின் ஆறு முக்கிய ஹதீஸ் தொகுப்புகளில் ஒன்றான சுனன் அல்-திர்மிதியில், உம்முல் முஃமினீன் ஆயிஷா (ரலி) இவ்வாறு மேற்கோள் காட்டுகிறார்: "எல்லா மனிதர்களிலும், புனித நபியை விட அலிக்கு பிரியமானவர்கள் வேறு யாரும் இருக்கவில்லை." மற்றொரு ஹதீஸில், ஹன்பலி சிந்தனைப் பள்ளியின் ஃபிக்ஹ் நிறுவனர் அஹ்மத் இப்னு ஹன்பல் (ரஹ்) - அஸ்மா பின்த் உமைஸ் (ரலி) கூறியதாக மேற்கோள் காட்டுகிறார்: "ஒருமுறை புனித நபி இறைவனிடம் பிரார்த்தனை செய்து இவ்வாறு கூறினார்: "மூஸா (அலை) கேட்டது போலவே. அவரது கடமைகளில் அவருக்கு உதவ ஒரு மந்திரியை நீ நியமிக்க வேண்டும், மேலும் அலி இப்னு அபி தாலிப் (அலை) அவர்களை எனது மந்திரியாகவும், எனது கடமைகளுக்கு எனக்கு உதவுபவராகவும் நியமிக்கும்படி வேண்டுகிறேன்".

நமக்கான படிப்பினைகளும் அர்த்தங்களும் நிறைந்த அமீருல் முஃமினீன் (அலை) அவரது வாழ்க்கையில், அவரது நிகழ்ச்சி நிரலில் எதை முக்கியப்படுத்தினார் என்பதை இப்போது நாம் கவனிக்க வேண்டும்.

ஒன்று அவரது வாழ்க்கை முறையின் மிக முக்கியமான புள்ளிகளில் ஒன்றாகக் கூறப்படும் நீதி. மற்றது அடக்குமுறையாளர்களிடம் கடுமையாய் இருப்பது, ஒடுக்கப்பட்டவர்களிடம் அனுதாபம் காட்டுவது, ஒடுக்கப்பட்டோர் உரிமைகளைப் பெற உதவுவது போன்ற குணாதிசயங்கள் பல பகுதிகளில் தெளிவாகக் காணப்படுகின்றன - நஹ்ஜ் அல்-பலாகா.

விசுவாசிகளின் தளபதி (அலை) அவர்களின் இந்த அர்த்தமுள்ள கருத்துக்களில் கவனம் செலுத்துங்கள்... இமாம் அலி (அலை) அவர்களின் கருத்துப்படி, உலகம் - உலக உடைமைகள் என்ற பொருளில் - முற்றிலும் நிராகரிக்கப்பட வேண்டியவையும் கைவிடப்பட வேண்டியவையும் ஆகும்.

உலகத்தை நோக்கி, "போய் வேறொருவனை ஏமாற்று!" என்று முழக்கமிட்டார் அமீருல் முஃமினீன் (அலை) அவர்கள். உலக ஆசைகள் மற்றும் வாழ்க்கையின் பொருள் அழகு அவரை ஏமாற்ற முடியாது என்று அர்த்தப்பட்டும் விதத்திலேயே அவர் அவரை விட்டு சென்று ஏமாற்ற மற்றொருவரை கண்டுபிடிக்க கூறினார்.

அமீருல் முஃமினீன் அலி (அலை) என்ற மகத்துவம் மிக்க மனிதருக்கு மரியாதை காட்டுவது ஷியாக்களுக்கு அல்லது மற்ற அனைத்து முஸ்லிம்களுக்கும் உரிய தனிப்பட்டது தனிப்பட்ட அல்ல. மாறாக, உலகெங்கிலும் உள்ள அனைத்து விடுதலை பெற்ற மக்களும் ஒருவருக்கொருவர் பகிர்ந்து கொள்ளும் ஒன்று. முஸ்லிம்கள் அல்லாத அந்த ஆளுமைகள் கூட இந்த மகத்துவமிக்க மனிதருக்கு மரியாதை காட்டுவதை நீங்கள் காணலாம். அவரைப் பற்றி புத்தகங்கள் எழுதுகிறார்கள், கவிதைகள் எழுதுகிறார்கள். அனைத்து இஸ்லாமியர்களும், அனைத்து இஸ்லாமியப் பிரிவினரும் தங்கள் முழு மனதுடன் நேசிக்கும் மற்றும் மிகவும் மதிக்கும் ஒரு ஆளுமை அந்த உன்னத மனிதர்.